Laveaiina O Oe O Le Fuafuaga Lea

Ae tatou te lei fananau mai, sa tuuina mai e le Tama Faalelagi se fuafuaga mo i tatou e avea ai faapei o Ia. I totonu o lena fuafuaga, o matafaioi a Iesu Keriso e mafai ai ona faavavau lo tatou tuputupu ae. O Iesu o “le ala, ma le upu moni, ma le ola” (Ioane 14:6).

Filifilia

O Iesu Keriso o le Agaga muamua na soifua mai i le aiga o le Tama Faalelagi. Na filifilia Iesu “mai le amataga” (Mose 4:2) e avea ma o tatou Faaola. Ina ua folasia mai e le Tama Lana fuafuaga mo lo tatou faaeaga, sa fouvale Satani ma e na mulimuli ia te ia, ae sa tumau le faamaoni o Iesu. O le mana o Iesu Keriso lea na tulieseina ai Satani.

Tagai foi i le Ioane 17:5, 24; Mosaea 18:13; Eteru 3:14; Mose 4:3; Aperaamo 3:24–27.

Foafoa

I lalo o le taitaiga a Lona Tama Faalelagi, sa foafoaina ai e Iesu Keriso lenei lalolagi mo i tatou. “Na ia faia mea uma lava; e leai foi se mea e tasi na faia e lei faia e ia” (Ioane 1:3).

Tagai foi i le Kolose 1:16–18; Mosaea 4:2; 3 Nifae 9:15; Mataupu Faavae ma Feagaiga 14:9; Mose 2:26–27.

Faataitaiga

O se vaega o le fuafuaga a le Tama Faalelagi, na fanau mai Iesu Keriso i le lalolagi ma maua se tino faaletino. Na “uiga faatasi [o Ia] ma le pologa” ma “faamaualalo e ia ia te ia” (Filipi 2:7–8) ina ia mafai ona Ia malamalama i le auala e fesoasoani ai ia i tatou i la tatou malaga faaletino. O Lona soifuaga ma aoaoga ua aumaia ai ia i tatou se faataitaiga atoatoa o le auala e ola ai. O le mulimuli ia te Ia, e mafai ai ona avea i tatou e faapei o le Atua ma toe foi atu ai ia te Ia i se aso.

Tagai foi i le 1 Peteru 2:21; 2 Nifae 31:16; 3 Nifae 18:16.