O Sse Folafolaga o le Faamalologa ma le Faamauga
E ala i le faamaoni i le talalelei ma le sailia o o matou tuaa, sa faamanuiaina ai ma’ua ma lo’u tina i auala sa le mafai ona ma mafaufauina.
Ata na tusia e Stephanie Hock
Talu lava ona ou papatiso, ua ou fiafia ai lava i galuega o talafaasolopito o aiga ma galuega faalemalumalu. Sa ou fiafia i le manatu o le faamauina i lo’u aiga mo le faavavau, ae ou te lei manatu o le a tupu lenei mea ona o le toatele o tagata o lo’u aiga, e aofia ai ma lo’u tamā, na tauivi ma le vaisū o le inu ava malosi.
Sa ou ola ae i lena siosiomaga, ae sa fesoasoani le fautuaga lelei a lo’u tina pele ia te au ou te filifili ai e le mulimuli i lena ala. Sa papatiso o ia i le mavae ai o le tasi tausaga o lo’u papatisoga.
Ina ua atoa lo’u 18, sa ou filifili loa e auauna atu i se misiona ma maua ai se valaauga ou te auauna atu i Arisona, ISA. O se tasi lena o aafiaga sili o lo’u olaga. Ina ua ou toe foi i le fale, sa ou iloa ai sa matuai faateteleina le vaisū a lo’u tamā. Ou te manatua lo’u fesiligia pe na i ai ea se aoga o la’u auaunaga pe afai ua matua leaga nei mea i le aiga.
I le konafesi aoao ia Aperila 2018, na ou faalogo ai ia Elder Dale G. Renlund o le Korama a Aposetolo e Toasefululua o saunoa mai, “A o outou … su’e, ao mai, ma faafesootai lou aiga … o le a e maua le faamalologa mo mea e manaomia ona faamaloloina.”1
Sa faaauau pea ona tatalo lo’u tina, faitau tusitusiga paia, ma saili mo musumusuga e fesoasoani ai i lo’u tamā. Mulimuli ane, na ia faatalitonuina o ia e saili se fesoasoani. Sa ulufale o ia i se fale mo togafitiga mo le iva masina E na o le taitasi i le masina e mafai ona ma asiasi ai ia te ia. Sa le faigofie, ae maise lava i le amataga, ae i lea masina ma lea masina sa faaauau ai pea ona ma faamaoni ma lo’u tina i le talalelei ma saili ai mo o maua tuaa. O le faia o lena mea, sa faamanuiaina tele ai i matou i auala sa le mafai ona matou mafaufauina.
Ina ua mavae togafitiga a lo’u tamā, sa toe foi mai o ia i le fale ma sa le toe onā talu mai lena taimi. Sa feiloai o ia i faifeautalai ae sa lei saunia e tuuto atu i le talalelei. Na fautua mai lo’u tina ia matou o atu i lotoa o le malumalu ma lagona ai le Agaga iina.
I se taimi puupuu mulimuli ane, na lagona ai e faifeautalai le musuia e afe mai i lo matou fale ma asiasi mai i lo’u tamā. Sa ia faasoa atu ia i laua lona manao ina ia papatiso. I lena afiafi, sa faasoa mai ai e lo’u tamā ma lo’u tina le tala fou maoae ia te au.
Sa faataunuuina e le Alii Lana folafolaga. O le mea sa manaomia le faamalologa sa faamaloloina. Sa faamaloloina lo’u tamā mai mea na fai ma ana vaisū, ma sa faamaloloina ou masalosaloga i se faatuatua faafouina. Ua saunia nei lo matou aiga ina ia faamauina.