O Se Faavae mo Lou Lumanai
Fetuunai mai se lauga o le konafesi aoao o Oketopa 1997.
Ata na tusia e Dean MacAdam
I tausaga o lou talavou, o loo e atiina ae ai le tele o sini e te manao e ausia i lou olaga. O nei sini atonu e aofia ai se misiona, aoaoga, faaipoipoga i le malumalu, matata faamanuiaina, ma, ioe, o lou toe foi saogalemu atu i le afioaga o lou Tama Faalelagi i le malo selesitila.
O se tasi o luitau tele o le a outou feagai i le ausiaina o nei sini o le a faafesootaia lelei ai i latou i o outou olaga i aso uma. E mafai ona faigata lenei mea ona o lou taimi ua tumu i mea faalelalolagi. E mafai ona e aofia ai i le aoga ma gaoioiga e pei o musika, siva, taaloga, po o kalapu eseese. O le toatele o outou e mafai foi ona galulue i se galuega. O le fefiloi ai ma lenei faatulagaga pisi, e i ai gaoioiga i faaiuga o le vaiaso e pei o taaloga, siva, gaoioiga a le uarota, ma pati. E le gata i lena, ae soo se mea lava e te alu i ai, o loo osofaia oe i faaosoosoga mai lau tupulaga, ala o faasalalauga faaleagafesootai, tifaga, taaloga vitio, ma musika. Oka! Oka se aafiaga!
O le togafiti moni lava i le faapaleniina o nei mea uma o le teuina lea o le ata lapoa e faavavau i le mafaufau. Mo se faataitaiga: o le a faapefea e lau gaoioiga i le po nei o le Aso Faraile ona aafia ai le mea o le a tupu i le 2, 5, po o le 10 tausaga mai le taimi nei? Atonu e te manatu e le tele se mea e faatatau i le po o le Aso Faraile i le 2 tausaga mai le taimi nei, ae e mafai, e faalagolago i le mea o loo e i ai ma le mea o loo e faia. Afai e te manao ia ausia ou gafatia i le lumanai ma avea ma tagata e finagalo le Alii e te i ai, e tatau la ona e tuuina se ata lapoa o le faavavau i lou mafaufau ma galue i ai i le aso.
O Lou Faavae i se Lalolagi e U i Luga-Lalo
Na vaai le perofeta o Isaia i o tatou aso ma lapatai mai o le a avea ma aso e u ai i luga lalo. Sa lapatai mai Isaia, “Oi talofa ia te i latou o e fai mai, ua lelei le mea leaga, ae leaga le mea lelei, o e fai ma malamalama le pouliuli, ae fai foi ma pouliuli le malamalama; o e fai ma mea suamalie le mea oona, ae fai ma mea oona le mea suamalie!
“Oi talofa i e ua popoto i o latou lava manatu, ma ua fai ma tagata mafaufau i o latou lava taofi!” Isaia 5:20–21).
A o e tuputupu ae i lenei lalolagi ua faasaga ai luga i lalo, o loo i ai se luitau i lou feagai ai ma le tele o uunaiga o le olaga i aso nei. O le a faapefea ona e sao atu mai ou tausaga talavou ua saunia faaleagaga mo lou lumanai?
E taua lou iloaina o le faavae o lou lumanai, i le faaletino ma le faaleagaga, o loo fausia i le taimi nei. Afai ua faavaivaia lou faavae i le agasala ma alu ai e le toe faamalosia, o lona uiga o le fausaga o lou olaga o le a fausia i luga o se faavae vaivai. O le a itiiti se saogalemu o lou lumanai ma e mautinoa lava e sili atu ona faigata.
O se tasi o faamoemoega sili o le talalelei a Iesu Keriso o le aoao lea o i tatou i lo tatou gafatia e faavavau. O se tasi o faamoemoega o le faatulagaga o le Ekalesia a Iesu Keriso o le fesoasoani lea ia i tatou ia ausia lena gafatia. Ua aoaoina i tatou, “o luga lava o le papa o lo tatou Togiola, o le o Keriso lea, le Alo o le Atua, e ao ina oulua atinae ai lo oulua faavae.” O lo tatou Faaola, o Iesu Keriso, “o se faavae mautinoa, o se faavae i luga pe afai e fausia e tagata e le mafai ona latou pauu” (Helamana 5:12).
O Faatinoga Laiti i Aso Taitasi e Faia ai se Eseesega Tele
Ou te lei feiloai i se tagata faipisinisi, faiaoga, tusiata, po o se tagata taalo o le ua mauaina se tulaga maualuga o le lelei silisili, o lē e lei faafesootaia ma le manuia le vaaiga mamao o lo latou lumanai i o latou olaga i aso uma. O se sini po o se faaaliga vaaia e le fesootai atu i le olaga i aso uma e ala i gaoioiga masani o le a avea ma se miti e le oo.
Mo se faataitaiga: manatu faapea e i ai sau suega mo le ogatotou o le kuata i le matematika. O se tasi o au sini o le maua lea o se togi lelei i lena vasega, e faapefea la ona e oo atu i lena sini? Pe e te faatali seia oo i le minute mulimuli ma faatoa suesue lea i mea uma i le po a o lumanai le suega? O lenei faiga e tumu i le tulaga lamatia. Nai lo le malamalama moni i anomea ma le matuai saunia lava ma mautinoa e uiga i le mataupu, o le a e savali atu i totonu o le potuaoga, o le a fai si ou popole, ma le faamoemoe o le a fesili le faiaoga mo na o ni fesili e te iloa tali. (Ou te mautinoa e le na o au le tagata sa aafia i lenei lagona le fiafia!)
Pe o e faataatia ese se taimi itiiti i aso uma e suesue ai ma le toto’a ma le loloto i le mataupu? O lenei faiga o le a e maua ai le taimi talafeagai e malamalama lelei ai i anomea, ma tele taimi e te fesili ai i le faiaoga pe a tulai mai se fenumiaiga. O lenei mea o le a taunuu ai i se malamalama loloto atu o le anomea ma faateleina ai le lototele o le tagata lava ia e alu i totonu o le suega.
Ina ia ausia soo se sini—aemaise lava i sini faaselesitila—o le faaauau o le tuuto e le aunoa i aso taitasi o le tali lea. E mafai ona e puipuia oe lava mai faigata ma mea leaga o le lalolagi i le na o le lua itula i le lotu i le Aso Sa? E leai lava. E faigata tele ona faananati mo se misiona, ma e tutusa lava le faigata o le faananati mo se faaipoipoga i le malumalu. Aua le faia le tulaga lamatia. Ia atamai. E pei lava o au suesuega, o se taumafaiga e taulai atu i aso uma ua na o le pau lea o le auala mautinoa e maua ai le manuia. Saunia oe lava i aso uma. Suesue i tusitusiga paia. Fesootai atu i lou Tama Faalelagi i le tatalo. Auai i le seminare. Ia tausisia lou mama ma le saunia. A o e faia lena mea, o le a e maua le filemu, o le a mama lou mafaufau, e maualuga lou lototele, ma o le a e iloa i lou loto o le a susulu lou lumanai ma matagofie.
Faaauau Pea ma le Fesoasoani a le Alii
E finagalo le Alii ia e manuia, ma o le a faatasi o Ia ma oe. O le a Ia fesoasoani ia te oe ma lagolagosua ma lagolagoina oe i ou taimi o puapuaga pe afai e te faamaoni i Lana fuafuaga. Afai e te faalatalata atu ia te Ia i aso taitasi, o le a faalatalata mai o Ia ia te oe, ma o le a e seleseleina faamanuiaga e le mafaitaulia i vaega uma o lou olaga, ae maise lava o le mea e sili ona taua—o le faaleagaga.
O lou alofa i le Alii o le a iu ina fesoasoani ia te oe e tuuto ma tumau faamaoni ai i au sini faaselesitila. Ou te iloa o loo soifua le Alii ma o Lona finagalo ma le faamoemoe mo i tatou uma o se lumanai selesitila.