O Atatosi o le Faatuatua
Abner Garcia ma Midalys Soto
Arecibo, Puerto Rico
Ina ua mavae le Afā o Maria na faatama’ia ai Puerto Rico ia Setema 2017, na siitia atu Abner ma Midalys i Florida, ISA. E lei umi ae la mauaina se uunaiga i le malumalu e toe foi atu i Puerto Rico ma tatala se faleotiulu.
Raul Sandoval, pueata
Midalys
Sa faigata ina ua uma le Afā o Maria lea na lavea ai Puerto Rico. E ui lava sa i ai ni a matou vai ma meaai na teuina, ae sa lei maua se eletise po o le suavai mai le paipa.
Sa matou faaaogaina le suavai timu pe a pa’ū e tatā ai o matou lavalava ma taeele. Pe a timu, ou te aumaia le ma fanau, tamomo’e i fafo, ma fai atu, “Faavave, taeele!”
O le mea na sili ona faigata o le leai o se auala e fesootai ai ma lo matou aiga, uo, po o isi. O le mea e faafetai ai, sa i ai se afi a se tuaoi na faasoa mai ia i matou ina ia matou faaaogaina e valaau ai i lo matou aiga. Ina ua matou valaau atu i lo matou aiga i Florida, sa latou fai mai e matou te o atu ma nonofo ma latou.
Sa ma i ai i Florida i le lua vaiaso talu ona mavae le afā. Sa ou a’oga faatausimai i lena taimi ma o le a mafai ona faaauau au a’oga iina. Peitai talu ai sa na o le tasi le taavale a le uso o Abner, sa faigata ai ia i matou ona matou feoa’i ma mo Abner e sue se galuega. Sa matou mananao e faigaluega ma sue se auala e nonofo ai.
Sa ou maua se manatu o le a ou nofo i Florida ae toe foi atu Abner i Puerto Rico e faigaluega ai. Ina ua ou ta’u atu i se uo lau fuafuaga, sa fai mai o ia, “Leai, o outou o se aiga. E tatau ona outou nonofo faatasi.”
Sa ou tatalo e nonofo i Florida, ae sa tatalo Abner ina ia iloa le ala sa’o sa finagalo ai le Alii mo i matou. Sa ma o atu i le malumalu mo se taitaiga i le mea e tatau ona ma faia. Sa ou lagonaina le malosi o le Agaga i le malumalu e tatau ona matou toe foi atu i Puerto Rico. Sa faigata, ae o le mea lena sa matou faia. Sa faaauau pea a’u a’oga, ma sa tonu ia i maua e tatala se fale oti ulu. O Abner o se tagata oti ulu.
Abner
Sa ou maua se iunite laitiiti e mafai ona matou lisiina mo le matou fale oti ulu. Ina ua tau mai e le pule ia te au le tau mo le lisi, sa sili atu nai lo le mea matou te gafatia. Sa ou fesili atu i ai pe mafai ona faaitiitia le tau. Mulimuli ane sa ia valaau mai ia te au ma fai mai, “Ou te fia iloa po o ai o loo ou lisiina atu i ai. Aumai lau avā ina ia mafai ona ou feiloai ia te ia.”
Midalys
Sa ma tatalo ina ia ona iloa o i ma’ua o ni tagata lelei. Ina ua uma ona feiloai atu ia te ia, sa ia fai mai, “O loo fesoasoani le Atua ia te oulua. Sa umi se taimi o ia te au lenei avanoa. E toatele tagata na talosagaina e lisi, ae e lei i ai se lagona sa’o. E malosi lava ou lagona o oulua o ni tagata lelei.”
Na ia faaitiitia le tau o le lisi mo le tolu tausaga. Sa ou te’i. Sa ia fai mai upu tonu lava na ma tatalo ai ma lo’u toalua.
Abner
Ua sili atu lo matou saogalemu ma le toafilemu i le taimi nei. O loo matou mauaina ni tupe, ma ua faamanuiaina i matou.
Midalys
O nisi tagata e masani ona le lelei lo latou taulimaina o Abner ona o ia o se tagata o le Ekalesia. Sa latou fai mai foi, “E le tatau ona e faatautaia se pisinisi ma lau avā.” Ae na ou fai atu, “Ioe e mafai ona ma faia faatasi lenei mea!” O le mea moni, o se avanoa sili lea mo i ma’ua e toalua. E fesoasoani o ia ia te au i le fale ma tamaiti, ma ou te fesoasoani ia te ia e faagaoioi le faleoloa.
E alofa ma taialaina i tatou e le Atua. O le toe foi atu i Puerto Rico o le mea sao lea mo lo matou aiga. O le fuafuaga atoatoa lea a le Tama Faalelagi mo i matou.
O loo vaavaai atu Abner ma Midalys i le la fanau, o Jatziel ma Abnahia, o taaalo. Latou te faafetai mo le taitaiga ma faamanuiaga a le Alii mo lo latou aiga.
E fiafia faatasi tagata uma i se taaloga malie. E faafetai Midalys i le fautuaga a lana uo ina ia faatumauina faatasi lona aiga e ui lava i luitau ina ua mavae le Afā o Maria.
Mo Abner ma Midalys, o le faatautaia o le fale oti ulu ua avea ma se avanoa sili mo i laua e ola faatasi ai o se ulugalii.