Aisea Ua Tatou I Ai Iinei?
Sa ma faamavae i a ma galuega, faatau atu mea uma, ma faatofa atu i aiga ma uo ina ia siitia atu i se nofoaga matou te lei oo muamua lava i ai.
Ata na tusia e Shauna Mooney Kawasaki
Sa ou faigaluega i le ao, ae o lo’u toalua, o Elen, na faigaluega i le po. Sa toetoe lava a le vaai le tasi i le isi. Sa matou lei faia lava ni afiafi faaleaiga po o ni tatalo faaleaiga. Sa matou o i le sauniga faamanatuga, ae sa leai se tuuto i le talalelei.
Sa amata ona matou lagonaina le leai o se faamoemoe faaleagaga lea na oo mai ona o le taulai atu i mea o le lalolagi nai lo o mea a le Alii. Sa matou lagona le tele o mea e manao ai le Tama Faalelagi ia i matou.
O lea sa ma o ai i le Malumalu o Santiago Chile mo se taitaiga i auala e mafai ona matou faalelei atili ai. Sa ma’ua mauaina uma le uunaiga e tatau ona matou siitia atu faatasi ma le ma fanau teine laiti mai Santiago i le eria talafatai i matu o Coquimbo.
E matou te lei i ai muamua iina, ma e matou te le iloa lava se mea e uiga i le eria. Ae sa ma tuua a ma galuega, faatau atu mea uma, ma faatofa atu i aiga, uo, ma a’u aoaoga i le iunivesite.
I Coquimbo, sa matou le iloa se isi, ma sa lei i ai ni a matou tupe. Sa ou maua se galuega, ae sa tau le gafatia ai le totogi o le falemautotogi. Sa ma tuufesili, “Aisea ua matou i ai iinei?”
Sa mafaufau Elen pe i ai se mea e mafai ona ia faia e fesoasoani ai e totogi ia pili. I se tasi aso sa ia suiina ai se ufiufi fou mo se tasi o a matou nofoa tuai. “O le a ou tago e tuu i luma e faatau atu ma vaai pe i ai se isi e faataua,” o lana tala lea. Sa faatau e se tagata. O le faamalosiauina ai, sa aoao atili ai Elen e uiga i le toe faafouina o ufiufi o meafale. Sa amata ana faasalalauga faalauiloa ma amata ai ona maua galuega.
I le 2016, na valaauina ai au e avea ma epikopo o le matou uarota fou. Faatasi ai ma la’u galuega, a’u suesuega toe faaauau i le iunivesite, ma lo’u valaauga, sa toe amata foi ona ou tau le vaai i lo’u aiga.
“E le o fetaui le mea lenei,” o le tala lea a Elen. “Aisea ta te le faigaluega ai? O le a ou aoao ia te oe le faiga. O le a e i ai i le fale, ma o le a atili fetuutuunai ai foi lo’u valaauga.”
Sa ou popole i le tuua ai o la’u galuega, ae sa fautua mai Elen ia matou tatalo i le Tama Faalelagi ma fai atu: “O la tatou pisinisi lenei. O le a tatou faia faatasi. Faamolemole ia faamalamalama mai mo i matou le auala e mafai ai ona matou faia le galuega a o auauna atu Gregorio o se epikopo.”
Na tali mai le Tama Faalelagi. I le taimi nei, i le mavae ai o tausaga o le tau le vaai o le tasi i le isi, o loo matou faamasani pea i le faatasia. O nisi taimi e talasua mai Elen, “E le o i ai ni au faatalanoaga faale-epikopo e fai? Toe foi mai i le fa itula!”
O iinei i Coquimbo, ua matou aoao ai ia maua le faatuatua ma ola i le talalelei o se aiga, ma ua faamanuiaina i matou. Sa matou siitia atu i se aai sa matou le iloa, e auauna atu ai i tagata matou te le’i feiloai i ai, ma sa matou vaaia ni vavega matou te le’i faamoemoeina.