Autalavou Matutua
O le Auala na Ou Aoao Ai ia Malamalama i le Vaaiga a le Atua i Tulaga o Feusuaiga
Faamatalaga a le faatonu: O lenei tusiga o se vaega o se faasologa e uiga i le i ai o se vaaiga lelei i tulaga o feusuaiga, sootaga mamaoiloto faalefeusuaiga, ma le tulafono o le ola mama i le Liahonao Aokuso 2020. O le upu feusuaiga e eseese lona faauigaina e tagata eseese, ae i lenei tulaga, o loo tatou talanoa patino lava e uiga i o tatou lagona feusuai ma faasinomaga.
I le tuputupu ae ai, sa ou le iloa pe faapefea ona taulima lagona feusuai, lea na taitai atu ai au i lalo i ala sese, ae o le aoaoina o upumoni e uiga i feusuaiga ma le ola mama na suia ai lou olaga mo le lelei sili atu.
Ata na faatino e tagata faataitai
Sa ou magoto ifo i lou nofoa i le maasiasi a o folasia mai e le faiaoga le lesona e faatatau i le ola mama. “O le taimi nei, ou te iloa o outou teineiti e le o i ai se faafitauli i le tulafono o le ola mama … ,” sa ia amata ai. Na itiiti lona—po o se isi lava tagata—na iloa o se mea lea sa ou tauivi ai o se tamaitai talavou.
O lesona i le lotu na ou lagona ai faapea, o lagona feusuai sa na o totonu lava o le faaipoipoga e talafeagai i ai ma o lagona feusuai i fafo atu o le faaipoipoga na leaga. Sa ou lagona le maasiasi, vaivai, ma le tuua toatasi, lea na taitai atu ai au i le inoino i le autu atoa.
O le ola ae ai i le Ekalesia, sa masani ona ou mafaufau ai o le talanoa e uiga i feusuaiga—e oo lava i auala talafeagai—pe o le faailoaina o mafaufauga ma lagona feusuai sa o se mea sa tapu pe sese foi vagana ai ua e faaipoipo. Sa vave liliu ou manatu e mafaufau ai, o soo se fiailoa po o fesili e uiga i tulaga feusuai pe oo lava i le ola mama e le tatau ona talanoaina aua sa le mulimuli lea i le fuafuaga a le Atua. Ma ona sa ou manatu o a’u fesili sa matuai maasiasi e talanoaina ma se tasi, o lea sa ou vaavaai ai mo ni tali mai punaoa sa le i atagia ai tulaga faalefeusuai i le ala ua faamoemoeina e le Tama Faalelagi.
Mau i le Maasiasi
Sa ou tauivi ma ou lagona ma amioga mo le tele o tausaga. Sa ou iloa e sese i latou, ae sa ou le iloa po o ai e mafai ona ou liliu atu i ai mo se fesoasoani. Sa ou tauaveina le mamafa o agasala ma le maasiasi i aso uma, ae sa ou taumafai pea e faia isi mea uma i le sa’o. Sa foliga mai sa ou mau i se “va o sone”—faatasi ma le ’afa o a’u i le lalolagi ma le isi ’afa i le talalelei.
Sa ou manao e sili atu nai lo se isi lava mea e tuu atu lou tagata atoa i le talalelei. O lea sa ou suesue ai i au tusitusiga paia, sa ou tatalo, sa ou auai i gaoioiga a le Ekalesia, ma sa ou faataunuuina o’u valaauga. O le talalelei na foliga mai na pau lea o le mea na aumaia ia te au le toomaga.
A o faasolo ina ou aoao atili ma latalata atili atu ai i le Faaola, sa faatupulaia atili lo’u naunau e ola atoatoa i le tulafono o le ola mama. Ina ua mavae le tele o le mafaufau loloto ma le tatalo, na iu lava ina ou filifili e talanoa i lo’u epikopo e uiga i o’u tauiviga.
Lagonaina o le Mana Faamalolo a le Faaola
Ina ua ou tuua le ofisa a lo’u epikopo, o lena mamafa sa ou tauaveina i luga o ou tauau mo le tele o tausaga na foliga mai ua mou atu. Sa ou tagi ma le matuu atu [o se avega mamafa]. Ua ou lagonaina le mana faamalolo o le Faaola ua galue i lou olaga. O fonotaga ma lo’u epikopo na fesoasoani ia te au, i le faagasologa o le salamo, ina ia malamalama o ou lagona o ni tulaga masani ma sa le tuua na o au i tauiviga ma le ola mama. Sa ou iloaina o loo i ai isi—e pei o au—o e na mafatia i le le mautonu ona o le maasiasi, fefe, ma le le malamalama.
Sa fesoasoani lou epikopo ia te au i le faagasologa o le salamo lava ia, ae sa faia foi e sa’u uo se eseesega tele i ou lagona e uiga i la’u lui. O ia o se faataitaiga maoae ia te au. I se tasi aso sa ia faasoa mai ai ana tauiviga ua tuanai ma ponokalafi. Sa ou tei—semanu ou te le mate’ia lava sa talitutusa o ma tauiviga. Sa ou tusi atu ia te ia se tusi e uiga i lou aafiaga i le salamo mo nei lava liutau ma le aoga tele o le iloaina sa lei tuua na o au. I le lotu i le Aso Sa, sa ia opoina au ma fai mai sa ia mitamita ia te au i le galulue ai ma le epikopo ma o le a le tuua lava na o au. Sa ia fesoasoani mai ia te au ia ou lagonaina malosi atili le alofa o le Faaola.
Talu mai lena taimi, ua mafai ona ou malamalama ma faamalosiau atu i uo sa i ai ni tauiviga faapena e fesoasoani ai ia i latou ia malamalama atoatoa ai i le tulafono o le ola mama.
I se taimi mulimuli ane, o le iloaina sa le tuua na o au, o le lagonaina o le alofa ma le malamalama mai lou epikopo ma le Faaola, ma le iloaina e uiga i le taua e faavavau o le ola mama na fesoasoani e faamaloloina ai au.
Ua ou iloa nei sa matuai ou sese lava. O le ola mama ma feusuaiga talafeagai o se vaega o le fuafuaga o le fiafia a le Atua. O lagona feusuai o se vaega masani o le olaga nei ma e mafai ona matagofie pe a tatou aoao e faatino ma le tatau.
I le toe tepa i tua, sa ou lagona le faanoanoa ona sa ou le lagonaina lava le saogalemu e talanoa i le tulafono o le ola mama i se tasi ae ou te lei talanoa atu i lou epikopo. Sa tatau ona ou iloaina e leai lava se maasiasi i le i ai o ni fesili e uiga i le ola mama po o tulaga feusuai ma e taua tele le talanoaina ma le faaaloalo i tagata sao.
O Upumoni e Faavavau e Mafai Ona Taialaina ai Oe
Ona o o’u aafiaga, e mafai ona ou faamautinoa atu ai i soo se tasi o loo tauivi ma le tulafono o le ola mama e faapea, e mafai lava ona suia lou loto. O loo i ai le faamoemoe, faamalologa, ma upumoni e faavavau e mafai ona taialaina ai oe. Ua ou aoaoina o le ala e vaai ai le lalolagi i tulaga feusuaiga pe a faatusatusa i le auala e silasila ai le Tama Faalelagi e matuai eseese lava.
Ou te faafetai mo lesona na ou aoaoina. Ua i ai nei sau molimau e malosi atu i le tulafono a le Alii o le ola mama, le taua o le tulaga o feusuaiga i o tatou olaga, ma le mea aupito taua, o le alofa ma le mana faamalolo a le Faaola.