Na Tu le Alii i O’u Tafatafa
Ou te lei faamoemoeina le malaga faalemiliteli a la’u tane mo se tausaga atoa, ae o lenei aafiaga na fesoasoani ia i ma’ua e tuputupu ae ai faaleagaga o se aiga.
Ata na tusia e Colby A. Sanford
Sa matou i ai ma lo’u aiga i Texas, ISA, pe a ma le tolu masina ae telefoni mai loa lo’u tina ia te au i se tasi aso mai lona fale i Egelani.
“Ou te le iloa, Tinā,” sa ou fai atu ai ia te ia, “ae ou te lagona e pei e i ai se mea o le a tupu i le asō, ma ou te le iloa pe o le a ou fiafia i ai.”
Ina ua sau lo’u toalua o Matatia, i le fale i lena afiafi, sa ia fai mai, “e i ai se mea ou te fia tau atu ia te oe.” Sa vave lava ona ou iloa e tatau ona alu ese o ia, ae ou te lei faamoemoeina lana tofiga faalemiliteli e tumau ai mo se tausaga atoa. E lua vaiaso e sauni ai mo lona malaga ese atu. Sa tele le loimata maligi i lena taimi.
O se tausaga faigata. O le le i ai o la’u tane ma a’u po o le latalata mai o lo’u aiga i Egelani sa taufaamata’u ma faapopoleina ai a’u, ae o se aafiaga maoae mo a’u o se tina fou ma se pepe ma mo i matou e aoao ai pe faapefea ona matou faaauau ona tuputupu a’e faaleagaga o se aiga.
Ua uma ona matou faatutuina ni mausa o aso taitasi o tatalo faaleaiga ma le suesueina o tusitusiga paia. O lea la ina ua ma maua ma Matatia ni avanoa e talanoa ai i le tasi ma le isi, e masani lava i le Skype, e ma te tatalo ma faitau faatasi ai tusitusiga paia.
Ao ou faitauina nao a’u lava ia ma faatasi foi ma lo’u toalua ia tusitusiga paia, sa oo mai pea i lo’u mafaufau se fuaiupu: “O le mea lea, ia fiafia, ma aua le fefefe, aua o A’u o le Alii ua Ou faatasi ma outou, ma o le a tu i tafatafa o outou” (Mataupu Faavae ma Feagaiga 68:6). Ona ou iloa ai lea sa mafai lava ona ou faalagolago i taimi uma i le Tama Faalelagi.
O lo’u valaauga o se taitai pese a le uarota na taulai atu ai lo’u mafaufau i upu o viiga ma tusitusiga paia ma folafolaga latou te ofoina mai. O le peseina ma le faalogologoina o viiga na ou maua ai le filemu.
Ina ua nimonia le ma pepe, o Noa, sa tuuina atu e i latou e umia le perisitua se faamanuiaga o le soifua maloloina ma mo a’u se faamanuiaga o le malosi ma le mafanafana. Sa ia te au ni uso maoae o auaunaga sa fesoasoani foi ia te au. Sa ou faatasitasi foi ma isi avā na malaga atu foi [(i le militeli] a latou tane. Sa latou fesoasoani tele ia te a’u nai lo le mea sa ou fesoasoani ai ia i latou. Na oo lava ina fesoasoani le matou tuaoi i le moaina o le matou fanua.
Ou te faafetai mo mea laiti ma faatauvaa ua faamanuiaina ai lo matou aiga. E foliga mai e faamanuia mai pea le Tama Faalelagi ia i tatou e ala mai i se tasi o aapa mai ia i tatou pe a sili ona tatou manaomia se fesoasoani.