O Le Upu MULIMULI:
E Faapefea ona Aloese mai le Faaseseina
Mai se lauga o le konafesi aoao ia Oketopa 2019.
I le taimi o se asiasiga ma Toeaina Matua Grover i le tele o tausaga ua mavae, sa mananao ai le ma fanau tama e toalua e o i fafo e taaalo. Sa fai atu Toeaina Grover ia i laua, “Ia faaeteete—e tele masi’ise’u [skunk] i fafo.” E lei pine ae o atu tama i fafo e taaalo.
I lo matou agai atu i le fale, sa ou fesili ai, “Sa oulua vaai i se masi’ise’u [skunk]?” Sa tali mai le toatasi o i laua, “leai, ma te le’i vaai i ni masi’ise’u, ae na ma vaai i se tamai pusi e i ai se tosi paepae i lona tua!”
Sa le iloa e tama, sa la vaai i se masi’ise’u. O le tala lenei o ni faasinomaga taufaasese—o le mafaufauina o le mea moni o se isi mea. O le toatele lava i nei aso o loo tauivi ma nei lava faafitauli e tasi i se tulaga sili atu.
O Satani, o le tamā o pepelo ma o le taufaasese sili, na te faia ia tatou fesiligia mea o loo i ai moni ma a lē o le amanaiaina o upumoni e faavavau po o le faaliliuina o i latou i se mea e foliga e sili ona faafiafiaina. Sa ia faaaluina le afe tausaga e faataitai ai le tomai e faatauanau ai le fanau a le Atua e talitonu i le lelei o le leaga ma le leaga o le lelei.
Sa saunia e le Alii se ala mo i tatou e tetee atu ai i luitau ma faaosoosoga, o le tele o ia mea e oo mai o se taunuuga tuusao o faatosinaga taufaasese a le fili ma ana osofaiga.
E faigofie lava le ala. Na talanoa le Atua ma perofeta i le tele o tausaga ua tuanai ma tuu mai ia i latou ni poloaiga na mamanuina e taitai ai Lana fanau i le fiafia i lenei olaga ma le mamalu i le isi olaga. O loo faaauau pea ona tuuina mai e le Atua poloaiga i lo tatou perofeta soifua i nei aso.
O le usiusitai i poloaiga na tuuina mai i lo tatou perofeta o se ki e le gata i le aloese ai mai faatosinaga o lē taufaasese ae ia lagona ai foi le olioli ma le fiafia tumau.
Ae peitai, e saili le tiapolo e faasese oe. Na te faafoliga sese taunuuga faataumaoi o fualaau faasāina po o le inupia ae fautua mai o le a aumaia e ia mea le fiafia. Na te faatofu i tatou i elemene eseese le lelei lea e mafai ona i ai i upega faaagafesootai, e aofia ai faatusatusaga faavaivai tagata ma tulaga faafoliga moni. E le gata i lea, na te faalafi mai isi mea pogisa, anotusi faataumaoi o loo maua i le initoneti—e pei o ponokalafi, osofaiga matautia i isi e ala i telefoni feaveai, ma le totoina o ni faamatalaga sese e mafua ai le masalosalo ma le fefe i o tatou loto ma mafaufau.
Tau ina ia tatou iloa taufaasese a Satani i mea o latou i ai. E tatau ona faaauau pea ona tatou faamaoni ma mataala, aua ua na o le pau lea o le ala e iloatino ai le upumoni ma faalogo ai i le siufofoga o le Alii e ala mai i Ana auauna. A o tatou usitai i poloaiga a le Atua, o le a taitaia pea i tatou i le ala sa’o ma o le a lē faaseseina.