Autalavou Matutua

Aoao ia Vaai i Feusuaiga o se Meaalofa Paia

I le avea ai ma tagata o le Ekalesia, ua aoaoina i tatou o le sootaga vavalalata faalefeusuaiga i totonu o le faaipoipoga o se vaega matagofie o le fuafuaga o le talalelei. E mafai ona avea o se vaega paia, matagofie, ma fiafia i o tatou olaga lea e taitai atu ai i le lotogatasi sili atu faatasi ma o tatou taitoalua ma le Atua. Ae faapefea lagona feusuai a o lei faaipoipo? O o tatou natura faalefeusuai e le amata i le faaipoipoga—ua tuuina mai e le Atua ia i tatou ni lagona feusuai e avea o se vaega soifua maloloina ma taua o le tagata soifua. Ae o nisi taimi o lo tatou lē malamalama e uiga i na lagona feusuai ma le natura e mafua ai ona tatou lagona le leaga, maasiasi, po o le agasala.

E lei aoaoina nisi o i tatou e uiga i vaega lelei o tulaga feusuai—ae na’o taunuuga le lelei o le solia o le tulafono o le ola mama. Pe atonu e lei aoaoina lava i tatou i se mea e uiga i le mamā i feusuaiga. Ma faatasi ai ma le tele o mea ua tatou aoaoina e uiga i feusuaiga mai ala o faasalalauga, o na savali lē sa’o, e tuufaatasi ma le tele o le lē malamalama e uiga i le silasila a le Atua i feusuaiga, e mafai ona saofaga i sootaga le maloloina, faaaogaina o ponokalafi, ma le sauaina o le faitalia o isi, e pei o le sauaina faalefeusuaiga. E mafai la faapefea ona tatou aoao e vaai atu i tulaga feusuaiga o se meaalofa paia, o se vaega taua o lo tatou natura na tuuina mai e le Atua? Ma e faapefea ona tatou puleaina o tatou tulaga feusuai e tusa ai ma lona faamoemoega autu i le fuafuaga e faavavau a le Atua?

Faatasi ai ma nei fesili i le mafaufau, ua matou tuufaatasia ai le vaega o le masina lenei e fesoasoani ia te oe e faateleina ai lou malamalama i le silasila a le Atua i feusuaiga talafeagai. Matou te faamoemoe e faatasi ai ma lenei vaaiga lelei, o le a e lagona ai le naunau e ola i le tulafono o le ola mama, maua le faamoemoega ma le faamoemoe i ou tulaga faaletagata lava ia, ia saunia e maua se faaipoipoga malosi, faamalieina, ma valaaulia le filemu o le Faaola i lou olaga. E ala i au taumafaiga e tausi poloaiga a le Atua e faatatau i tulaga feusuaiga, “[ona] solo malosi ai lea o lou lototele i luma o le Atua” (Mataupu Faavae ma Feagaiga 121:45).

Ia manuia tele,

Aufaigaluega o le vaega o le Liahona mo talavou matutua

Malamalamaaga …

Mai le autalavou matutua

i faamanuiaga o le ola ai i le tulafono o le legavia

“Ua tuuina mai ai ia te au le tele o le malosi e faaauau ai ona taulai atu i le talalelei ma Iesu Keriso.”

— David Mikaelson, Taiuani

“Filemu o le mafaufau; puipuiga i totonu o a’u mafutaga.”

—Heidi Thorpe, Iuta, ISA

“Saolotoga! Manino le mafaufau ma le mataala. Ua taulai atili atu i mea taua.”

—Sicily Wilcock, Arisona, ISA

“Ua fesoasoani ia te au e aloese mai ai i le tele o le lototiga lea na mafatia ai le toatele o au uo.”

— Isle Marie Ahlström, Suetena

Mai taitai o le Ekalesia

“Ua … folafola mai ia i tatou e faapea, ao tatou tulimataia le ala o le amioatua, ‘o le a avea le Agaga Paia ma [a tatou] soa e le aunoa’ (MF&F 121:46). O le mea lea, o le ola ai i le tulafono o le legavia e valaaulia ai nisi o faamanuiaga silisili e mafai ona maua e alii ma tamaitai i le olaga nei: talafeagai lelei faaleagaga i le i ai i le aiga, uo, paaga i le Ekalesia, ma, o le mea silisili, o le Faaola. O lo tatou lava naunautaiga faalenatura ia avea ai ma itutino moni, e faataunuuina lea i le amiotonu a o tatou savavali i le malamalama ma le faamoemoe.”

Elder David A. Bednar o le Korama a Aposetolo e Toasefululua, “Matou te Talitonu i le Nofomama,” Liahona, Me 2013, 44.

O le a le mea e te faia e avea ai ma se tausimea lelei i le lalolagi ua foafoaina e le Tama Faalelagi mo i tatou? (tagai i le 1 Nifae 17:36). Auina mai lau tali i le liahona.ChurchofJesusChrist.org ao le’i oo i le aso 31 o Aokuso, 2020.

Faasoa Mai Lau Tala

E i ai sou aafiaga e faasoa mai? Pe e te manao e vaai i ni tusiga e uiga i ni mataupu faapitoa? Afai o lea, matou te fia faalogo atu ia te oe! E mafai ona e tuuina mai lau tusiga po o ou manatu i le liahona.ChurchofJesusChrist.org.