Tali i Fesili e uiga i Sauaga Tau Feusuaiga

Saunia e Melissa K. Goates-Jones, Fomai o le Amio ma le Mafaufau ma se Polofesa Lagolago, Iunivesite o Polika Iaga, ma Benjamin M. Ogles, Fomai o le Amio ma le Mafaufau ma se Polofesa, Iunivesite o Polika Iaga

E ala mai ia Iesu Keriso, e i ai le faamoemoe ma le faamalologa. O nisi nei o auala e mafai ai ona tatou fesoasoani ma lē faatiga ia i latou ua aafia i sauaga tau feusuaiga.

O sauaga tau feusuaiga o se faafitauli taatele lea e mafai ona faapogai ai le afaina faatamaʻia o fanau a le Atua. O faamaumauga sa’o a le lalolagi mo le aofaiga o sauaga tau feusuaiga mo tane ma fafine e faigata ona maua,¹ ae o fua faatatau i le Iunaite Setete ua faailoa mai ai e 44 pasene o fafine ma le 25 pasene o tane ua aafia i sauaga tau feusuaiga. ²

A o tatou aoao e uiga i sauaga tau feusuaiga ma aufaatasi i a tatou taumafaiga e fesoasoani i tagata ua sao mai ma siitia le faaaloalo mo isi, e mafai ona tatou fesoasoani e faaitiitia sauaga tau feusuaiga i le lalolagi atoa.

O le a le sauaga tau feusuaiga?

O le sauaga tau feusuaiga o le faia lea e se tasi o se gaoioiga tau feusuaiga e le manaomia i se isi tagata e aunoa ma se faatagaga po o se maliega. O le sauaga tau feusuaiga o se agasala matuia.³ Ua fouvale tagata solitulafono i le Atua, solia le tulafono o le legavia ma le faia o e ua afaina o ni mea faitino e faamalieina ai tuinanau manatu faapito. Latou te le amanaiaina ma solia le faitalia a o latou tagata afaina, aveesea la latou aia tatau e faatino ai ae le o le taufaamalosi e faatino. O i latou e fosia pe faamalosia se tasi e fai feusuaiga ua auai i se tasi o faiga e sili ona patino ma ituaiga o sauaga fai faamalosi.

Pe a tatou mafaufau i sauaga tau feusuaiga, e masani ona tatou vaai faalemafaufau i se tagata solitulafono o lafi i se auala pogisa, ua sauni e osofa’i. E ta’ua lenei mea o le feusuaiga [toso] faifaamalosi e se tagata ese. Peitai, o le tele o sauaga tau feusuaiga e tupu i mafutaga mautu lea e le amanaia ai e le toalua, tagata o le aiga, paaga tafafao faamasani, uo, po o isi tagata masani le manatu o le maliega.⁴

O le mea e leaga ai, i nisi o aganuu e le masani ona aoaoina ai le manatu o le maliega, ma pe a faaalia e ala o faasalalauga le uigaloloto felatai faaletino, e masani ona le amana’ia le faatagaga pe faaalia sese faapea e le talafeagai pe le manaomiaina. O le le amanaiaina o le maliega e le talia lava e le Atua.

O le a le maliega ma o anafea na solia ai?

O lemaliega o se upu e vavalalata ma le faitalia. O le faitalia o le mana lea na tuuina mai e le Atua e galue ai ae le o le tau galueaiina (tagai 2 Nifae 2:14, 16, 26; Mose 7:32). Ua aoaoina i tatou e faamamalu le faitalia a isi ma aua le le amanaiaina e ala i le taufaamata’u, fai faamalosi, po o le fosi (tagai i le Mataupu Faavae ma Feagaiga 121:39–44; Mose 4:3).

O lemaliega e faaaogaina i tulaga eseese, e pei o le faaletulafono, faataitaiga, faasaienisi faaagafesootai, ma matāupu faafomai. Mo se faataitaiga, e le faia e se fomaʻi se taotoga i lou tino e aunoa ma le fesili muamua mo lau faatagaga manino.

I le tulaga o le alofa faaletino ma feusuaiga, o le maliega o lona uiga e tatau i se tagata ona malie i ai, saoloto, ma manino le ioe i le paʻi, sogi, poʻo soʻo se isi gaoioiga vavalalata. A leai, o loo tau faamalosi o ia e faatino ma e leʻi malie i ai.

E taua le malamalama e le mafai ona tuuina atu le maliega pe a:

1. O se tagata o loo moe, le o malamalama, po o aafia i le malosi o le ava malosi, fualaau faasaina, po o fualaau [o talavai].

2. O le tagata e leai se malosi faale-mafaufau e malie ai i tulaga tau feusuaiga.

3. O le tagata e laititi nai lo le tausaga faaletulafono e faataga ai [maliega].

4. E faatogafiti, faamalosi, pe pulea le isi tagata.

E taua foi le malamalama o le leai o se tetee e le o se maliega. Afai e le tetee se tagata i le fesootaiga faaletino pe taofia foi le tetee, e le faapea ua tuu mai e le tagata le faatagaga. Ua matauina e le au suesue o le mafaufau e faapea o le “faamalō” po o le le minoi ona o le fefe o ni tali masani ia i le pa’i faaletino e le manaomia.⁵

E le gata i lea, o le maliega e tatau ona faifai pea. O le ioe i se ituaiga o mafutaga faaletino i le taimi e tasi e le faaalia ai le malie i le amio lava e tasi i le lumanai.

E faapefea ona aafia i latou na sao mai i sauaga tau feusuaiga?

Pe a solia e se tasi tuaoi o le isi tagata e ala i feusuaiga le manaomia, e mafai ona mafatia le tagata na sao mai i sauaga i le tele o auala.

“E ui o nisi o sauaga faatautala e ono afua ai ni aafiaga faaletino, ae o ituaiga uma o sauaga faatautala e aafia ai le mafaufau ma le agaga. O tagata aafia i sauaga faatautala e masani ona tauivi ma lagona o le le mautonu, masalosalo, ta’usalaina, faalumaina, le faatuatuaina, ma le fefe. Latou te ono lagona le leai o se laveai, leai o se malosiaga, tuuatoatasi ma le vavaeesea. Latou te ono fesiligia foi le alofa o le Tama Faalelagi ma lo latou lava taua e faavavau.”⁶

O le a la’u mea e fai pe afai na sauaina a’u?

Ia e iloa e le o tuua na o oe. Ia manatua e alofa le Tama Faalelagi ia te oe. I le faaopoopo atu i le avanoa e tatalo ai ma saili le faamafanafanaga ma faaaliga mai ia te Ia, ua Ia saunia foi le tele o isi auala e lagolago ai oe.

Aapa atu. Talanoa i uo faatuatuaina, aiga, taitai o le Ekalesia, po o isi tagata taitoatasi e mafai ona tuuina atu le saogalemu ma le lagolago. E mafai ona e maua vave le filemu ma le faamalologa a o e talanoai i lou aafiaga ma tagata faatuatuaina e tutusa tou talitonuga ma valaaulia i latou e lagolago oe i lau malaga agai i luma.

Ia e iloa e le o oe e sese. Atonu e te lagona le le mautonu, fefe, pe maasiasi, ae e le tuuaia oe i amioga a le tagata solitulafono.

Saili se fesoasoani. E mafai ona faafaigofieina lou faamalologa e ala i punaoa faaopoopo, e pei o:

• Tausiga faafomai talafeagai.

• Faufautua faapolofesa.

• Faufautua faaletulafono.

• O anomea a le Ekalesia o loo ta’ua i lalo o le “Sauaga” i le topics.ChurchofJesusChrist.org.

Saili le faamoemoe ma le faamalologa e ala ia Iesu Keriso. E pei ona aoao mai Elder Richard G. Scott (1928–2015) o le Korama a Aposetolo e Toasefululua: “Ua saunia e lo tatou Tama [Faalelagi] se ala e faamalolo ai taunuuga o amioga, e ala i le fai faamalosi, faaaoga sese o le pule, po o le fefe i le isi tagata, e aveesea ai mo sina taimi le tumau le saolotoga o le tagata ua sauaina.” Sa ia faamalamalama mai: “O le faatuatua ia Iesu Keriso ma i Lona mana faamalolo e tuuina atu ai i le tagata na sauaina ia auala e foia ai taunuuga leaga o amioga le tonu a le isi tagata.”⁷ Mafaufau e faitau atili mai le soifuaga ma aoaoga a Iesu Keriso e malamalama ai i auala e mafai ona Ia fesoasoani ai ia te oe ia malolo.

O le mauaina o le filemu ma le faamalologa atonu o se faagasologa umi, faigata, ae e mafai e ala ia Iesu Keriso. Sa mafatia o ia i “tiga ma puapuaga ma faaosoosoga o ituaiga eseese uma” ma ave “i ona luga o [tatou] vaivaiga, ina ia [mafai] ona faatumuina lona loto i le alofa mutimutivale … ina ia [mafai] ona ia silafia … le ala e fesoasoani ai i ona tagata e tusa ma o latou vaivaiga” (Alema 7:11–12).

E mafai faapefea ona ou fesoasoani i se tasi ua sauaina?

E ui atonu e eseese aafiaga o tagata uma na sao mai sauaga tau feusuaiga, o nisi nei o auala e mafai ona e fesoasoani ai.

Faalogo ma le alofa ma le agaalofa. Faailoa atu lou popolega ma lou naunau e fesoasoani ia i latou. Sue pe o latou i ai i se tulaga lamatia i le taimi nei ma fesoasoani ia i latou ia maua le saogalemu ma le sulufaiga.

Fesootai i latou. Fesoasoani e faafesootai i latou i le tausiga faafomai, faufautua faapolofesa, po o isi alagāoa a nuu, e pei o nofoaga tutotonu mo faalavelave o feusuaiga fai faamalosi, e fesoasoani i ē sao mai sauaga.

Uunaia i latou. Uunaia i latou e lipoti atu sauaga i pulega talafeagai. O le lipotia o le faaoolima po o le sauaga o oe atonu o se tulaga manaomia faaletulafono i lou atunuu, aemaise lava pe afai o oe o se taitai o le Ekalesia. I nisi atunuu, ua faavaeina e le Ekalesia se laina fesoasoani e lē faalaua’iteleina mo sauaga e fesoasoani ai i peresitene o siteki ma epikopo i le lipotia o le sauaga ma le lagolagoina o le na sao mai ai.⁸

Lagolago i latou. E manatu tagata na sao mai i sauaga i nisi taimi o le faaoolima po o le sauaina o i latou na mafua ai. Ona atonu e talitonu tagata na sao mai i sauaga ua latou solia le tulafono o le legavia ma manaomia ona salamo, e taua i epikopo, matua, faiaoga, taitai o le autalavou, ma isi ona iloa faailoga o le faaoolima po o le sauaina ina ia mafai ona latou tuuina atu le lagolago ma uunaia le faamalologa.

Manatua talu ai ona ua solia le faitalia a tagata na sao mai i sauaga, e le manaomia la le salamo. Ua ta’ua i le Tusitaulima Aoao : “O nisi taimi e i ai lagona o le maasiasi po o le tausalaina i ē ua aafia. O tagata na aafia fua e lē ta’usalaina i le agasala. E le tuua’ia e taitai le tagata ua aafia fua. Latou te fesoasoani i tagata ua aafia ma o latou aiga ia malamalama i le alofa o le Atua ma le faamalologa e maua mai e ala ia Iesu Keriso ma Lana Togiola (tagai Alema 15:8; 3 Nifae 17:9).”⁹

Ia nofouta i o latou manaoga. E ono le fiafia tagata na sao mai i sauaga i fesootaiga faaletino e pei o le lulu lima po o le opo. Atonu latou te le fiafia e feiloai na o latou ma se taitai. Pe atonu latou te lagona le maileia pe afai e laititi tele le potu pe e te nofo i le va o i latou ma le faitotoa. O mafaufauga faigofie e mafai ona faia se eseesega i se tasi o loo sailia se faamalologa mai se aafiaga mafatia e pei o le sauaina.

O a nisi o fautuaga mo tagata solitulafono?

O nisi e faitau i lenei mataupu atonu latou te iloa ua latou solia le faitalia a le isi tagata. Atonu na latou faaaogaina le fosi po o le faamalosi, lē amanaiaina ma le loto i ai o tuaoi, po o le faaaogaina sese o manaoga o se isi tagata e uiga i sootaga vavalata faaletino.

Afai ua e faia lenei agasala, o laasaga taua e aofia ai le manaomia ona talia tiutetauave, vaai lou epikopo, salamo, galulue faatasi ma pulega faaletulafono pe a tatau ai, ma saili se fesoasoani faapolofesa. “O le ogaoga o au amioga atonu e manaomia ai ona e feagai ma aoaiga faalemalo ma le Ekalesia. Ae o le salamo atoatoa o le a aumaia ai le toomaga suamalie o le faamagaloga, filemu o le mafaufau, ma se olaga faafouina.”¹⁰

Suesue Ia Iloa Atili

Asiasi i le “Sauaina” i le vaega o le Fesoasoani i le Olaga o le ChurchofJesusChrist.org mo nisi punaoa mo tagata na sao mai i sauaga, tagata e pele, ma taitai.

Taitai: Sue punaoa mo le fesoasoani i e ua aafia ma fesoasoani i e solitulafono i le “Counseling Resources” i luga o le ChurchofJesusChrist.org.

Aoao pe faapefea e le “Faamamaluina o le Faitalia i Faamemelo Faaletino” ona faamalosia a tatou mafutaga ma fesoasoani ia i tatou e ausia lo tatou gafatia faalelagi (tagai itulau 12–15 i le lomiga lenei).

Faamatalaga

1. Tagai Emily R. Dworkin and others, “The Global Prevalence of Sexual Assault: A Systematic Review of International Research since 2010,” Psychology of Violence, vol. 11, no. 5 (Sept. 2021), 497–508.

2. Tagai Sharon G. Smith and others, The National Intimate Partner and Sexual Violence Survey: 2015 Data Brief—Updated Release (2018), 2–3, cdc.gov.

3. Tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 38.6.18, ChurchofJesusChrist.org.

4. Tagai Autu o le Talalelei, “Sauaga,” topics.ChurchofJesusChrist.org.

5. Tagai Rebecca Campbell, “The Neurobiology of Sexual Assault: Implications for Law Enforcement, Prosecution, and Victim Advocacy” (video), Dec. 1, 2012, National Institute of Justice, nij.ojp.gov/media/video/24056.

6. Autu o le Talalelei: “Sauaga.”

7. Richard G. Scott, “O Le Faamaloloina o Taunuuga Faataumaoi o le Sauaina po o le Faatautala,” Liahona, Me 2008, 42, 40.

8. Tagai i le Tusitaulima Aoao, 38.6.2.1.

9. Tusitaulima Aoao, 38.6.18.2.

10. Richard G. Scott, “O Le Faamaloloina o Taunuuga Faataumaoi o le Sauaina,” 43.