“O Le a Le Afiafi Faaleaiga?” Liahona, Aok. 2022.
Aoaoga Autu o le Talalelei
O Le a Le Afiafi Faaleaiga?
O le afiafi faaleaiga o se taimi ua faataatia ese i le aluga o le vaiaso mo lou aiga e faapotopoto ai. I lenei taimi, e mafai ona outou “aoaoina le talalelei, faamalolosia molimau, fausia le lotogatasi, ma olioli ma le tasi ma le isi” (Tusitaulima Aoao: Auauna Atu i O Le Ekalesia a Iesu Keriso o le Au Paia o Aso e Gata Ai, 2.2.4, ChurchofJesusChrist.org). O afiafi faaleaiga e foliga eseese mo aiga taitasi. Ae o le sini o le faaaoga lea o le taimi lenei e felataʻi atili ai ma latalata atili atu ai i le Faaola.
Sauniuniga
Mafaufau i se gaoioiga e fiafia ai lou aiga ma se autu o le talalelei e te manao e talanoaina ma aoao faatasi e uiga i ai. Ma le isi, filifili se aso ma se taimi i vaiaso taitasi e mafai ai e le toatele po o tagata uma o le aiga ona feiloai. E faamalosiauina e le Ekalesia tagata o le ekalesia ia faia afiafi faaleaiga i po o Aso Gafua. Ae e mafai ona feiloai aiga i taimi e sili ona fetaui mo i latou.
Tatalo
E toatele aiga e amata ma faaiu afiafi faaleaiga i le tatalo. O lenei mea e valaaulia ai le Agaga Paia i totonu o lo latou aiga. O le afiafi faaleaiga o se taimi lelei lea mo tamaiti ma tagata matutua e aoao ai e tatalo ma se vaega toalaiti.
Musika
E toatele foi aiga e i ai se pese amata ma le faaiu. E masani ona latou filifilia se pese mai le tusi o viiga po o le tusipese a le Peraimeri. Ua i ai i le Ekalesia ni piano pue o viiga i le music.ChurchofJesusChrist.org. E mafai foi ona outou matamata i vitio o le Aufaipese a le Tapeneko i le Lotoa o le Malumalu. O pesepesega i le taimi o le afiafi faaleaiga e fesoasoani i tagata e aoao ai viiga o loo usuina i le lotu.
Lesona
E tele punaoa a le Ekalesia e mafai ona fesoasoani i afiafi faaleaiga. Atonu tou te faaaluina ni nai minute e faitau ma talanoaina ai se tusiga mai le Liahona, le Uo, po o le Mo Le Malosi o le Autalavou. E mafai foi ona avea lenei taimi e matamata ma talanoaina ai vitio a le Ekalesia. Pe e mafai foi ona outou faitauina se lauga mai le konafesi aoao, faitau tusitusiga paia, pe talanoaina le faitauga o lena vaiaso i le Sau, Mulimuli Mai ia te Au.
Auai o le Aiga
Atapue o tamaiti o loo faia ni kuki na saunia e Michelle Loynes
E mafai ona auai tamaiti i afiafi faaleaiga. E mafai ona latou fesoasoani e fuafua ia gaoioiga, tatalo, pe filifili ma taitai ia pese. E mafai foi ona latou aoao atu lesona. A o lei faia le afiafi faaleaiga, e mafai ona e fesoasoani i lau tama e faitau se tala i le mekasini o le Uo po o le tala faatusi paia e sili ona fiafia i ai. Ona mafai lea e le tamaitiiti ona faamatala lena tala i le aiga e fai ma le lesona. E toatele foi tamaiti e fiafia e faatino tala o tusitusiga paia mo afiafi faaleaiga. Tuu atu i tamaiti matutua e fuafua le lesona pe filifili se lauga o le konafesi aoao latou te mananao e faitau. Ona tuu atu lea latou te taitaia le talanoaga.
Gaoioiga
E toatele aiga e fiafia e fai gaoioiga o se vaega o afiafi faaleaiga. O gaoioiga i totonu o le fale e mafai ona aofia ai le taaalo i taaloga, faia o meataulima, po o le kuka faatasi.
Mo gaoioiga i fafo e mafai ona o e savalivali, alu se savaliga sopo faaleaiga, pe taaalo faatasi i se taaloga i fafo. Saili se gaoioiga e mafai e tagata uma o le aiga ona fai, ma fiafia faatasi ai. Aloese mai tulaga faatauva e ono aveesea ai le Agaga.
Auauna atu
O le afiafi faaleaiga o se taimi sili lea mo aiga e auauna atu ai i isi. E mafai ona outou fesoasoani i nisi o tuaoi matutua, laulau meaai i se malutaga mo i latou e leai ni fale, tusi atu i faifeautalai, pe taalao le otaota, mo se faataitaiga. O leJustServe.org o loo i ai foi ni manatu i mea e mafai ona e fesoasoani atu ai.