O Jisu Karisito E iSakisaki ni iTabagone

Mai vei Elder Dieter F. Uchtdorf

Ena Kuoramu ni Apositolo Le Tinikarua

Mo nuitaki Jisu Karisito. O Koya ena tuberi iko ena sala dodonu. O Koya e nomu kaukauwa.

Ena noqu vakarautaka na itukutuku oqo nikua, au vakila na veiuqeti kaukauwa meu vosa vei ira na goneyalewa kei na cauravou.

Au vosa tale tikoga vei ira na a gone ena dua na gauna, vakakina vei ira vei ira na sa sega ni nanuma rawa.

Kau vosa tiko vei ira kece era lomani ira na noda itabagone ka vinakata mera rawa ka ena bula.

Kivei kemuni na itabatamata o ni tubu cake tiko mai, e tiko edua na itukutuku vakatabakidua vei iko mai vua na noda iVakabula, ko Jisu Karisito.

Nona iTukutuku na iVakabula vei iKo

Noqu itokani lomani, ke tiko eke na iVakabula ena gauna sara ga oqo, na cava ena tukuna vei iko o Koya?

Au vakabauta ni na tekivu o Koya ena Nona vakaraitaka na Nona loloma titobu vei iko. Ena rawa ni cavuta beka vakavosa, ia ena rawa talega ni drodro vakaukauwa mai—na Nona iserau—ka na matata vinaka, ka na curu vakatitobu ki lomamu, ka vakasinaita na nomu bula taucoko!

Ia, e baleta nida malumalumu kece ka se sega ni taucoko, e dau basika eso na kauwai ena nomu vakanananu. O na nanuma beka eso na cala o a vakayacora, na veigauna ko a soli iko kina ki na veitemaki, na veika o diva mo a kua ni cakava—se diva mo a cakava vakavinaka cake.

Na iVakabula ena vakila oya, kau vakabauta ni na vakadeitaki iko o Koya ena veivosa ka sa cavuta oti ena ivolanikalou:

“Mo kakua ni rere.”¹

“Kua ni vakatitiqa.”²

“Dou marau.”³

“Me kakua ni rarawa na lomamudou.”⁴

Au sega ni nanuma ni na vakadonuya o Koya na nomu cala. Ena sega ni vakawaletaki ira. Sega, o Koya ena kerei iko mo veivutuni—mo vakanadakuya na nomu ivalavala ca, me rawa ni vosoti iko kina o Koya. O Koya ena vakananuma vei iko ni ena 2,000 na yabaki sa oti o Koya e a vakacolata vei Koya na ivalavala ca oqori me rawa kina ni o veivutuni. Oqori e tiki ni ituvatuva ni bula marau ka lolomataki vei keda mai vua na Tamada Vakalomalagi dauloloma.

O Jisu ena dusia beka ni nomu veiyalayalati kei Koya—ka vakayacori ni o a papitaiso ka vakavoui ena veigauna kece o kania kina na sakaramede—e solia vei iko edua na isema vakamareqeti vata kei Koya. Na mataqali isema ka vakatoka na ivolanikalou me vakaivua vata me rawa kina, ena Nona veivuke, mo colata rawa kina na icolacola cava ga⁵

Au vakabauta ni iVakabula ko Jisu Karisito ena vinakata mo raica, vakila, ka kila ni o Koya na ivurevure ni nomu kaukauwa. Ni ena Nona veivuke, ena sega ni vakaiyalayala na ka o rawa ni rawata. Na ka o rawa ni rawata e tawa vakaiyalayala. O Koya ena vinakati iko mo raici iko ena sala e raici iko kina o Koya. Ka duidui sara oqori mai na sala e raici iko kina o vuravura.

Na iVakabula ena vakaraitaka vakamatata, ni o iko edua na luvena yalewa se tagane na Kalou Kaukauwa. Na Tamamu Vakalomalagi sai Koya na ka bula lagilagi duadua ena vuravura, sinai ena loloma, reki, savasava, tawasei tani, rarama, loloma vakalou, kei na dina. Ka dua na siga ena vinakata o Koya mo taukena na veika kece e taukena tu.⁶

Oya na vuna o tiko kina e vuravura nikua—mo vuli, tubu, ka toso mo veisau ki na inaki ko a buli kina mai vei Tamada mai Lomalagi.

Me rawati oqo, o Koya a talai Jisu Karisito mai me mai nomu iVakabula. Oqo nai naki levu ni Nona ituvatuva cecere ni marau, Nona Lotu, Nona matabete, na ivolanikalou—o koya taucoko.

Oya na nomu cavacava. Oya na nomu veimataka. Oya na nomu digidigi!

Dina kei na Digidigi

Na ka bibi duadua ni ituvatuva ni Kalou me baleta nomu marau sai koya na nomu kaukauwa ni digidigi⁷ E matata, ni Tamamu Vakalomalagi e vinakata mo digitaka na reki tawamudu vata kei Koya, ka na vukei iko o Koya mo rawata oya, ia ena sega vakadua ni vakasaurarataka vei iko.

E vakatara vei iko mo digitaka na: Rarama se butobuto? Vinaka se Ca? Reki se rarawa? Bula tawamudu se mate vakayalo?⁸

E vaka me digidigi rawarawa toka, se vacava? Ia, ena vuravura oqo, e vaka me vereverea cake mai na ka eda vakasamataka.

Na leqa sai koya nida sega ni dau raica na veika eso vakamatata me vaka noda gadreva me vakakina. Na iApositolo o Paula e vakatauvatana me vaka na “titiro ena iloilo buawa”⁹ E sa vuqa tu na veilecayaki e vuravura me baleta na cava e dodonu kei na cava e cala. E veisautaki na dina me vakatokai na vinaka me ca kei na ca me vinaka.¹⁰

Ia ni o qara vagumatua na dina—tawamudu, dina tawa veisau rawa—na nomu digidigi ena yaco me matata cake. Io, ena se tikoga na veitemaki kei na veivakatovolei. Ena yaco tiko na veika ca. Veika e sega ni vakaibalebale. Veika rarawa. Ia o rawa ni sotavi ira ni o kilai iko, kila na vuna o tiko kina eke, kei na gauna o vakararavi kina vua na Kalou.

Evei o na kunea kina na dina?

E tiko ena kosipeli i Jisu Karisito. Kei na taucoko ni kosipeli oya e vakatavulici tiko ena Lotu i Jisu Karisito ni Yalododonu Edaidai.

O Jisu Karisito a kaya, “Oi au na sala, kei na vu-ni-dina, kei na vu-ni-bula, sa sega ni torovi Tamaqu walega edua na tamata, ena vukuqu ga.”¹¹

Ni tiko na digidigi bibi mo cakava, o Jisu Karisito kei na Nona kosipeli vakalesui mai era sa digidigi uasivi duadua. Ni tiko nomu vakatataro, na muri Jisu Karisito kei na Nona kosipeli vakalesuimai era sa isau ni taro uasivi duadua. Ni o vakila na malumalumu, o Jisu Karisito e nomu vu ni kaukauwa.

O Koya e solia na kaukauwa vei ira na vakaocai; ka vei ira era guce, o Koya e vakalevutaka na kaukauwa.

O ira era sa waraka na Turaga era na vakaukauwataki ena Nona kaukauwa.¹²

Me iSakisaki ni iTabagone

Me vukei iko mo kunea na Sala ka me vukei iko mo taura na ivunau i Karisito me idusidusi veivakayarayarataki ena nomu bula, Na Lotu i Jisu Karisito ni Yalododonu e sa vakarautaka edua na ivurevure vou, edua na ilavelave vou ni Me iSakisaki ni iTabagone

Sivia na 50 na yabaki, na Me iSakisaki ni iTabagone e sa idusidusi tiko mai ena veitabayabaki vei ira na itabagone ni Yalododonu Edaidai. Au dau maroroya tiko edua na kena ilavelave e noqu taga, kau dau wasea vei ira na tamata era via kila na noda ivakatagedegede. E sa railesuvi ka vakavoutaki me sotava na veibolebole kei na veitemaki ni noda siga. Na Me iSakisaki ni iTabagone esa tiko ena initaneti ena 50 na vosa ka na veivuke yaga ni caka digidigi ena nomu bula. E dua na veivuke bibi ena moici ni digidigi ena nomu bula. Yalovinaka ciqoma me nomu ka wasea kei ira na nomu itokani.

Na ilavelave vou oqo ni Me iSakisaki ni Tabagone e kena iulutaga lailai tiko na iDusidusi ni Caka Digidigi.

Me matata sara, na idusidusi uasivi duadua ka rawa ni tiko vei iko mo caka digidigi kina sai koya o Jisu Karisito. O Jisu Karisito na isakisaki ni itabagone.

Ka inaki ni Me iSakisaki ni Tabagone me dusimaki iko vei Koya. E vakatavulica vei iko na veidina tawamudu ni Nona kosipeli vakalesui mai—veidina baleti iko, o cei o Koya, kei na ka o rawa ni rawata ena Nona kaukauwa. E vakatavulica vei iko na ivakarau ni caka digidigi dodonu yavutaki ena veidina tawamudu oqori.¹³

E bibi talega mo kila na cava e sega ni cakava na Me iSakisaki ni iTabagone. E sega ni caka digidigi vei iko. E sega ni solia vei iko na “io” se “sega” ena veidigidigi kece o na rawa ni sotava. Na Me iSakisaki ni Tabagone e vakanamata ki na yavu ni nomu digidigi. E vakanamata ki na yavunilewa, ivakavuvuli, kei na ivunau ka sega ni vakatabakidua ki na itovo eso.

Na Turaga, mai vei ira na Nona parofita, e sa dau dusimaki keda tu ki na sala oya. O Peresitedi Nelson e vakamasuti keda meda “vakalevutaka na [noda] noke vakayalo ni ciqoma na ivakatakila.”¹⁴ O koya e sureti keda tiko meda “rogoci Koya.”¹⁵ O koya e kacivi keda tiko meda muri Koya ena sala e cecere ka savasava cake.¹⁶ Ka da vulica tiko ena sala vata oqori ena veimacawa ena Lako Mai, Mo Muri Au.

E rawa meu tukuna ni idusidusi ena rawa ni solia vei iko edua na lisi balavu ni sulu eso mo kua ni daramaka, vosa eso mo kua ni cavuta, kei na iyaloyalo eso mo kua ni sarava. Ia ena veivuke beka oqori ki na dua na lotu ni vuravura raraba? Ena veivakarautaki beka vakaidina edua na ivakarau vakaoqo ki na dua na gauna ni bula me bulataki kina na bula e Vakarisito?

E kaya o Josefa Simici, “Au vakavuvulitaka vei ira na ivakavuvuli dodonu era qai liutaki ira ga.”¹⁷

Ka a tukuna o Tui Penijamini vei ira na nona tamata ena iVola i Momani, “Sa sega ni rawa meu tukuna vei kemuni na veika kece ko ni na rawa ni ivalavala ca kina; ni sa vuqa sara na kena ivakarau kei na kena sala, io sa rui levu kau sa sega ni wilika rawa.”¹⁸

O Tui Penijamini a kuria, “Ia oqo ga na levu ni ka au na tukuna rawa vei kemuni, … qarauni kemunivinaka, kei na nomuni vakanananu, kei na nomuni vosa, kei na nomuni cakacaka ka muria tiko na veivakaro ni Kalou, ka tikoga ena vakabauta na … noda Turaga, me yacova sara na itinitini ni nomuni bula.”¹⁹

E cala beka me tiko na lawa? E sega sara. Eda gadrevi ira e veisiga. Ia e cala ga kevaka eda vakanamata vakadua ga ki na lawa ka sega ki vua na iVakabula. E gadrevi mo kila na vuna kei na cava ka vakasamataka na revurevu ni nomu digidigi. E gadrevi mo na vakararavi vei Jisu Karisito. O Koya ena tuberi iko ena sala dodonu. O Koya e nomu kaukauwa.²⁰

Na Kaukauwa ni iVunau Dina

Na Me iSakisaki ni iTabagone e doudou me vakaraitaka na vunau i Jisu Karisito. E doudou me sureti iko mo caka digidigi ka yavutaki ena ivunau i Karisito. Ka doudou ni vakamacalataka na veivakalougatataki e yalataka o Jisu Karisito vei ira era muria na Nona Sala.²¹

O Peresitedi Russell M. Nelson e vakatavulica: “Ena gauna e nomu gagadre cecere duadua kina mo laiva na Kalou me qaqa tikoga [ena nomu bula], sa na rawarawa cake eso na vakatulewa. E levu na veika dredre sa sega ni dredre! O kila na ivakarau vinaka duadua mo sauni iko kina. O kila na ka mo sarava ka wilika, na vanua mo vakayagataka kina na nomu gauna, kei o cei mo veitokani vata. O kila na veika o vinakata mo rawata. O kila na mataqali tamata o vinakata dina mo vakataka.”²²

iVakatagedegede Cecere Cake

Na ivakatagedegede i Jisu Karisito e cecere sara ki vei ira era muri Koya. Kei na veisureti me qarai vagumatua na Nona lewa ka bulataka na Nona dina e sai koya na itagede cecere duadua me rawati!

Na vei digidigi bibi eso vakayago ka vakayalo me na kakua ni vakatautaki ga ki na gagadre ni tamata vakayadua, se ki na ka e taleitaki se kilai levu.²³ Na Turaga e sega ni tukuna tiko, “Cakava ga na ka o vinakata.”

O Koya e tukuna tiko, “Me Qaqa Duadua Ga na Kalou.”

O Koya e tukuna tiko, “Mo lako mai, mo muri au.”²⁴

O Koya e tukuna tiko, “Bula ena sala e savasava cake, cecere cake, ka matua cake.”

O Koya e tukuna tiko, “Muria na noqu ivakaro.”

O Jisu Karisito e noda ivakaraitaki uasivi, ka da saga ena noda igu kece meda muri Koya.

Noqu itokani lomani, meu tokaruataka, ke a duri tu eke na iVakabula nikua, ena vakaraitaka na Nona loloma tawayalani vei iko, kei na Nona nuitaki iko vakataucoko. O Koya ena tukuna vei iko ni o rawa ni cakava na veika oqo. O rawa ni tara cake edua na bula rekitaki, ka marautaki baleta ni o Jisu Karisito e nomu kaukauwa. E rawa ni o kunea na nuidei, sautu, taqomaki, marau, kei na okati eke kei na tawamudu, baleta ni o na kunei ira kece vei Jisu Karisito, ena Nona kosipeli, ena Nona Lotu.

Ena veika oqo au cavuta kina na noqui vakadinadina bibi niu dua na iApositolo ni Turaga o Jisu Karisito ka laiva vei kemuni na noqu veivakalougatataki kei na vakavinavinaka kei na loloma titobu, ena yacai Jisu Karisito, emeni.

iDusidusi

1. Luke 5:10; 8:50; 12:7; Vunau kei na Veiyalayalati 38:15; 50:41; 98:1.

2. Vunau kei na Veiyalayalati 6:36.

3. Maciu 14:27; Joni 16:33; Vunau kei na Veiyalayalati 61:36; 68:6; 78:18.

4. Joni 14:1, 27.

5. Raica na Maciu 11:28–30.

6. Raica na Vunau kei na Veiyalayalati 84:38.

7. O na rawa ni tukuna ni ituvatuva nei Tamada a caka me vakatara vei iko mo vakaraitaka na nomu gagadre ena nomu digidigi, mo rawa ni ciqoma kina na vua ni ka taucoko o gadreva. Me vaka e vakatavulica o Elder Dale G. Renlund, “Na lalawa vakaitubutubu nei Tamada Vakalomalagi e sega ni nodra cakava na Luvena na ka e dodonu; ia mera digitaka na ka dodonu ka mera yaco mera vakataki Koya” (“Moni Digitaki Koya Edaidai,” Liaona, Nove. 2018, 104).

8. Raica na 2 Nifai 2:26–27.

9. 1 Korinica 13:12.

10. Raica na Aisea 5:20.

11. Joni 14:6.

12. Raica na Aisea 40:29–31.

13. Ni da Yalododonu Edaidai, eda dau kilai vakavuqa ena ka eda cakava kei na ka eda sega ni dau cakava—na noda itovo. Oqo e rawa ni vinaka, ia ena vinaka sara meda kilai ena vuku ni ka eda kila (na dina ka vakauqeta na noda itovo) kei o cei eda kila (na iVakabula—kei na sala e veivakayarayarataki kina ki na noda itovo na noda lomani Koya).

14. Russell M. Nelson, “iVakatakila ki na Lotu, iVakatakila ki na Noda Bula,” Liaona, Me 2018, 96.

15. Raica na Russell M. Nelson, “Rogoci Koya,” Liaona, Me 2020, 88–92.

16. Na vakayagataki ni ivakarau ka yavutaki ena ivakavuvuli ni Me iSakisaki ni iTabagone e salavata tiko kei na veika se qai tavoci tikoga oqo mai na Lotu ni iVakabula, oka kina na Vunautaka na Noqu Kosipeli, veiqaravi, na lewenivuli tokoni e vale na Lako Mai, Mo Muri Au, na parokaramu ni Gonelalai kei na iTabagone, Veivakatavulici ena iVakarau ni iVakabula, kei na iVoladusidusi Raraba vou. E matata, ni Turaga e vakalevutaka tiko na noda noke vakayalo. E vakaraitaka tiko o Koya na levu ni Nona nuitaki ira na Nona tamata ni veiyalayalati ena iotioti ni gauna oqo.

17. Nodra iVakavuvuli na Peresitedi ni Lotu: Josefa Simici [2007], 284.

18. Mosaia 4:29. Ena dua na yasana, oqo na ka era a via cakava na Farisi ena gauna i Jisu. Ena nodra igu mera tarova na tamata mai na nodra voroka na ivunau, era a vakasokomuna kina e drau na lawa ka yavutaki mai na nodra kila na veika tabu e volai. Na ka era cala kina na Farisi oya nira nanuma ni nodra lawa ena vakabulai ira. Ia, ni basika na iVakabula, era a sega ni kilai Koya.

19. Mosaia 4:30; vakamatatataki.

20. Edua tale na vuna e gadrevi kina ni kua na ivakarau ka yavutaki ena ivakavuvuli sai koya na levu ni duidui ni itovo vakamatamata ena Lotu ni Turaga. Na iVakavuvuli era sa tawamudu ka vakayagataki raraba. Na veilawa vakatabakidua se na kena vakayagataki na ivakavuvuli oqori e cakacaka vinaka ena so na vanua ka sega ena so tale. Na ka e umani keda vata sai Jisu Karisito kei na dina tawamudu e vakatavulica o Koya, kevaka mada ga e duidui na kena ivakavakayagataki ena toso ni gauna kei na veimatatamata. O koya gona na leqa ena kena lisitaki na veika me caka kei koya me kua e baleta ni sega ni rawa ni vakayagataki ka maroroi tiko. Na leqa sai koya ni vagolea tani na noda vakanamata mai na iVurevure dina ni noda kaukauwa, ko Jisu Karisito, na noda iVakabula.

21. Ena vuqa na yabaki sa oti, E a cavuta kina o Peresitedi Boyd K. Packer na veivosa mana oqo: “Na ivunau dina, ni kilai, ena veisautaka na ivakarau ni bula kei na itovo. Na vulici ni ivunau ni kosipeli ena vakavinakataka cake vakatotolo na itovo mai na kena vulici na itovo me vakavinakataka na itovo” (“Do Not Fear,” Liahona, Me 2004, 79).

    E vakavulica o Peresitedi Ezra Taft Benson edua na dina ka tautauvata: “Na Turaga e dau cakacaka mai loma ki tuba. Na vuravura e dau cakacaka mai tuba ki loma. … Na vuravura ena veisautaka na itovo ni tamata, ia o Karisito e rawa ni veisautaka na ituvaki ni tamata.”(“Born of God,” Ensign, Nove. 1985, 6).

    Ni raica o Alama na parofita ni Vola i Momani na ca e vuravura ni wavoliti koya tu, e a vuki ki na vosa ni Kalou baleta ni kila “ni sa kaukauwa sara na vosa ni Kalou ki na nodra vakanananu na tamata ka mucu na iseleiwau, se dua tale na ka e sa yaco vei ira—o koya e sa nanuma kina ko Alama ni sa kilikili [me] vakatovolea na kena mana na vosa ni Kalou” (Alama 31:5).

22. Russell M. Nelson, “Me Qaqa Ga na Kalou,” Liaona, Nove. 2020, 94. O Peresitedi Nelson, e vakaraitaka vakaoqo ena nona vakatavulica vei keda me baleta na rokovi ni Siga ni Vakacecegu: “Niu se cauravou, au dau vakadikeva na nodra cakacaka eso era vola na ituvatuva ni veika me ra cakava kei na veika me ra kakua ni cakava ena Siga ni Vakacecegu. E muri, au sa qai kila rawa mai na ivolanikalou ni noqu cakacaka kei na itovo ena Siga ni Vakacecegu sa ivakatakilakila baleti au kei na Tamaqu Vakalomalagi. Ena kila oqori, sa sega tale ni gadrevi meu vola na veika meu cakava se kua. Ni gauna meu vakatulewa kina se vinaka se ca edua na itavi ena Siga ni Vakacecegu, au sa tarogi au ga, ‘Na ivakatakilakila cava meu vakaraitaka vua na Kalou?’ Na taro oya e vakamatatataka vakavinaka na noqu digidigi baleta na Siga ni Vakacecegu ” (“Me ka Rekitaki na Siga ni Vakacecegu,” Liaona, Me 2015,130).

23. O Elder David A. Bednar e vakatavulica ni “ivakavuvuli ni bula savasava … e vukei keda talega meda rai sivita na noda nanamaki yadua kei na gagadre ni nanumi koya vakai koya ena kena vakarautaki na rai vakamareqeti ni dina tawamudu ena noda lako curuma na veituvaki duidui, ibolebole, vakatulewa kei na veika sotavi ena bula vakayago” (“Na iVakavuvuli ni Noqu Kosipeli,” Liaona, Me 2021, 123–24).

24. Luke 18:22.