Na iSala Vakaiukuuku mei Sosomi ni Dravusa: Na Salatu Veivakabulai ni Veivosoti
Nio bula voli ena sala, mo solia na nomu ukuuku me sosomi ni dravusa ni nomu bula sa cakacaka ga ni vakabauta e muria ga na ivakaraitaki cecere ni iVakabula.
Na ivola i Samuela e oka kina na italanoa i Tevita, mena tui i Isireli, kei na dua na marama o Apikali.
Ni sa mate o Samuela, sa lako tani o Tevita kei ira na nona tamata mai vei Tui Saula ka via vakamatei Tevita. Era lai vakatawa manumanu ka qarava e dua na tamata vutuniyau na yacana o Nepali, a tamata yaloca. A tala o Tevita e tini na nona tamata mera lai lagiti koya ka kerea mai na kakana kei na iyau e gadrevi.
A vosacataka o Nepali na kerekere i Tevita ka vagolei ira tani mai na nona tamata ena ligalala.
A cudru o Tevita, ka vakarautaki ira nona tamata mera lai vorati Nepali kei na nona tamata ka kaya, “Sa vukica vei au me isau ni ka vinaka.”1 E dua na dauveiqaravi a kaya vei Apikali, na wati Nepali, nio watina a cudruvi ira na tamata i Tevita. A komuna totolo sara o Apikali na kakana veiganiti kei na iyaya me lai veitavaki.
Ni sa sotavi koya o Apikali, sa “cuva vakatoboicu ena matai Tevita ka cuva sobu kina qele,
“Ka cuva kina yavana ka kaya, Me saumi vei au, noqu turaga, na ka ca. …
“Ia oqo, … ni sa tarovi kemuni o Jiova moni kua ni lako yani me ia na veivakamatei, kei na sauma na ca sa caka vei kemuni ena ligamuni. …
“… Ia na ka ni loloma oqo au sa kauta mai na nomuni vada vei kemuni, me soli vei ira na cauravou. …
“Mo ni kakua mada ni cudruva na noqu cala na nomuni vada. …
“ A sa kaya ko Tevita vei Apikali, Me vakavinavinakataki ko Jiova na nodra Kalou na Isireli, o koya ka talai iko mai edaidai mo tavaki au:
“Ia me vakavinavinakataki na nomu vuku, ia mo kalougata ko iko ka tarovi au edaidai meu kakua ni ia na veivakamatei, ka sauma na ca sa caka vei au. …
“A sa taura ko Tevita mai vua na ka sa kauta mai, a sa kaya vua, Mo lako cake ena vakacegu ki na nomu vale; … au sa vakarorogo ki na nomu vosa, ka vinakati iko.”2
Rau sa qai dui lako ena vakacegu.
Ena talanoa oqo, e raici eke o Apikali ni sa dua na mataqali se vakatakilakila kaukauwa i Jisu Karisito.3 Mai na Nona solibula veisorovaki, sa rawa me sereki keda mai na ivalavala ca kei na icolacola ni yalobibi ka vakarautaka na veivuke eda gadreva.4
Ni sa lewa ga o Apikali me taura na ivalavala ca i Nepali, sa vakakina na iVakabula—ena sala e tawa vakamacalataki rawa—a taura Vua na noda ivalavala ca kei na nodra era cata se cudruvi keda.5 Mai Kecisemani vakakina ena kauveilatai, a taura o Koya na ivalavala ca oqo. A vakarautaka na sala vei keda meda kauta laivi na yalo me sauma na ca. Ena “sala” oqo meda na veivosoti ga—ni rawa oqo me dua na ka dredre duadua eda rawa ni cakava ka dua na ka vakalou cecere sara eda bau sotava. Ena salatu ni veivosoti, na kaukauwa ni veisorovaki i Jisu Karisito ena drodrova na noda bula ka tekivuna me vakabula na kavoro titobu ni yalo kei na bula.
E vakavulica o Peresitedi Russell M. Nelson ni iVakabula sa solia vei keda na yalo meda veivosoti:
“Mai na Nona Veisorovaki tawamudu, sa rawa mo vosoti ira na vakamavoataki iko kei ira era na sega ni kauwaitaka na nodra vakacacani iko.
“Sa dau rawarawa mo vosota e dua sa yalodina ka yalomalua me kerea na nomu veivosoti. Ia na iVakabula ena solia vei iko na yalo mo vosota e dua e vakacacani iko ena sala cava ga. Ia na nodra ivalavala veivakamavoataki ena sega tale ni vakacacana na yalomu.”6
Na kau magiti mai i Apikali kei na iyau levu e vakavulica vei keda ni iVakabula sa solia vei ira sa mavoa ka lolosi, na veitokoni kei na veivukei eda gadreva meda vakabulai ka vakataucokotaki.7 Eda sega ni biu tu meda valuta vaka ikeda na revurevu ca ni tamata; sa rawa talega meda vakataucokotaki ka soli na madigi meda vakabulai mai na bibi ni yalo luluqa kei na ivakarau e rawa ni yaco tale.
A kaya kina na Turaga: “Koi Au na Turaga, au na vosoti ira ga au via vosota, ia koi kemudou sa gadrevi mo dou vosota na tamata kecega.”8 Sa gadrevi keda na Turaga meda veivosoti meda bula kina.9 Ia a sega ni kerea meda cakava ke sega na Nona veivuke, Nona loloma, Nona kila. Ena noda veiyalayalati kei na Turaga, sa rawa meda ciqoma yadua na kaukauwa, veidusimaki qaqaco, kei na veivuke eda gadreva meda veivosoti ka vosoti talega.
Yalovinaka mo kila nio vosota e dua e sega ni kena ibalebale mo na dau vakatara tiko mona vakamavoataki. “Eda na cakacakataka meda vosota e dua ka vakauqeti tikoga ena Yalo meda lako tani maivei ira oqo.”10
Me vakataki Apikali a vukei Tevita me na kakua ni “ca kina na lomana”11 ka ciqoma na veivuke a gadreva, ka vukei iko kina na iVakabula. E lomani iko, ka na sotavi iko ena nomu salatu ena “veivakabulai ena kauta lako ena Tabana.”12 E gadreva nomu vakacegu.
Au sa sotava vakaidina na cakamana i Karisito a vakabula na yaloqu sa luluqa. Ena veivakadonui i tamaqu, au wasea eke noqu tubucake ena itikotiko au a sega ni taqomaki kina baleta na veivakacacani i yaloqu kei na vosa ca. Ena veiyabaki ni noqu tabagone ka qase cake, au a daucati tamaqu ka cudru na yaloqu mai na mavoa oya.
Ni toso na yabaki kei na noqu sasaga meu kune vakacegu ka vakabulai ena salatu ni veivosoti, au a kila rawa ena sala cecere ni Luveni Kalou a sorovaka na noda ivalavala ca, o Koya vaka ga na Dauveivueti ena vakabulai ira era a vakamavoataki au vakaca. Au a sega ni vakabauta sara na imatai ni dina ke sega niu vakabauta na kena ikarua.
Ni tubucake tiko noqu lomana na iVakabula, sa vakakina noqu gadreva meu sosomitaka na mavoa kei na cudru ena Nona veivakabulai. Sa vakayacori tiko mai ena vuqa na yabaki, gadrevi kina na yaloqaqa, yalovata, gugumatua, ka vulica ka nuitaka na kaukauwa vakalou ni iVakabula me veimaroroi ka veivakabulai. Se vo tiko na noqu cakacaka, ia na yaloqu sa sega tale ni via veivala. Sa soli vei au “na yalo vou”13—na kena vakilai na loloma titobu ni veivakabulai ni iVakabula, a tiko e yasaqu, a liutaki au vakamalua kei na veivosoti kina vanua e vinaka cake, a tagi vata kei au, ka kila na noqu rarawa.
Na Turaga sa solia mai vei au na kalougata veisosomitaki me vaka a kauta mai o Apikali a gadreva o Tevita. Sa talai ira mai na dauveituberi kina noqu bula. Na kena kamica ka veivakavoutaki cecere duadua oya na noqu veiwekani kei na Tamaqu Vakalomalagi. Mai Vua ga, au sa kila ena marau na loloma vinaka, veitaqomaki, ka veidusimaki ni Tamada sa uasivi sara.
E kaya o Elder Richard G. Scott: “E sega ni rawa mo bokoca na ka sa yaco, ia sa rawa mo veivosoti.14 Na veivosoti e walia na mavoa ca, ka rerevaki, ni na vakatara na loloma ni Kalou me savata laivi na yalomu kei na vakasama gaga ni veicacati. E savata laivi na vakasama ni gagadre mo sauma lesu ena ca. Sa yaco rawa kina na loloma savasava, veivakabulai, kei na veivakavoui ni Turaga.”15
O tamaqu vakayago a yaco talega vua na veisau ni yalo mana ena veiyabaki sa oti ka sa lesu vua na Turaga—na kena au a sega ni nanuma me yaco ena bula oqo. Dua tale na ivakadinadina vei au oya na kaukauwa taucoko ni veivakavoui i Jisu Karisito.
Au kila ni sa rawa Vua me vakabula na tamata ca kei ira sa vakacacataki. O Koya na iVakabula ka Dauveivueti kei vuravura, sa solia na Nona bula meda bula tale. A kaya: “Sa tu vei au na Yalo i Jiova, ni sa lumuti au ko koya meu vunautaka na itukutuku vinaka vei ira era sa dravudravua; ka talai au meu vakabulai ira sa yalorarawa, meu vunautaka na sereki vei ira na bobula, kei na rai tale vei ira sa mataboko, meu vagalalataki ira era sa mavoa16
Vei kemuni sa yalorarawa, vesuki tu, mavoa, se mataboko beka mai na mosi se ivalavala ca, o Koya ena veivakabulai, veivueti, ka veisereki. Au vakadinadinataka ni ka dina na veivakabulai kei na veivagalalataki. Na gauna donu ni veivakabulai oqo sa dui noda ga, me kua nida vakalewa na gauna donu ni dua tale. Sa ka bibi meda vakatara na gauna ni noda vakabulai ka meda lomani keda tiko ena kena cakacakataki tiko. Na iVakabula sa dau loloma ka veikauwaitaki tu ga, ka tu vakarau me vakarautaka na veivuke eda gadreva.17
Ena salatu ni veivosoti kei na veivakabulai eda na digitaka meda kakua ni tosoya na ivalavala se veimaliwai sa tawakilikili ena noda vuvale se vanua cava ga. Ena veika kece eda na veivakauqeti kina, meda na lomavinaka sega ni yaloca, loloma sega ni veicati, yalomalua sega ni cudrucudru, veitaqomaki sega ni nuiqawaqawa, ka vakacegu sega ni veicacati.
Mo solia na ka a bureitaki vei iko sa tiki kaukauwa vakalou ni veivakabulai e rawa ga ena vakabauti Jisu Karisito. Nio bula voli ena daulomasoli, me vaka a kaya o Aisea, ukuuku me sosomi ni dravusa ni nomu bula18 sa cakacaka ga ni vakabauta e muria ga na ivakaraitaki cecere ni iVakabula a vakararawataki vakataucoko me Vukei keda kece.
O Josefa mai Ijipita a bula voli ena dravusa. A ratou cati koya na tacina, lawakitaki, volitaki me bobula, vesuki cala, ka guilecavi maivua e dua a yalataka me veivuke. Ia a nuitaka ga na Turaga. “A sa tiko kei Josefa ko Jiova”19 ka vakatabuya na nona vakatovolei me nona kalougata ka tubu kina—ka vakabulai kina na nona vuvale kei Ijipita taucoko.
Ni ratou sota o Josefa kei ratou na tacina ni sa iliuliu qaqa e Ijipita, na nona veivosoti kei na matata ni nona vakasama a laurai ena nona vosa loloma:
“Mo dou kakua ni rarawa, se veicudruvi vakai kemudou, ni dou a volitaki au ki ke: ni sa talai au na Kalou meu liutaki kemudou, me ia na veivakabulai.
“Ia oqo, dou sa sega ni talai au mai ki ke, na Kalou ga.”20
Mai vua na iVakabula, na bula i Josefa sa yaco me “ukuuku me isosomi ni dravusa”21
A kaya kina o Kevin J. Worthen, peresitedi ni BYU, ni Kalou “e rawa ni kauta mai na vinaka … sega ga ena noda rawa-ka ia mai na noda druka talega kei na nodra druka eso era vakayalorarawataki keda. Na Kalou sa i koya na vinaka kei na kaukauwa oya.”22
Au vakadinata ni ivakaraitaki cecere duadua ni loloma kei na veivosoti sai noda iVakabula, o Jisu Karisito, ena nona rarawa vutugu a kaya, “I Tamaqu, kakua ni cudruvi ira; ni ra sa sega ni kila na ka era sa kitaka.”23
Au kila ni Tamada mai Lomalagi sa gadreva mera vinaka ka nuidei na Luvena yadua. Ena Jeremaia eda wilika, “Niu sa kila koi au na nanuma ni yaloqu e na vukumudou, sa kaya ko Jiova, na nanuma mo dou vinaka.”24
O Jisu Karisito sa nomu Mesaia, na nomu Dauveivueti ka iVakabula, sa kila o koya na gagadre ni yalomu. Sa gadreva mo vakabulai ka bula marau. E lomani iko. E tagi vata kei iko nio rarawa ka reki kei iko mo taucoko kina. Me sa qai yaloda ka taura na ligana sa dauloloma sa dau dodoliga tu ga mai,25 ni da lakova na salatu veivakabulai ni veivosoti sa noqu masu oqo ena yaca i Jisu Karisito, emeni.