iTukutuku ni Lotu
Era Veiqaravi na iLiuliu ni Lotu ena Vuqa na Matanitu
Era tomana na iliuliu ni Lotu na nodra veiqaravi e vuravura raraba ena ono na vula sa oti. Oqo eso na idivi ni nodra qaravitavi e vuqa ni oti na koniferedi raraba eliu.
A Vakananuma o Peresitedi Oaks na Nodra Veivakayarayarataki na Marama
Ena dua na vidio ni Lotu ka vakaraitaki ena Sepiteba, a tukuna kina o Peresitedi Dallin H. Oaks, na Matai ni Daunivakasala ena Mataveiliutaki Taumada, ni a vukei koya na veivakayarayarataki i tinana kei buna ena taraicake ni nona vakadinadina kei na vakabauta na Turaga. A tomani tu na veivakayarayarataki ni marama ena nona bula mai vua na watina, o Sisita June Oaks, ka ni sa mate oti, vata kei watina, o Sister Kristen Oaks.
“O ira na qasenivuli bibi duadua au a donuya ena yasa ni vakavuvuli ni Lotu kei na veiqaravi kei na itavi vakamatavuvale—era toka ecake sara vata kei ira na parofita ni Lotu—era sa marama,” a kaya o Peresitedi Oaks.
Vosa vei ira na iSenivalu o Elder Uchtdorf
A gole i Poladi ena Epereli o Elder Dieter F. Uchtdorf ena Kuoramu ni Apositolo Le Tinikarua. A vakatulewataka o koya e dua na lotu me baleti ira na isenivalu e Ukraine ka ra sa vakarurugi tu vakawawa ekea.
Ena veisiko oya, a kaya o Elder Uchtdorf, ka a isenivalu tu ena nona bula taumada, ni sa vakasinaiti na lomana ena “rarawa bibi ni nodra vakalolomataki” na Yalododonu Edaidai kei ira tale eso ena veimatanitu vakacacani ena ivalu ia ena vakavinavinaka talega.
“Era sa vaqaqacotaki ka laveti keda cake na tamata yadua kei na matavuvale oqo ena nodra yalovinaka, veivakabauti, kei na vakabauta na iVakabula kei na Nona inaki vakalou,” a kaya o koya. “Au a nuitaka tu kei Harriet me keirau veivakaukauwataki ka veivakacegui vei ira, ia era a vakavure rarama, inuinui, kei na vakacegu vakalomalagi ki na lomai keirau.”
A vosa o Elder Bednar ki na National Press Club e Washington, D.C.
A vosa ki na National Press Club ena Me o Elder David A. Bednar ena Kuoramu ni Apositolo Le Tinikarua, ena vakamacalataki ni cava kei na vuna ena itavi eso ni veiqaravi raraba, welefea, ka ni vuli, valetabu, kaulotu, kei na tuva kawa ni Lotu i Jisu Karisito.
“Na inaki taumada ni Lotu i Jisu Karisito ni Yalododonu Edaidai o ya na vukei ni tamata mera vulica na ituvaki kei na itovo ni Kalou, me ra lomana na Kalou, me ra yaco me tisaipeli ni Luvena, o Jisu Karisito, ka lomani ka qaravi ira na tacida kei na ganeda,” a kaya o Elder Bednar.
Era Sikova na Ceva kei Amerika na Peresitedi Raraba ni Soqosoqo ni Veivukei kei na Lalai
Peresitedi Camille N. Johnson, na Peresitedi Raraba ni Soqosoqo ni Veivukei, kei Peresitedi Susan H. Porter, na Peresitedi Raraba ni Lalai, a sotavi ira na iliuliu vakamatanitu kei na lewe ni Lotu e Argentina, Chile, Uruguay, kei Paraguay ena 10 na siga ni veiqaravi kei na veisikovi.
Rau a sotava na mataisoqosoqo eso ni matanitu ka vukei ira na marama sotavi dredre tu e Paraguay kei Argentina.
“Sa nanamaki tu na Lotu me cakacaka vata kei kemuni ena vakavinakataki ni madigi eso ni vuli kei na bula rawati koya me baleti ira na marama,” a kaya o Peresitedi Johnson.
Me ikuri ni veitaratara vakamatanitu, a veiqaravi talega o Peresitedi Johnson kei Porter vei ira na lewe ni Lotu. Rau vakayaco soqo tu kei ira na itubutubu gone, dua na lotu me baleti ira na marama sega ni vakawati, soqoni veisemati ni matavuvale era tiko kina na gone, kei na nodra tuberi na iliuliu ni vavakoso.