Na Siga Oqo
Na noda parofita sa cakava tiko na nona itavi me luvuca na vuravura ena iVola i Momani. Sa dodonu meda muri koya.
Kemuni na taciqu kei na ganequ lomani, ena iVola i Momani na malanivosa “na siga oqo”1 e vakayagataki kina vakalevu me vagoleya na vakasama kina ivakasala, na yalayala, kei na ivakavuvuli. Na Tui o Penijamini ena iotioti ni nona vosa, a vakasalataki ira na tamata, “Oi kemuni ka rogoca rawa na noqu vosa kau na vosataka vei kemuni edaidai; … ka dolava sara na daligamuni mo ni rogoca, kei na lomamuni moni kila, kei na nomuni vakasama me tevuki kina mo ni raica na veika vuni ni Kalou.2 Na koniferedi raraba e dua na mataqali gauna vata vakaoya. Eda lako mai me rogoca na ivakasala me baleta na “siga oqo,” me rawa kina nida “tamata dina ena veigauna kecega”3 vua na Turaga kei na Nona kosipeli. E luvuci au tu ena “siga oqo” na bibi ni noda vakavouya na noda yalayala kina iVola i Momani, ka vakatoka o Josefa Simici “na ivola dodonu duadua mai vei ira kece na ivola e vuravura.”4
Au taura tu i ligaqu e dua na ilavelave ni iVola i Momani. Oqo na noqu ilavelave cecere duadua ni 1970, au dau vakamareqeta sara. Ena kena irairai sa oca ka makawa mai, ia e sega tale ni dua na ivola e bibi cake ena noqu bula kei na noqu ivakadinadina me vakaoqo. Niu wilika au rawata kina e dua na ivakadinadina bula mai na Yalo nio Jisu Karisito na Luve ni Kalou,5 o Koya na noqu iVakabula,6 na ivolanikalou oqo na vosa ni Kalou, 7 ka ni sa vakalesui mai na kosipeli.8 Na dina eso oqori e dei titobu tu e yaloqu. Me vaka e kaya na parofita o Nifai, “Sa dau rekitaka na yaloqu na veika ni Turaga.”9
iMawi ki na iMatau: Elder Ronald A. Rasband, daukaulotu cauravou; Peresitedi Harold Wilkinson, peresitedi ni tabana ni kaulotu ena Eastern States; kei Elder Marion D. Hanks, Vitusagavulu Vakaitutu Raraba.
Oqo na kena italanoa. Niu se daukaulotu cauravou, au a tugana na ivakasala i Elder Marion D. Hanks, ka a sikovi keimami yani kina Tabana ni Kaulotu ena Eastern States. O koya a peresitedi e liu ni Tabana ni Kaulotu e Peritania, ka rua na nona daukaulotu erau dabe toka yani ena tavata ena siga oqo: koi rau noqu iTokani lomani Elder Jeffrey R. Holland kei Elder Quentin L. Cook.1011 Me vaka ga vei ira na nona daukaulotu e Igiladi, a bolei keimami o koya me keimami wilika e dua na ilavelave ni iVola i Momani sega ni makataki, me vakarua kevaka e lailai. Au a ciqoma na bolebole oya. Ena imatai ni wiliwili meu makataka se lainitaka na veika kece e dusia se vakadinadinataki Jisu Karisito. Au vakayagataka e dua na penikau damudamu ka lainitaka e levu sara na malanivosa. Ena ikarua ni gauna, a kaya o Elder Hanks me makataki na ivakavuvuli tudei kei na ivunau ni kosipeli, ena gauna oqo au vakayagataka na karakarawa me makataki kina na ivolanikalou. Au wilika vakarua na iVola i Momani, me vaka na vakatutu, qai vakarua tale, ka vakayagataki kina na dromodromo kei na loaloa me makataki kina na malanivosa e lauti au.12 Me vaka oni na raica, au a vola e levu sara na idusidusi.
E levu cake sara na ka ena noqu wiliwili mai na kena makataki walega na ivolanikalou. Ena wiliwili yadua ni iVola i Momani, mai liu yaco imuri, au a vakasinaiti ena loloma cecere vua na Turaga. Au a vakila e dua na ivakadinadina bula titobu me baleta na dina ni Nona ivakavuvuli kei na kena yaga ena “siga oqo.” Na ivola oqo erau veiganiti vinaka sara kei na yacana, “E Dua Tale na iVakadinadina kei Jisu Karisito.”12 Ena vuli oya kei na ivakadinadina bula vakayalo a ciqomi, sa yaco meu dua na daukaulotu ni iVola i Momani ka tisaipeli i Jisu Karisito.14
“Ena siga oqo,” e dua na daukaulotu cecere ni iVola i Momani o Peresitedi Russell M. Nelson. Ni se qai kacivi vou me iApositolo, a veivakavulici tiko mai Accra, Ghana.14 Era tiko kina na vakaitutu lelevu eso, oka kina na tui ni dua na yavusa mai Aferika, ka rau veivosaki ena nona veivuke e dua na dauvakadewavosa. Na tui e dua na gonevuli vinaka ni iVolatabu ka dau lomana na Turaga. Ni oti na nona vosa, a lako mai vua na tui, ka taroga ena vosa vakavalagi matata sara, “O cei sara mada o iko?” E vakamacalataka o Peresitedi Nelson ni o koya e “dua na iApositolo tabaki i Jisu Karisito.”15 E taroga na tui, “Na cava e rawa nio vakavulica vei au baleti Jisu Karisito?”16
A taura na iVola i Momani o Peresitedi Nelson ka cega ki na 3 Nifai 11. Erau qai wilika vata o Peresitedi Nelson kei na tui na nona vunau na iVakabula vei ira na Nifaiti: “Raica koi Au ko Jisu Karisito, ka ra a vakadinadinataka na parofita ni na lako mai ki vuravura. … Koi au na rarama kei na vu-ni-bula kei vuravura.”17
A qai solia o Peresitedi Nelson na ilavelave ni iVola i Momani oya vua na tui, ka qai cavuta kina vaqo vua na tui, “A rawa mo solia vei au na daimani kei na rupi, ia e sega na ka me talei cake vei au me vaka na ikuri ni kilaka oqo me baleta na Turaga ko Jisu Karisito.”18
Oqo e sega ni ivakaraitaki duadua ni ivakarau e dau wasea kina na iVola i Momani na noda parofita lomani. Sa solia oti o koya na ilavelave eso ni iVola i Momani vei ira e drau vakadrau na tamata, ka tu kina na nona ivakadinadina bula i Jisu Karisito. Ni dau sotavi ira na vulagi, peresitedi, tui, na iliuliu ni veivanua, iliuliu ni bisinisi kei na veisoqosoqo kei ira veimatavakabauta duidui, se ena itikotiko liu ni Lotu se ena nodra veivanua, e dau solia ena yalovakarokoroko na ivola ni ivolanikalou vakatakilai oqo. E rawa ni solia vei ira o koya e levu sara na ka ena ioloolo vakareveni ka rawa ni lai dabe toka ena teveli se desi se ena kovate me ivakananumi ni nona veisiko. Ia, e solia ga na ka talei duadua vua, ka uasivia sara na rupi kei na daimani, me vaka e vakamacalataka na tui ni yavusa oya.
“Na dina ena iVola i Momani,” e kaya o Peresitedi Nelson, “sa tu kina na mana me veivakabulai, veivakacegui, veivakalesui, veivakaukauwataki, veivaqaqacotaki, veikaroni, ka vakamarautaka na yaloda.”19 Au sa sarava oti na kena sa kukuvi matua e ligadra era a ciqoma mai vua na noda parofita ni Kalou na ilavelave eso ni iVola i Momani. E sega tale ni dua na iloloma cecere cake.
Ena dua na gauna wale ga oqo erau a sota kei na marama liu mai Gambia ena nona valenivolavola ka solia vua e dua na iVola i Momani. Sega ni oti ga e kea. A cega na veitabana me wiliwili vata kaya, me vakavulica ka vakadinadinataki Jisu Karisito, na Nona Veisorovaki, kei na Nona loloma ena vukudra kece na Luvena.
Na noda parofita sa cakava tiko na nona itavi me luvuca na vuravura ena iVola i Momani.20 Ia ena sega ni rawa ni dolava duadua ga na isogo ni waluvu. Sa dodonu meda muria na nona ivakaraitaki.
Niu vakauqeti ena nona ivakaraitaki, au sa tovolea tiko meu wasea ena vakarokoroko kei na gumatua na iVola i Momani.
Ena dua na gauna walega qo au a tiko ena dua na ilesilesi i Mozambique. Era saga bula tiko na lewe ni vanua totoka oqo ena vuku ni bula dravudravua, tauvimate, sega ni cakacaka, na cava, kei na draki veilecayaki vakapolitiki. A ka dokai me keirau sota kei na peresitedi ni vanua oya, o Filipe Nyuse. Ena nona kerekere, au a masulaki koya kei na nona vanua, au tukuna vua nida tara tiko e dua na valetabu i Jisu Karisito21 ena nona vanua. Ni oti na neirau veitalanoa au a solia vua e dua na ilavelave ni iVola i Momani ena vosa vaka-Potukali, na vosa ni nona vanua. Ni ciqoma na ivola ena vakavinavinaka, au vakadinadinataka na inuinui kei na yalayala me baleti ira na nona tamata, ka kunei ena vosa ni Turaga ena veitabana.22
Ena dua tale na gauna, o au kei na watiqu, o Melanie, keitou a sota kei rau na Tui kei Ranadi Letsie III mai Lesotho ena nodrau itikotiko.23 Vei keirau, na ituvuka ni neirau veisiko sai koya na neirau solia vei rau e dua na ilavelave ni iVola i Momani kau qai wasea na noqu ivakadinadina. Niu railesuva na ka oya kei na so tale, e votu mai noqu vakasama e dua na tiki ni ivolanikalou ni gauna oqo: “Io na taucoko ni noqu kosipeli mera na vunautaka yani o ira na malumalumu kei na tamata wale kina iyalayala kei vuravura vei ira na tui kei ira na iliuliu.”24
Au sa wasea na iVola i Momani vua na Mata ni Idia o Pandey25 kina Veimatanitu Cokovata e Geneva kei na His Holiness Peteriaki Bartholomew26 ni Lotu Eastern Orthodox kei na vuqa tale. Au vakila na Yalo ni Turaga vei keimami niu solia yani vei ira na “vatuivakadei ni noda Lotu”27 ka wasea na noqu ivakadinadiina bula i Jisu Karisito, na vatunitutu ni noda vakabauta.28
E sega ni yaga mo lako sara i Mozambique se Idia se sotavi ira na tui kei na iliuliu mo solia na ivola ni ivakavuvuli tabu kei na yalayala oqo vua e dua. Au sureti iko, “ena siga oqo,” mo solia e dua na iVola i Momani vei ira na nomu itokani kei na matavuvale, nomu itokani e vanua ni cakacaka, nomu dauveivakatavulici ni soka, se o koya na dauvolitaki kakana ena makete. Era gadreva na vosa ni Turaga e tu ena ivola oqo. Era gadreva na isaunitaro ni bula e veisiga kei na bula tawamudu sa bera mai. E gadrevi mera kila na salatu ni veiyalayalati sa tevuki tu e matadra kei na loloma veivauci ni Turaga ena vukudra. Sa tu kece ena iVola i Momani.
Nio solia vei ira e dua na iVola i Momani o sa dolava tiko na nodra vakasama kei na yalodra ki na vosa ni Kalou. E sega ni gadrevi mo kauta voli kei iko na ilavelave tabaki ni ivola. E rawa ni o wasea ga mai na nomu talevoni veikauyaki mai na iwasewase ni ivolanikalou ena app ni Valenivola ni Kosipeli.29
Vakasamataki ira e rawa ni ra vakalougatataki mai na kosipeli ena nodra bula, qai vakauta vei ira e dua na ilavelave ni iVola i Momani mai na nomu talevoni. Nanuma mo okata kina na nomu ivakadinadina kei na sala sa vakalougatataka kina na nomu bula na ivola oqo.
Kemuni noqu itokani lomani, niu dua na iApositolo ni Turaga, au sa veisureti tale meda muria na noda parofita lomani, o Peresitedi Nelson, ena noda luvuci vuravura ena iVola i Momani. Sa cecere sara na gagadre; e gadrevi meda sa cakacaka saraga oqo. Au yalataka ni o ni sa vakaitavi tiko kina ena “cakacaka cecere duadua e vuravura na vakasokumuni Isireli”30 ni o vakauqeti mo dolele yani vei ira era sega tu ni “kila na ka dina nira sega ni kila na vanua mera vakasaqara kina.”31 Era gadreva na nomu ivakadinadina ena ivakarau sa veisautaka kina na ivola oqo na nomu bula ka kauti iko vakavoleka yani vua na Kalou, na Nona vakacegu,32 kei na Nona “irogorogo ni marau levu.”33
Au vakadinadinataka ena lewa vakalou sa vakarautaki mai kina na iVola i Momani e Amerika makawa me mai kacivaka na vosa ni Kalou, me kauta mai na yalo i Jisu Karisito kei na Nona kosipeli vakalesui mai ena “siga oqo.” Ena yacai Jisu Karisito, emeni.