2022
Yaloqaqa mo Tukuna na Dina
Noveba 2022
11:26

Yaloqaqa mo Tukuna na Dina

Mai vei Elder Denelson Silva

Ena Vitusagavulu

Gauna ga eda vulica kina na dina, na Turaga ena solia vei keda na madigi meda cakava na veika ena cakava o Koya ke tiko eke nikua.

Ena 1982, au a vakacavara tiko na noqu koroi ni topoqarafi ena koronivuli ni vuli cakacaka.

Ni sa cava na yabaki, a sureti au e dua na lewe ni kalasi me keirau veivosaki. Au nanuma kina na neirau a biuti ira na kalasi ka gole ki na dua na yasani rara ni qito. Ni keirau yaco kina, a kaya vei au na nona dina ena lotu, ka sega walega nona vakaraitaka vei au e dua na ivola, ia a qai solia mai na ivola. E dina, au a sega ni nanuma rawa na veika a tukuna, ia au nanuma vinaka tiko na gauna o ya kei na noqu vakila na veika a kaya, “Au via cavuta na noqu ivakadinadina vei iko ni ivola oqo e dina kei na kosipeli i Jisu Karisito sa vakalesuimai.”

Ni oti na neirau veivosaki, au a gole i vale, cega e vica na tabani ivola, ka biuta toka ena vata. Baleta ga ni sa cava tiko na yabaki ka sa iotioti ni yabaki ni noqu koroi ni topokarafi, au a sega sara ni kauwai vakalevu ki na ivola sega talega vei lewenikalasi a wasea vei au. Na yaca ni ivola ko ni sa rawa ni kila. Io, o ya na iVola i Momani.

Ni oti e lima na vula, rau a gole mai na daukaulotu ki noqu vale; ka rau sa biubiu tiko niu sa lesu mai na cakacaka Au a sureti rau lesu i loma. Keitou a dabe sara ena varada lailai e mata ni neitou vale, ka rau vakavulici au.

Niu vakasaqara na dina, au a tarogi rau na lotu cava e dina kei na sala meu kunea kina. Rau a vakavulici au na daukaulotu niu na kunea ga vakataki au na kena isau. Ena nanamaki levu kei na gagadre, au a ciqoma na nodrau ibolebole meu wilika e vica na wase mai na iVola i Momani. Au a masu ena yalodina kei na gagadre dina (raica na Moronai 10:4–5). Na isau ni noqu taro a matata sara, ni oti e vica na siga—o ya enai 1 ni Me, 1983—au a papitaiso ka vakadeitaki meu lewe ni Lotu i Jisu Karisito ni Yalododonu Edaidai.

Nikua, niu vakasamataka na veitaravi ni veika a yaco, au a raica vinaka sara na kena bibi nona a yaloqaqa o noqu lewenikalasi ni a cavuta nona ivakadinadina baleta na dina vakalesuimai ka solia vei au na ivakadinadina vakayago ni sa Vakalesuimai na kosipeli i Jisu Karisito, vakakina na iVola i Momani. Na kena dina, sa rui ka bibi sara vei au, ni a tauyavutaka e dua na kequ isema vei rau na daukaulotu nu a sotavi rau.

Na dina a vakaraitaki vei au, ni oti na noqu papitaiso, au sa yaco meu tisaipeli i Jisu Karisito. Ena veiyabaki a tarava, ena nodra veivuke eso na tamata vinaka me vakataki ira na iliuliu, qasenivuli, itokani, vakakina mai na noqu vuli lotu, au sa vulica niu sa vinakata meu tisaipeli i Jisu Karisito, kau sa ciqoma na itavi sega walega meu taqomaka na dina ia meu na kaburaka talega.

Ni da sa vakadonuya meda vakabauta na dina, ka muria, ka sasagataka meda sa tisaipeli i Jisu Karisito, eda na sega ni ciqoma e dua na setivikiti e vakadeitaka ni da na sega ni caka cala, ni da na sega ni vakalewai, ni da na sega ni temaki meda gole tani mai na dina, se eda na sega mada ga ni sotava na rarawa. Ia na kila na dina e vakavulica ni gauna eda curuma kina na sala qiqo ka rabalailai ena kauti keda lesu vei Tamada Vakalomalagi, ka na dau tiko na sala meda dro tani mai na leqa oqo (raica na 1 Korinica 10:13); ena dau yaco talega meda vakatitiqataka noda lomatarotaro ni bera ni da vakatitiqataka noda vakabauta (raica na Dieter F. Uchtdorf, “Mai, Tomani Keimami,” Liaona, Nove. 2013, 21); ka iotioti, eda sa vakadeitaki ni da na sega ni tiko duadua ni da lako curuma na rarawa, ni Kalou sa sikovi ira Nona tamata ena gauna ni nodra bula rarawa Mosaia 24:14).

Gauna ga eda vulica kina na dina, na Turaga ena solia vei keda na madigi meda cakava na veika ena cakava o Koya ke tiko eke nikua. E dina, sa vakaraitaka na Nona ivakavuvuli ena ka meda cakava: “Raica dou na lako yani ena kaukauwa ni noqu Yalotabu, ia dou na lakolako yarua yani ka vunautaka na noqu kosipeli, ena yacaqu, ka tabalaka cake na domomudou me vaka na rorogo ni davui, ka vunautaka na noqu vosa me vakataki ira na agilosi ni Kalou.” (Vunau kei na Veiyalayalati 42:6). Na madigi ni veiqaravi ni kaulotu vei ira noda itabagone sa cecere sara!

Yalovinaka, ra cauravou, kakua ni lokuyarataka na nomuni vakavakarau mo ni qarava na Turaga ena kaulotu. Ni ko sotava na ituvaki eso ena dredre kina nomu lewa mo laki kaulotu—me vakataka na vakataotaki ni nomu vuli, vakamoce vei nomu itau goneyalewa e sega kina na ivakadei ni ko na nona itau tikoga, se mo na lako tani mai na nomu cakacaka—nanuma na ivakaraitaki ni iVakabula. Ena Nona veiqaravi, a sotava talega na dredre, oka kina na vakalewai, vakacacani, ka yacova sara na bilo wiwi ni Nona solibula veisorovaki. Ia, na ituvaki cava ga e saga vakataucoko o Koya me vakayacora na lewa nei Tamana ka vakasuka me Nona na lagilagi. (Raica na Joni 5:30; 6:38–39; 3 Nifai 11:11; Vunau kei na Veiyalayalati 19:18–19.)

Kemuni na goneyalewa, o ni sa kidavaki mo ni cakacaka ena tabaniwere ni Turaga kevaka o ni gadreva, ena gauna o vakavakarautaki iko mo ni daukaulotu tudei, ko ni na sega talega ni vakuwai mai na ibolebole vata ga.

Kivei kemuni kece sa na qaravi Koya, au yalataka vei kemuni ni 24 se 18 na vula ni kaulotu ena takali ena vanua ni kaulotu me vaka ga ni na takali ni ko tiko e vale, ia na madigi sa waraki ira na cauravou kei na goneyalewa kilikili ni Lotu oqo ena vanua ni kaulotu sa cecere sara. Na madigi mo matataka na iVakabula o Jisu Karisito kei na Nona Lotu e sega ni rawa me vakawaleni. Na vakaitavi ena masumasu tawawili rawa, tara cake ka cavuta vakavica nomu ivakadinadina ena dua na siga, vulica ena vica vata na auwa na ivolanikalou, sotavi ira o na sega ni sotava kevaka mo a tiko ga e vale, era sa tawa vakamacalataki rawa. Na itagede vata ga ni kila sa maroroi me nodra na itabagone sa kacivi ira na Turaga mera veiqaravi ena kaulotu. O ni sa kidavaki ka gadrevi sara. Yalovinaka ni kakua ni vakaluluqataka na bibi ni kaulotu, ni veiqaravi ena kaulotu sa vakarautaka talega na sotavi ni veika cecere. “Sa ka talei ena mata ni Kalou na yalo ni tamata” (Doctrine and Covenants 18:10), oka kina na talei ni yalomu.

Ni ko sa lesu mai na kaulotu, ena rairai sa sega ni waraki iko tiko o nomu itau, ia ko sa na vulica vakavinaka mai na sala qaqa ni veivosaki. Na nomu vuli torocake ena vakaibalebale cake ena rai o sa cakava baleta na vakavakarau vakavinaka ki na vanua ni cakacaka, ka iotioti, ena yaco mo vakataucokotaki iko ni ko a kaburaka ena yaloqaqa na kosipeli ni sautu, ka vakadinadinataka na dina vakalesuimai.

Kivei kemuni o ni sa vakamau ena kena itagede duidui ni nomu bula, ko ni sa gadrevi ena cakacaka ni Turaga. Vakarautaki kemuni. Mo tiko bulabula, vakasaqara mo bula rawati iko vakayago ka vakayalo, baleta na madigi mo cakava na veika ena cakava na Turaga vei ira na Luvena e sega ni yalani ki na dua na tabayabaki ni bula. Na veika totoka dina keirau a sotava kei watiqu ena veiyabaki sa oti a yaco ni keirau a veiqaravi tiko vei ira na veiwatini digitaki, era veiqaravi tu ena veivanua digitaki, ka qaravi ira na tamata digitaki.

Na veika au a sotava ni oti na noqu koroi ni topokarafi au a vulica ni da na taqomaka tiko na dina ni da kaburaka yani ni taqomaki na dina sa dua na ka me vakaliuci. Na taqomaki ni dina me kakua ni caka ena veivakasaurarataki ia ena yalo dina me loloma, veiwasei, ka sureti ira na tamata eda sa soli ivakadinadina tiko kina baleta na dina, ka vakasamataka duadua ga na nodra bula vinaka vakayago ka vakayalo na luvena na Tamada Vakalomalagi dauloloma (raica na Mosaia 2:41).

Ena koniferedi raraba ni Okotova 2021, na noda parofita lomani o Peresitedi Russell M. Nelson a vakavulica ni so era saqata tiko, na kena tiko dina na ka e vakatokai na dodonu kei na cala. E tiko na dina uasivi—na dina tawamudu. Raica na “Dina Savasava, iVunau Savasava, kei na iVakatakila Savasava,” Liaona, Nove. 2021, 6.)

E vakatavulica vei keda na ivolanikalou ni “dina sai koya na kena kilai na veika ena kedra ituvaki ena gauna oqo, kei na kedra ituvaki ena veigauna sa oti, kei na kedra ituvaki ena veigauna e se bera mai” (Vunau kei na Veiyalayalati 93:24).

Na kilai ni veika dina e sega ni cakava meda vinaka cake mai vua e dua, ia e vakavulica na veika meda cakava meda lesu kina vua na Kalou.

Ni ko gu tudei tiko vei Karisito ka yaloqaqa sega walega mo tukuna na dina ia mo bulataka na dina, o na kunea na vakacegu kei na sautu ena gauna ni tavuki ni bula o na sotava ena gauna oqo.

Na ibolebole ni bula ena rawa ni da bale kina, ia mo kila ni gauna eda bulataka tiko na vakabauti Jisu Karisito, ena “lekaleka walega na gauna ni [noda] rarawa kei na vutugu” ni raici cecere yani veigauna tawamudu (Vunau kei na Veiyalayalati 121:7). Yalovinaka kakua ni yalana na siga mo tinia kina na nomu veika dredre kei na ibolebole. Nuitaka na Tamada Vakalomalagi, kakua ni guce, kevaka eda na soro, eda na sega ni kila rawa ena tini vakacava na noda ilakolako ena matanitu ni Kalou.

Taura matua tiko na dina, ka vuli mai na ivurevure ni dina:

Au sa vakadinadinataki Jisu Karisito ni oqo na Nona Lotu. E tiko na noda parofita bula, ka da dau yalo galala me da tukuna na dina ena yaloqaqa. Ena yacai Jisu Karisito, emeni.