E Dua na iTuvatuva ni iVakatakila ni Tamata Yadua

Mai vei Elder Dale G. Renlund

Ena Kuoramu ni Apositolo Le Tinikarua

Eda gadreva me kila vinaka na ituvatuva e dau cakacaka kina na Yalo Tabu. Ni da cakacaka ena loma ni ituvatuva oqori, na Yalo Tabu ena rawa ni tasereka mai na raititobu veivakurabuitaki.

Me vakataka e vuqa vei kemuni, au sa dau vakauqeti sara vakalevu mai vei Elder Dieter F. Uchtdorf ena veiyabaki sa oti. Oqori e vakamacalataka, vakatikina mada ga, na veika au vakarau kaya yani.¹ O koya gona, ena yalo ni kere veivosoti vei koya …

O ira na pailate ni waqavuka vuli-vinaka era dau vuka ena loma ni itagede ni nodra waqavuka ka vakamuria na veidusimaki mai vei ira na ivakalesilesi ni veivukayaki me baleta na vakayagataki ni iroro-ni-waqavuka kei na salatu ni vuka. Na kena vakalekaleka ga, o ira na pailate era dau cakacaka ena loma ni dua na ituvatuva. Veitalia na nodra kila-ka se nodra taledi, ena rawa ga ni ra qai tasereka mai ena veimaroroi na pailate na rawaka vakaitamera ni dua na waqavuka me rawati kina na kena inaki veivakurabuitaki ni ra vukataka tiko ena loma ni ituvatuva oqo.

Ena dua na sala tautauvata, eda dau ciqoma na ivakatakila ni tamata yadua ena loma ni dua na ituvatuva. Ni oti noda papitaiso, a soli vei keda e dua na isolisoli cecere ka rawa ni cakacakataki, na isolisoli ni Yalo Tabu.² Ni da segata me da tikoga ena salatu ni veiyalayalati,³ sai koya “na Yalo Tabu … ena vakaraitaka vei [keda] na veika kece [me da] kitaka.”⁴ Ni da sega ni kila deivaki se nuiqawaqawa, eda rawa ni kerea vua na Kalou na veivuke.⁵ Na yalayala ni iVakabula e sa matata vinaka sara: “Dou kerekere, ka na soli vei kemudou; … ni sa rawata ko koya yadua sa kerekere.”⁶ Ena veivuke ni Yalo Tabu eda rawa ni vakataucokotaka na noda ituvaki vakalou ki na noda icavacava tawamudu.⁷

Na yalayala ni ivakatakila ni tamata yadua mai na Yalo Tabu e veivakurabuitaki, me vaka ga e vuka tu e dua na waqavuka. Ka me vakataki ira ga na pailate, eda gadreva me kila vinaka na ituvatuva e dau cakacaka kina na Yalo Tabu me vakarautaka na ivakatakila ni tamata yadua. Ni da cakacaka ena loma ni ituvatuva oqori, na Yalo Tabu ena rawa ni tasereka mai na raititobu veivakurabuitaki, veidusimaki, kei na veivakacegui. Ena taudaku ni ituvatuva oqo, veitalia ga na noda kila-ka se noda taledi, eda rawa ni veretaki ka voca ka kama.

Na ivolanikalou e bulia na imatai ni yavu ni ituvatuva oqo me baleta na ivakatakila ni tamata yadua⁸ Na kana magiti ena vosa i Karisito, me vaka e kune ena ivolanikalou, e dau vakauqeta na ivakatakila ni tamata yadua. E vakatavulica o Elder Robert D. Hales: “Ni da vinakata meda vosa vua na Kalou, eda masu. Kei na gauna e via vosa kina vei keda o Koya, eda na vakasaqaqara ena ivolanikalou.”⁹

Na ivolanikalou e vakatavulica talega vei keda na ivakarau me da ciqoma kina na ivakatakila ni tamata yadua. ¹⁰ Eda kerea me baleta na ka e dodonu ka vinaka¹¹ ka sega ni ka e veicalati kei na loma ni Kalou.¹² Eda sega ni “kerekere vakaca,” ena inaki tawadodonu me tokona noda ituvatuva ga se me vakaceguya noda gagadre ga. ¹³ Ka uasivita kece, me da kerea na Tamada Vakalomalagi ena yaca i Jisu Karisito,¹⁴ ka vakabauta tiko ni da na ciqoma.¹⁵

Na ikarua ni yavu ni ituvatuva oqo sai koya na noda ciqoma na ivakatakila ni tamata yadua ena loma ga ni noda itavi ni veiqaravi, ka sega ni loma ni nodra lewa na tani. Ena vosa tale eso, eda vuka yani ka vakaroro mai ena noda dui iroro-ni-waqavuka lesi ga. Na bibi ni iroro-ni-waqavuka vakamacalataki-vinaka oqo a vulici mai liu sara ena itukutuku makawa ni Veivakalesuimai. O Hiram Page, e dua vei ira na iVakadinadina Lewe Walu ni iVola i Momani, a tukuna voli me ciqoma tiko na ivakatakila ena vuku ni Lotu taucoko. E lewe vica na lewenilotu a veretaki ka vakacalai kina.

Me kena isau, a vakatakila mai na Turaga ni “sega tale e dua sa lesi me ciqoma na ivakaro kei na ivakatakila ena lotu oqo ia ko Josefa Simici Lailai, ga na noqu tamata, … yacova niu sa lesia … tale e dua me kena isosomi.”¹⁶ Na ivunau, ivakaro, kei na ivakatakila eso me baleta na Lotu era sa nona dodonu na parofita bula tiko, o koya e dau ciqomi ira mai vua na Turaga o Jisu Karisito.¹⁷ Oqori na iroro-ni-waqavuka ni parofita.

Vica na yabaki sa oti, au a taura e dua na qiri mai vua e dua e a vesu me baleta na curuvale vakailoa. A tukuna vei au o koya ni a vakatakilai mai vua ni ikuri ni ivolanikalou e buluti tu ena ruku ni fuloa e ra ni dua na vale a tovolea o koya me curuma. A kaya ni gauna ga ena rawata mai kina na ikuri ni ivolanikalou oya, e kila o koya ni na ciqoma na isolisoli ni vakavakadewa, kauta mai na ivolanikalou vou, ka bulia kina na ivunau kei na veidusimaki ni Lotu. Au a tukuna vua ni cala o koya, ka vakamasuti au o koya meu masulaka mada. Au mani tukuna vua niu na sega ni cakava oqori. A vosa veivakacacani mai o koya ka tinia sara na qiri.¹⁸

Au a sega ni gadreva me masulaka ena vuku ni dua na vuna rawarawa ka bibi sara: na parofita duadua ga e dau ciqoma na ivakatakila me baleta na Lotu. E sa na “veisaqasaqa kei na cakacaka ni Kalou”¹⁹ vei ira tale eso me ciqoma na ivakatakila vaka oqori, ni ra sa okati tu ena iroro-ni-waqavuka ni parofita.

Na ivakatakila ni tamata yadua e okati dina ga ki na tamata vakayadua. E rawa ni o ciqoma na ivakatakila, me baleta beka na, vanua mo bula kina, salatu ni cakacaka cava mo muria, se o cei mo vakamautaka.²⁰ E rawa ni ra vakatavulica na ivunau na iliuliu ni Lotu ka wasea na ivakasala veivakauqeti, ia na itavi ni kena vakatulewataki e tikoga vata kei iko. Oqori na nomu ivakatakila mo ciqoma; oqori na nomu iroro-ni-waqavuka.

A ikatolu ni yavu ni ituvatuva oqo sai koya na ivakatakila ni tamata yadua me veiyaloni kei na ivunau ni Kalou kei na veiyalayalati eda sa cakava vata kei Koya. Vakasamataka mada e dua na masu e vaka oqo: “Tamada Vakalomalagi, e sa vakavucesa na qaravi Lotu. Ena rawa beka niu qaravi Kemuni ena Siga ni Vakacecegu ena ulunivanua eso se ena matasawa? Ena rawa beka meu vagalalataki mai na lako ki Lotu kei na vakaivotavota ena sakaramede ia meu rawata tikoga na veivakalougatataki yalataki ni rokovi ni Siga ni Vakacecegu?”²¹ Me idole ni dua na masu vaka oqori, eda rawa ni namaka na kena isau mai vua na Kalou: “Na luvequ, au sa vakatakila oti na lomaqu me baleta na Siga ni Vakacecegu.”

Ni da kerea na ivakatakila e sa solia oti tu na Kalou na veidusimaki matata e baleta, eda sa dolavi keda tu ki na vakadewataki cala ni veika eda vakila ka rogoca na veika eda via rogoca. E dua na turaga a tukuna vei au me baleta nona sasaga me vakadeitaka na ituvaki vakailavo ni nona matavuvale. A nanuma o koya me vakayagataki ilavo vakailawaki me kena iwali, a masulaka, ka vakila ni sa ciqoma na veivakadonui vaka-ivakatakila me cakava vakakina. Au a kila ni sa vakacalai o koya baleta ni a vakasaqara voli na ivakatakila e veisaqasaqa kei na dua na ivakaro ni Kalou. Na Parofita o Josefa Simici a vakarota, “E sega ni dua na ka e veivakacacani vakalevu vei ira na luve ni tamata, na veivakauti, ni veidre ni yalo e lasu, ni ra nanuma ni Yalo ni Kalou.”²²

Eso era na dusia beka ni a voroka o Nifai e dua na ivakaro ena nona vakamatei Lepani. Ia, na ka vakavudua oqo e sega ni vakalasuya na lawa—na lawa ni ivakatakila ni tamata yadua ena dau veiyaloni tu ga kei na ivakaro ni Kalou. E sega ni dua na ivakamacala rawarawa ni veika oqo e dau veivakacegui sara, ia au na vakabibitaka mada eso na tikina dina. Na italanoa oqo a sega ni tekivu ena nona kerea o Nifai ke rawa ni vakamatei Lepani. E a sega ni dua na ka a vinakata o koya me cakava. Na vakamatei Lepani a sega ni baleta na nona tiko vinaka vakaikoya o Nifai ia me vakarautaka kina na ivolanikalou ki na dua na matanitu kei na tamata ni veiyalayalati mai muri. Ka a kila deivaki o Nifai ni o ya sa ivakatakila—e dina sara, ena tikina oqo, o ya e a dua na ivakaro mai vua na Kalou.²³

A ikava ni yavu ni ituvatuva o ya na nomu kila vinaka na veika sa vakatakila oti mai na Kalou vei iko duadua, kei na nomu tu vakarau ki na ikuri ni ivakatakila mai Vua. Kevaka sa sauma mai na Kalou e dua na taro ka se sega ni veisau na ituvaki eso, na cava me da namaka kina na isau ni taro me duidui? A tarabe o Josefa Simici ena leqa oqo ena 1828. A sa vakadewataki oti toka na imatai ni wase ni iVola i Momani ena gauna a kerea kina o Martin Harris, e dua na dauveivukei ka dauvolavola eliu, vei Josefa na veivakadonui me kauta na tabana eso sa vakadewataki oti me vakaraitaka vei watina. Ni sega ni kila na ka me cakava, a masuta o Josefa na veidusimaki. A tukuna mai vua na Turaga me kakua ni kauta o Martin na tabana eso oqori.

A kerei Josefa o Martin me kerea tale mada vua na Kalou. A cakava vakakina o Josefa, ka sega ni ka ni kurabui, ni kena isau mai, a tautauvata tikoga. Ia a vakamasuti Josefa o Martin me kerea tale ena ikatolu ni gauna ka vakayacora vakakina o Josefa. Na gauna oqo sa sega ni qai kaya mai na Kalou sega. Ia, sa vaka ga e kaya mai na Kalou, “I Josefa, o sa kila na lomaqu ena vuku ni ka oqo, ia sa tu na nomu galala ni digidigi mo digitaka.” Ena nona vakila na vakacegu mai na dredre o ya, a mani lewa kina o Josefa me kauta o Martin na 116 na taba ni ivola volai ena liga o ya ka me lai vakaraitaka vei ira e vica nona lewe ni matavuvale. E ra a qai yali kece ka sega ni qai kune tale na vei taba ni pepa vakadewataki o ya. A cudruvi Josefa vakaukauwa sara na Turaga.²⁴

A vulica kina o Josefa, me vaka a vakatavulica o Jekope na parofita ni iVola i Momani: “Dou kakua kina ni segata mo dou vakasalataka na Turaga, ia mo dou taura ga na ivakasala mai na ligana. Ia raica … ni sa veivakasalataki o koya ena yalomatua.”²⁵ A veivakasalataki o Jekope ni dau yaco na veika ca ni da kerea na veika e sega ni dodonu me da kerea. A tukuna taumada o koya ni ra na vakasaqara na tamata e Jerusalemi “na veika era na sega ni kila rawa,” ni ra “raibaleta na maka,” ka raisivita kina na iVakabula kei vuravura.²⁶ Era a tarabe baleta ni ra kerea na veika era sega ni via ka sega ni rawa ni kila.

Kevaka eda sa ciqoma oti na ivakatakila ni tamata yadua me baleta na veituvaki eda sotava, ka se sega ni veisau na ituvaki eso, na Kalou sa sauma oti tu na noda taro.²⁷ Me ivakaraitaki, eda na taroga wasoma me vakadeitaki nida sa vosoti. Kevaka eda sa veivutuni, vakasinaiti ena reki kei na vakacegu ni yalo, ka ciqoma na bokoci ni noda ivalavala ca, e sega ni gadrevi meda taroga tale ia, sa rawa nida nuitaka na isaunitaro sa solia oti vei keda na Kalou.²⁸

Nida nuitaka dei tu na isau taumada ni taro a solia na Kalou, sa dodonu meda na saga tikoga meda ciqoma na ivakatakila yadua. Sa vakakina, e lailai sara na ilakolako ena bula oqo e rawa ni yacovi ni sega kina na kele yarayara. E dodonu me da kila ni ivakatakila ni tamata yadua e rawa ni ciqomi vaka “vosa ena vosa kei na ivunau ena ivunau,”²⁹ ni rawa ni vakawasoma ka vakaikuritaki na veidusimaki vaka-ivakatakila.³⁰

Na yavu ni ituvatuva ni ivakatakila ni tamata yadua era sa veitaqavi ka veivaqaqacotaki vata. Ia ena loma ni ituvatuva oqori, na Yalo Tabu e rawata ka na vakatakila na veika kece eda gadreva me da vuka cake kina ka tudei tu ena igu ena salatu ni veiyalayalati. Sa rawa nida vakalougatataki mai na kaukauwa i Jisu Karisito me da yacova na ka e vinakata na Tamada Vakalomalagi me da yacova Au sureti iko mo yalodei tu mo taura na ivakatakila ni tamata yadua me baleti iko, mo kila vinaka na veika sa vakatakila mai na Kalou, e veisotari kei na ivolanikalou kei na ivakaro eso sa solia o Koya mai vei ira Nona parofita lesi, kei na loma ni nomu itavi ni veiqaravi vakai iko kei na galala ni digidigi. Au kila ni Yalo Tabu e rawata ka na vakaraitaka vei iko na veika kece mo kitaka³¹ Ena yacai Jisu Karisito, emeni.