Na Mana ni Vosa

Mai vei Elder Mark D. Eddy

Ena Vitusagavulu

Ni tiko na mana ena nodra vosa na parofita ena gauna makawa kei ira ena gauna oqo dodonu vinakabaleta ni nodra vosa e vosa ni Turaga.

Ena iVola i Momani, eda wilika kina na vakatulewa bibi a vakayacora na parofita o Alama ena dua na tikini ivolanikalou lomani. Ni vakarau me da railesuva na veimalanivosa kilai oya, yalovinaka me da vakasamataka mada na itutu ni bula dredre a vakatauci kina na lewa oya.

E dua na iwase ni tamata, ka ra vakatokai ira me ra Soromaiti, era sa tawase tani mai vei ira na Nifaiti¹ ka soqoni vata ki na iyalayala ni vanua e yasadra na Lemanaiti.² Era se qai vakadrukai wale toka ga na Lemanaiti ena dua na ivalu se bera vakadua ni bau yaco, mai vei ira na Nifaiti ka ra mate kina e udolu vakaudolu,³ ka “sa rere vakalevu de ra na veikilai na Soromaiti kei ira na Lemanaiti, ia ena qai vakavuna me levu na ka me ra na vakayalia.”⁴ E uabaleta na leqataki ni ivalu na nona sa kila tiko ko Alama ni ko ira na Soromati, “sa vunautaki vei ira na vosa ni Kalou,”⁵ era sa vuki tiko ki na qaravi matakau ka “vakatanitaka na sala ni Turaga.”⁶ Na veika oqo sa bikai Alama voli ka “vakavuna na rarawa levu.”⁷

Ni tu voli ena ituvaki dredre levu oqo, sa vakasamataka vakabibi o Alama na cava me caka. Ena lewa a tauca, eda wilika kina na veimalanivosa era a maroroi tu me vakauqeti keda ka dusimaki keda ni da lakova na ituvaki drakidrakita ni noda gauna oqo.⁸

“Ia oqo, me vaka ni dau vakayarayarataki ira na tamata me ra vakayacora na ka e dodonu na vunautaki ni vosa ni Kalou—io, raica sa kaukauwa sara na vosa ni Kalou ki na nodra vakanananu na tamata ka mucu na iseleiwau, se dua tale na ka e sa yaco vei ira—o koya e sa nanuma kina ko Alama ni sa kilikili me ra vakatovolea na mana ni vosa ni Kalou.”⁹

Ena maliwa ni veika eso e rawa ni kena iwali, na vakabauta nei Alama a vakavuna me ra vakararavi ena mana ni vosa. E sega kina ni ka vakacalaka ni so na ivunau mana vakalevu sara ka kunei ena ivolanikalou kecega era a vunautaki ni oti sara ga na vakatulewa oya. Ena wase 32 kei na 33 ni Alama eda wilika kina na nona ivakavuvuli uasivi baleta na vakabauti Jisu Karisito, kei na wase 34 eda raica kina na ivakavuvuli ni veigauna sa bera mai nei Amuleki ena Veisorovaki nei Jisu Karisito.

iVakaraitaki ni Mana ni Vosa

E dina sara, ena loma taucoko ni ivolanikalou eda wilika kina na veivakalougatataki cakamana ka sovaraki vei ira era sa digitaka me ra tovolea na mana ni vosa ni Kalou ena nodra bula.¹⁰ Au sureti kemuni mo ni vakananuma vakatitobu vata kei au e tolu na ivakaraitaki ni da vagoleya noda vakanamata ki na iVolai Momani—e dua na ivola ka vakamacalataka o Peresitedi Russell M. Nelson ni “noda idusidusi ni bula ena gauna oqo.”¹¹

Taumada, ni vakananuma vei ira na nona tamata na nona sereki ira na nodra qase na Turaga, a vakavuvulitaka o Alama: “Raica sa veisautaka sara o Koya na lomadra; io, sa vakayadrati ira mai na dua na moce lutu, ka ra sa yadra vua na Kalou.” Raica, era sa tu ena loma ni butobuto; ia, sa vakararamataki ira na rarama ni vosa tawavakaiyalayala.”¹² Rairai o na vakila tiko beka ni vaka mo tu voli ena loma ni butobuto. E tagica beka na yalomu mo vakararamataki? Ke vakakina, yalo vinaka tovolea na mana ni vosa ni Kalou”

iKarua, ni vakananuma na nona saumakitaki ira na Leimani na Turaga, ka a vakadinadinataka e matana ni kaulotu voli, e kaya kina o Amoni, “Raica era sa lewe vica vata na udolu na wekada sa vakaluluqataka ko koya mai na mosi kei eli; ka ra sa seretaka na veisereki loloma, ia sa vakavuna oqo na kaukauwa ni nonavosa sa tu vei keda.”¹³ Taciqu kei na ganequ, sa lewevuqa sara vei keda era gadreva tu me dua era dau lomana me kau mai me lagata na sere ni loloma veisereki. Ena noda sasaga kece, me da nanuma me da tovolea na mana ni vosa ni Kalou, sa tu vei keda.

iKatolu, eda wilika ena iVola i Momani, “Io, eda sa raica ni ko koya yadua sa lomana sa rawa me taura matua na vosa ni Kalou, na ka sa bula ka kaukauwa ka na tawasea rua na ilawaki, na icori kei na vere kecega ni tevoro, ka tubera na tamata i Karisito ena sala qiqo ka rabailailai ka kosova na ikeli levu ni rarawa tawavakaiyalayala … ka vakatikora na yalodra … ena liga imatau ni Kalou ena matanitu vakalomalagi.”¹⁴ O segata tiko beka mo tawasea rua na ilawaki kei na icori kei na ivadi kecega ni tevoro sa takalevu tu ena noda gauna oqo? O gadreva beka mo tasereka na o ni veilecayaki ka vu mai na kena sa rui sivia na itukutuku me rawa kina ni o vakanamata ga ena salatu ni veiyalayalati? Yalo vinaka tovolea na mana ni vosa ni Kalou.

Me vaka e dua sa veisautaki mai na mana ni vosa, au vakadinadinataka na dina oqo sa vakavuvulitaka vakavinaka sara na noda parofita lomani, ko Peresitedi Russell M. Nelson: “Vei au na mana ni iVola i Momani ena vakavotui vakavinaka sara ena veisau kaukauwa e yaco ki na nodra bula o ira era wilika ‘ena yalodra dina, ena inaki dina, ena vakabauti Karisito.’ E vuqa na saumaki mai era biuta e levu na ka era dau taleitaka vakalevu e liu me rawa kina ni ra vauci ira ki na ivakavuvuli ni ivola oya. … Ena yaco me nomu iyaya mana duadua ni nodra kau mai na yalo vei Jisu Karisito.”¹⁵

Na iVurevure ni Mana

Ena ivakatraitaki oqo kei na kena tale eso, eda vakadinadinataka kina na mana ni vosa ni Kalou ena nodra bula na Luvena. Eda na taroga beka, na cava na ivurevure ni mana se na kaukauwa oya?

Ni da vakasamataka na taro oqo, ena yaga me da nanuma ni malanivosa “na vosa,” me vaka e vakayagataki ena ivolanikalou, e rua na kena ibalebale ke lailai. E vakavuvulitaka ena dua na gauna ga oqo o Elder David A. Bednar ni “dua na yaca i Jisu Karisito sai koya ‘na Vosa,’”16na “ivakavuvuli ni iVakabula me vaka e volai ena ivolanikalou, sai koya talega ‘na vosa.’”¹⁶

E vakaraitaka na parofita o Nifai na veiwekani ena rua na kena ibalebale oqo ena nona vola: “Dou vakarorogo ki na vosa oqo ka vakabauta na Karisito; ia kevaka dou sa sega ni vakabauta na vosa oqo dou vakabauta ga na Karisito. Ia kevaka dou sa vakabauta na Karisito dou navakabauta na vosa oqo, ni ra sa vosa i Karisito, ka a solia vei au ko koya.”¹⁷ Oqo eda sa vulica kina ni tiko na mana ena nodra vosa na parofita ena gauna makawa kei ira ena gauna oqo dodonu vinakabaleta ni nodra vosa e vosa ni Turaga.¹⁸ Kemuni noqu itokani lomani, na ciqomi ni dina tawamudu oqo sa ka bibi sara ena noda bula tiko vakayalo ena veisiga e muri oqo¹⁹ni, me vaka na parofisai, sa yaco na lauqa ena vanua, sega ni lauqa ena kakana, se karamaca ena viagunu wai, ia ena via rogoca na vosa ni Turaga.”²⁰

Kena iusutu, na mana ni vosa ni Kalou sai koyana Turaga ko Jisu Karisito.²¹ Ni da kila vakataucoko oqo, sa rawa ni da vakadeitaka na kedrau isema bibi vakayalo na itavi ni Nona parofita kei na Dauveivueti sara ga vakataki Koya. Na noda lomani Koya, na noda gagadre me da toro voleka Vua ka vauci keda ki na Nona loloma,²²ena dreti keda me da tovolea na mana ni vosa ena noda bula—ruarua na mana ka drodro mai Vua me vaka ni noda iVakabula ka Dauveivueti²³kei na mana e drodro mai Vua ena nodra vosa “vei ira na digitaki ni Turaga.”²⁴ Ena yaco me da kila rawa ni, ra na veivuke vakalevu beka na ivurevure tale eso ena noda vulica na iVakabula kei na nodra vosa na Nona parofita, me ra na kakua sara ni sosomitaki ira. Sa dodonu me da dau gunu vakatitobu ka vakawasoma,²⁵vakadodonu sara ga mai na kena ivurevure.²⁶

Au cavuta na noqu iloloma vei kemuni yadua, na taciqu kei na ganequ. Ena iloloma oqori, au sa kerei kemuni kina mo ni vakila mada na mana ni vosa ni Kalou, vakauasivi mai na iVola i Momani, ena veisiga yadua ni nomuni bula. Ni o vakayacora vakakina, ko na vakila na yalayala vakaparofita oqo mai vei Peresitedi Russell M. Nelson: “Au yalataka kavaka ko wilika ena yalomasumasu na veisiga, na iVola i Momani ena vinaka cake sara na nomu vakatulewa e—veisiga. Au yalataka ena nomuni vakasamataka vakatitobu na veika o ni vulica, ena tadolavi na katubaleka ni lomalagi, o na ciqoma na isau ni nomu taro kei na idusidusi ena nomu bula. Au yalataka ena nomu dromuci iko ena iVola i Momani e veisiga, sa rawa ni o cula ena itatarovi ni veika ca ni siga oya.”²⁷

Au vakadinadinataka ni sa solia vei keda na Tamada Vakalomalagi na vosa baleta ni lomani keda sara vakavinaka ka vinakata me da lesu yani ki vale ka laki buIa vata Kaya me tawamudu o keda yadua. Au vakadinadinataka ni “sa yaco me tamata …na Vosa,”²⁸ko Jisu Karisito, kei na Nona mana me vakabulai keda ka vueti keda. Au kila ni nona mana e drodro mai na nodra vosa na Nona parofita, o ira e liu kei ira ena gauna oqo.

Sa masu ni vuniyaloqu me da rawata na vuku kei na yalomatua me da tudei²⁹ena vosa ni Kalou ka tiko ga ena salatu ni veiyalayalati ka na kauti keda ki na bula vakacerecerei kei na bula tawamudu.³⁰ Me da vakila tikoga na veisau qaqa e vakarautaki tu vei keda yadua mai na mana ni Vosa.³¹ Ena yacai Jisu Karisito, emeni.

iDusidusi

1. Raica na Alama 30:59.

2. Raica na Alama 31:3.

3. Raica na Alama 28:2.

4. Alama 31:4. Yalovinaka mo ni kila ni ra a sotava ena dua na gauna e liu o Alama kei ira na nona tamata e dua na mataqali “veikilai” vaqo vei ira na Amelesaiti kei na Lemanaiti, ka a vakavuna na rarawa levu kei na lusi (raica na Alama 2:21–38; Alama 3:1–3).

5. Alama 31:8.

6. Alama 31:1.

7. Alama 31:2.

8. Raica na Momani 8:34–35.

9. Alama 31:5; vakamatatataki.

10. Raica, me ivakaraitaki, 1 Nifai 15:24; Alama 32:41–43; 36:26; 37:8, 44–45.

11. Raica talega na Russell M. Nelson, “Karona na Veisiga ni Mataka ena Vakabauta,” Liaona, Nove. 2020, 75.

12. Alama 5:7; vakaikuritaki.

13. Alama 26:13; vakaikuritaki.

14. Ilamani 3:29–30; vakaikuritaki.

15. Russell M. Nelson, “The Book of Mormon: A Miraculous Miracle,” (itavivosa ka a soli ena semina ni peresitedi vou ni kaulotu, June 23, 2016), cavuti eso na tikina Moronai 10:4.

16. David A. Bednar, “Ia, Keimami a Sega ga ni Kauwaitaki Ira,” Liaona, Me 2022, 16.

17. 2 Nifai 33:10; vakaikuritaki.

18. Raica na Vunau kei na Veiyalayalati 1:38.

19. Raica na Vunau kei na Veiyalayalati 1:14–18.

20. Emosi 8:11.

21. Raica na Alama 34:6.

22. Raica na Joni 15:10.

23. Raica Marika 5:25–34.

24. Moronai 7:31.

25. “E dua na sala vinaka cake ni vakavakarau, baleta na vakabauta cecere e dau lekaleka ga na gauna e rawa ni vakayagataki tiko kina. E rawa ni da lewa me da ia tikoga ena vulica na vosa i Karisito ena ivolanikalou kei na nodra ivakavuvuli na parofita bula. Oqo na ka au na cakava. Au na lesu tale ki na iVola i Momani ka gunu kina vakatitobu ka vakawasoma” (Henry B. Eyring, “Vakarau Vakayalo: Tekivu Totolo ka Tudei,” Liaona, Nove. 2005, 39).

26. “Vei au, na wiliki ni ivolanikalou e sega ni o koya na vaqara sikolasivi. Ia, sai koya na veivinakati kei na vosa ni Turaga kei ira na nona parofita. …

    Au sega ni dau vakaogai au vakalevu ena wiliki ni ivola ka kena inaki me vakarabailevutaka na veika e tu ena ivolanikalou. Ia, e vinaka cake vei au meu toka ga ena ivurevure, ka tovolea na wai sega ni vakawainimate ni yavu ni dina—na vosa ni Kalou me vaka e solia mai o koya me vaka na kena sa volai tu ena ivola ka da sa ciqoma ni ivolanikalou. … Ena noda wilika na ivolanikalou, eda rawa ni vakadeitaki mai na Yalo ni veika eda wilika sa vu mai vua na Kalou me ra vakararamataki, vakalougatataki, ka reki kina na luvena” (Gordon B. Hinckley, “Feasting upon the Scriptures,” Ensign, June. 1985, 45).

27. Raica na Russell M. Nelson, “Na iVola i Momani: Ena Vakaivei Beka na Nomu Bula Kevaka e Sega,” Liaona, Nove. 2017, 60.

28. Joni 1:14.

29. Raica na 1 Nifai 8:30.

30. “Na salatu ni veiyalayalati sai koya na salatu duadua ga ka na kauti keda ki na bula vakacerecerei kei na bula taumada” (Russell M. Nelson, “Na Kaukauwa ni iGu Vakayalo,” Liaona, Me 2022, 98).

31. Raica na Alama 5:11–13.