Na Cava na Dina?
O Koya na ivurevure ni reki kecega. Na Lotu i Jisu Karisito ni Yalododonu Edaidai sa ciqoma na dina taucoko e tukuna na Kalou vei ira na Luvena.
Kemuni na taciqu kei na ganequ lomani, vinaka vei kemuni kece ena soqoni veiuqeti oqo! Mai na noda koniferedi ni Epereli sa oti, eda vakadinata kina e vuqa na yavavala e vuravura, mai na kavoro ni yalo ki na sautu.
Eda marautaka na veitukutuku ni koniferedi lelevu ni itabagone e vakayacori e vuravura taucoko.1 Ena veikoniferedi vakaoqo, o ira na noda itabagone dokai era vulica se cava ga e yaco ena nodra bula, na nodra qaqaco cecere sa mai vua na Turaga.2
Eda rekitaka ni vuqa na valetabu era sa tara tiko e vuravura raraba. Ena vakatabui ni valetabu vou yadua, na ikuri ni kaukauwa vakalou sa soli mai ki vuravura me vaqaqacotaki keda ka me valuta na sasaga kaukauwa ni vunimeca.
Na veivakacacani e oka kina na veivakauqeti ni vunimeca. Oqo e ivalavala ca levu.3 Niu Peresitedi ni Lotu, au vakadeitaka na ivakavuvuli ni Turaga o Jisu Karisito ena ivakarau oqo. Meu na vakamatatataka mada: na mataqali vakacacani cava ga ni yalewa, gonelalai, se dua ga, e sa ca vua na Turaga. E rarawa o Koya kau rarawa na gauna e e vakamavoataki kina e dua. . E tagicaka o Koya, ka da tagicaka kecena tamata yadua sa rawai ena vakacacani cava ga. O ira era cakava na itovo ca vakaoqo era sega walega ni saumitaro ki na lawa ni tamata ia era na sotava talega na cudru bibi ni Kalou.
Sa vuqa mai na yabaki, sa cakava tiko na Lotu na ivakarau matau ni veitaqomaki—vakabibi—o ira na gone era vakacacani. Era vuqa tu na veivuke ena mataveilawa ni Lotu. Au sureti kemuni mo ni vulica mada.4 Na idusidusi oqo sa vakarautaki tu mera taqomaki kina na tawacala. Au sureti keda yadua meda wanonovi ira matua era rawa ni vakaleqai ena veivakacacani meda vuki vakatotolo ka vukei ira. Na iVakabula e sega ni vakadonuya na veivakacacani, ka ni da Nona tisaipeli, eda sega ni vakakina.
O vunimeca e tiko na nona ivadi ni veivakasagai. Dua vei ira o ya nona saga me buwawataka na ilati ni ka dina kei na ka e sega ni dina. Na veiluvuci mai ni itukutuku sa tu oqo e ligada, e tukuni kina, ni sa dredre cake tikoga me kilai na ka e dina.
Na ibolebole oqo e vakavotua vei au na neirau a sikova kei Sister Nelson e dua na vakailesilesi ni dua na matanitu ka vica sara era bau rogoci Jisu Karisito. O itokani qase vinaka oqo a tautauvimate tiko mai. A kaya vei keirau ni vuqa nona siga ni davo voli, e dau sarava cake na dela ni vale ka taroga, “Na cava na dina?”
E vuqa e vuravura nikua “era sa sega ga ni kila rawa na ka dina ni ra sa sega ni kila na vanua mera vakasaqara kina.”5 Eso era kaya meda vakabauta ni dina sa isema ga—ni tamata yadua me lewa ga vakaikoya na ka e dina. Na vakabauta vakaoqo sa nodra vakanananu walega era nanuma ni ra na sega ni saumitaro vua na Kalou.
Taciqu kei na ganequ lomani, na Kalou sa ivurevure ni dina taucoko. Na Lotu i Jisu Karisito ni Yalododonu Edaidai sa ciqoma na dina taucoko e tukuna na Kalou vei ira na Luvena, e vulici ena volau ni vakadidike se ciqomi ena ivakatakila e solia ga mai o Koya.
Mai na tevali oqo nikua kei na mataka ena tomani tiko kina nomuni rogoca na dina. Yalovinaka ni vola na vakasama e uqeti kemuni kei na kena o ni vakasamataka ka tiko e yalomuni. Kerea ena masumasu vua na Turaga me vakadeitaka ni veika o rogoca sa dina.
Au lomani kemuni, kemuni na taciqu kei na ganequ lomani. Sa noqu masu ni koniferedi oqo ena vakarautaka na magiti vakayalo o ni vakasaqara tiko, Ena yaca tabu i Jisu Karisito, emeni.