Ka Me Ra Kilai Kemuni
Sa noqu gagadre titobu ni ko na yaco mo kilai Jisu kei na vuqa na Yacana me rawa ni ko vakataki Koya vakalevu cake.
Vica na yabaki sa oti, au vakila e dua na veisau levu ena noqu bula ena gauna ni soqoni ni sakaramede ena neitou tabanalevu e Arizona. Na masu ni sakaramede e vakatakila “ni sa lomadra me ra taura na yaca i Jisu Karisito,”1 vakananuma vei au na Yalotabu ni vuqa na yaca i Jisu. Na taro qo e qai lako mai yaloqu: “Na yaca cava i Jisu meu tugana e yaloqu ena macawa oqo?“
E tolu na yaca e lako mai noqu vakasama, kau vola sara. Na yaca yadua oqo e oka kina na ituvaki vaKarisito au vinakata meu bulataka vakavinaka. Ena macawa tarava, au vakanamata kina tolu na yaca ka saga meu rokova na kena ituvaki matailalai. Mai na gauna oya, au tomana tiko na noqu vakatataro me tiki ni noqu sokalou: “Na yaca cava i Jisu meu tugana e yaloqu ena macawa oqo?“ Noqu sauma na taro ka sasaga meu bulataka na ituvaki i Karisito e veisemati e sa vakalougatataka na noqu bula.
A masu na iVakabula vua na Tamana, vakaraitaka o Jisu na dina bibi oqo: “Ia sai koya oqo na bula tawamudu, mera kilai kemuni na Kalou dina duadua ga, kei Jisu Karisito o koya oni a tala mai.”2 Nikua Au na via wasea vei kemuni na veivakalougatataki kei na kaukauwa e lako mai ni da kilai Jisu Karisito ena yacana e vuqa.
Dua na sala rawarawa eda kila kina e dua ena noda vulica na yacana. E tukuni ni “na yacana e dua na tamata vua na tamata oya e irorogo bibi ka kamica duadua ena malanivosa cava ga.”3 Oni sotava beka na gauna oni kaciva cala kina ena dua na yaca ni tamata se mo guilecava na yacana? AU kei na watiqu o Alexis,so na gauna e dau kaciva cala e dua na luvei keirau me o “Lola.” E ca baleta me vaka ni o ni kila, o Lola e yacani neitou koli! Na gauna vinaka se dredre, na guilecavi ni yacai dua na tamata e tukuna tiko nio sega ni se kilai koya vinaka.
O Jisu e kacivi ira kece na tamata ena yacadra. Kivei ira na Isireli ena gauna makawa, e kaya na Turaga, “Kakua nio rere: niu a voli iko, Au a kacivi iko ena yacamu; ko sa noqu.”4 Ena mataka ni tucake tale, vakadinata o Mary ni sa tucaketale na Karisito ni kaciva o Jisu na yacana.5 Vakataka na nona kacivi Josefa Simici na Kalou ena yacana me isau ni nona masu ena vakabauta.6
Eso na gauna, a solia o Jisu vei ira nona itisaipeli na yaca vou era kilai tani kina vakayago, veika e rawati, kei na veika erawa nira rawata. A vakatokai Jekope me Isireli o Jiova, a kena ibalebale “e dua sa lako vata tu kei na Kalou” se “Me qaqa tikoga na Kalou”7 Solia o Jisu me yacadrau o Jemesa kei Joni na yaca Poanaji, a kena ibalebale a “luve ni kurukuru.”8 Nona nanuma na veiliutaki mai muri, solia o Jisu me yacai Saimoni na Kifa se Pita, kena ibalebale na vatu.9
Me vaka ga ni kila yadudua na yacada ko Jisu, e dua na sala eda rawa ni kilai Jisu kina oya na noda vulica e vuqa na Yacana. Me vaka na yacai Isireli kei Pita, e vuqa na yacai Jisu e iulutaga me vukea na noda kila nona ilesilesi, inaki, ivakarau, kei na ituvaki. Nida mai kila na yaca e vuqa i Jisu, eda na mai kila vinaka na Nona ilesilesi vakalou kei na Nona ivakarau ni veinanumi. Na kilai tale ga ni yacana e vuqa e vakauqeti keda meda vakataki Koya—taracake na ituvaki vaKarisito koya e kauta mai na marau kei na inakinaki kina noda bula.
E vuqa na yabaki sa oti, vulica o Peresitedi Russell M. Nelson na tikini volatabu kece me baleti Jisu Karisito ena iDusidusi Ulutaga.10 E sa qai sureti ira na itabagone qasecake mera vulica na tikina vata oqo. Me baleta na vuqa ni yaca i Jisu, tukuna o Peresitedi Nelson, “Vulica na veika kece me baleti Jisu Karisito ena nomu vakasaqara vakawasoma mo kila na yaca yadua kei na kena ulutaga ena nomu sasaga vakayadua vei iko.”11
Ni oti na ivakasala nei Peresitedi Nelson, a tekivu meu taracake na noqu lisi ni vuqa na yaca i Jisu. Na noqu lisi e sa tiko kina e sivia e 300 na yaca, au kila ni vuqa tale au se sega niu se kila.
Dina ni eso na yaca i Jisu e vakayagataki ga Vua,12 au via wasea e lima na yaca kei na kena ulutaga koya e vakaibalebale vei keda yadudua. Au sureti kemuni moni cakava na nomuni lisi vakataki kemuni nomu mai kilai Jisu ena vuqa na yaca. Nio vakayacora oqori, ona kunea tale eso tale na yaca—ka salavata kei na kena ituvaki vaKarisito—ko na via tugana ki lomamu nio tisaipeli ni veiyalayalati i Jisu.13
iMatai, o Jisu e iVakatawa Vinaka.14 O koya gona, e kila kina o Jisu na Nona sipi,15 “a sa kacivi ira na nona sipi ena yacadra,”16 ka ni Lami ni Kalou, e solia na Nona bula e vukudra na Nona sipi.17 E vinakata talega o Jisu meda vakatawa vinaka ena noda vuvale kei na noda itavi vaka turaga kei na marama dauveiqaravi. E dua na ivakaraitaki ni noda lomani Jisu ena noda vakani ira na Nona sipi.18 Vei ira na sipi era lako sese, o ira na ivakatawa vinaka era lako ki na loma ni lekutu mera vakasaqara na sipi sa yali, ka tiko kei ira me yacova na nodra sa lesu mai ki na tataqomaki.19 Nida vakatawa vinaka, kevaka e vakatara na vanua eda tiko kina, me da saga me vakayagataki vakalevu na gauna ena noda veiqaravi ena loma ni nodra vale. Ena noda veiqaravi, na teks se tekinoloji e dodonu me vakalevutaka, ka sega ni sosomitaka na veirai e matanavotu.20
iKarua, o Jisu e Bete Levu ena ka Vinaka ena Muri Mai.21 Sa kila ni nona vakamatei e sa voleka mai, e qai kaya ko Jisu: “A veika oqo au sa tukuna vei kemudou, mo dou rawata na vakacegu ena vukuqu. Dou na kunea e vuravura na rarawa: ia mo dou vakacegu; au sa vakamalumalumutaki vuravura.”22 Na ituvaki ni tawase e bikai vuravura tu nikua, e tiko e dua na gagadre bibi meda vunauca ka bulataka na vinaka, vakasama vinaka, kei na nuinui. Mani vakacava na ibolebole ni noda bula, e muataki keda i liu na vakabauta,22 sinai ena nuinui, ka vakatara meda rawata na nona veisureti o Jisu meda reki ka marau.24 Na bulataki ni kosipeli ena marau e vukei keda meda vakataki ira na tisaipeli ni veika vinaka ena yaco mai.
E dua tale na nona ulutaga o Jisu sa ikoyakoya tiko ga ena siga sa oti, ena siga edaidai ka sega ni mudu..25 Na sasaga tiko e ituvaki vaKarisito. E cakava vakawasoma o Jisu na ka e vinakata na Tamana,26 ka vakasavuya tuga na ligana o Koya me taqomaki, vukei, ka vakabulai keda27 Nida sega tiko meda yalodina ena bulataki ni kosipeli, eda na vakataka Jisu vakalevu.28 Dina ga ni lako curuma o vuravura na veisau lelevu ni veika ena veitosoyaki kei na veikauyaki ena cagi kecega ni vakavuvuli,29 na segata tiko na bulataki ni kosipeli ena vakavuna meda tudei ka sega ni yavalati mai na cava ni bula.30 Eda vakaraitaka nida segata tiko ena noda ciqoma na nona veisureti o Peresitedi Nelson meda “solia noda gauna vua na Turaga.”31 Na kaukauwa vakayalo cecere e lako mai ena veika lalai ka rawarawa32 me vaka na taraicake ni “itovo savasava kei na ivakarau ni bula dodonu”33 ni masu e veisiga, veivutuni, wili volanikalou, kei na veiqaravi vei ira eso.
iKava, o Jisu e Yalo savasava i Isireli.34 Na bula i Jisu ai vakaraitaki ni ivakarau ni bula dodonu. Nida sa muri Jisu, sa rawa meda yalo savasava i Isireli.35 E tubucake na yalo dodonu nida sikova na valetabu, koya e ceuti kina na “Vakatabui vua na Turaga” ena doka ni valetabu. Na veigauna eda sokalou kina ena valetabu, e da vakasinaiti ena kaukauwa cecere me rawa ni vanua ni buladodonu ena noda veivale.36 Vei ira era sega ni tiko na nodra volatara ni valetabu, au sureti iko mo sikova na nomu bisovi ka vakarautaki iko mo curu ka lesu tale kina vanua tabu oya. Na gauna ena valetabu ena vakalevutaka na buladodonu ena noda bula.
Na iotioti ni yaca i Jisu oya na Vakabauta kei na Dina37 Me vaka ga ni dau vakaraitaka na vivakabauti ka dau dina tuga, na Nona gagadre levu sa ikoya meda vakaraitaka na ivakarau oqo ena noda bula. Ni dau tarabe na noda vakabauta, e rawa meda tagi vei Jisu, “Turaga, ni vakabulai au,” me vakataki Pita ni sa tekivu me dromu ena baravi cava e Kalili.38 Ena siga oya, a dodoka na ligana o Jisu me vukea nona tisaipeli sa dromu tiko. Ka sa cakava talega vakaoqo vei au, ena cakava vaka kina vei iko. Kakua ni guilecavi Jisu—E na sega vakadua ni guilecavi iko!
Nida bulataka na vakabauta kei na dina, eda na muria tiko na kaci nei Jisu me “Ni tiko kei au,” ka kena i balebale “tiko kei au.”39 Nida vakatarogi ena taro, nida vakalialia baleta na noda vakabauta, nida dusi ena veileti mai vei ira era tu ena vale levu ka vakaitamera, me da vakabauta tiko ka dina tikoga. Ena gauna oqo, eda nanuma na nona kerekere o Jisu, “Drau vakararavi tiko mai vei au ena vakasama kece; kakua ni vakatitiqa, ka kakua ni rere.”40 Nida vakayacora vakakina, e solia o Koya na vakabauta eda gadreva, nuinui kei na kaukauwa meda ravi tiko Vua.41
Kemuni na taciqu kei na ganequ, e vinakata o Jisu me da kilai Koya baleta na Yacana duadua ga e rukuni lomalagi eda vakabulai kina.42 Sai Koya na sala, kei na vu-ni-dina, kei na vu-ni-bula—sa sega ni torovi Tamana walega e dua na tamata, ena Vukuna ga.43 Na sala duadua ga ko Jisu! Na vuna oqo, kerea kina o Jisu “Dou Lako mai mai vei au,”44 “Muri au,”45 “Taubale kei au,”46 kei na “Vuli vei au.”47
Mai na vu ni yaloqu, au vakadinadinataka nio Jisu Karisito—e bula tiko, e lomani iko, ka kilai na yacamu. Sa i koya na Luveni Kalou,48 na Luvena Duabau na Tamana.49 Sa i Koya na noda Vatudei, noda Dauveivueti, noda iNuinui, noda Veivakacegui, ka noda Dauveisereki.50 Sa i Koya na Rarama sa Cilava na Butobuto.51 Sa noda iVakabula52 ka Dauveivueti.53 O Koya na Vu-ni Tucaketale kei na Vuni Bula.54 Na noqu gagadre titobu oya moni kilai Jisu ena vuqa na Yacana ka moni vakataki Koya ena nomu ivakaraitaki ni Nona ituvaki va Kalou ena nomu bula. Ena yacai Jisu Karisito, emeni.