A Sa Vakatovolea Me Raici Jisu Se Sa Vakaevei Ko Koya

Elder James W. McConkie III

E na Vitusagavulu

Au vakadinadinataka ni bula tiko o Jisu, e kilai keda o Koya, ka tiko Vua na kaukauwa me vakabulai keda, veisautaki keda ka vosoti keda.

Kemuni na taciqu, ganequ, kei na itokani, e na 2013 keirau a kacivi kei na watiqu o Laurel, me keirau veiqaravi vaka iliuliu ni tabana ni Kaulotu e Czech Slovak. E ratou a veiqaravi kei keirau e va na luvei keirau.¹ Keitou a vakalougatataki vakavuvale ni keitou veiqaravi kei ira na daukaulotu vakasakiti ka vakakina o ira na Yalododonu vakasakiti e Czech kei Slovak. Keitou lomani ira.

Na neitou curuma yani vakavuvale na buturara ni kaulotu, e dua na ivakavuvuli nei Elder Joseph B. Wirthlin e a lako vata kei keitou. E na dua na nona vosa ka kena iulutaga “Na iVakaro Cecere” e a taroga o Elder Wirthlin, “Ko lomana li na Turaga?” Na nona ivakasala vei keda e da sauma e na “io” e rawarawa ka bibi: “Solia na nomu gauna mo vakayagataka vata kei Koya. Vakasamataka vakatitobu na Nona vosa. Taura na Nona ivua. Vakasaqara mo kila vinaka ka muria.”² E a qai yalataka o Elder Wirthlin na veivakalougatataki e veisautaki ira e ra tu vakarau me ra solia na nodra gauna kei na vanua ki vei Jisu Karisito.³

Keitou a tugana e yaloi keitou na nona ivakasala kei na nona yalayala o Elder Wirthlin. Cokovata kei ira na daukaulotu, keimami vakayagataka e dua na iwase levu ni gauna kei Jisu e na vulici ni vosa e na Maciu, Marika, Luke, kei Joni mai na Veiyalayalati Vou kei na ika 3 ni Nifai e na Vola i Momani. E na mua ni vei soqoni vakadaukaulotu keimami lesuva tikoga na yaca e sa vakatokai me “Kosipeli e Lima”⁴ ena kena wiliki, veitalanoataki, nanumi, kei na vulici ni veika me baleti Jisu.

Vei au, vei Laurel, kei ira na neitou daukaulotu, na neitou solia na neitou gauna ena ivolanikalou e veisautaka saraga na veika taucoko. E vakalevutaki na neitou vakavinavinakataki Koya, kei na veika e bibi vei Koya. Keimami vakasamatakavata na sala e veivakavulici kina o Koya, na veika e vakavulica o Koya, na sala e vakaraitaka kina na loloma, na veika e vakayacora me vakalougatataka e dua se veiqaravi kina, na Nona cakamana, na Nona sauma na veilarui, na Nona sauma na itovo veibolei ni leqa vakayalo, na Kena icavuti kei na Yacana, na Nona itovo ni vakarorogo, na Nona walia na leqa, na vuravura e bula kina o Koya, na Nona vosa vakaibalebale, na Nona vakauqeta na yalovata kei na veinanumi, na vakaitamera ni Nona veivosoti kei na veivakabulai, na Nona vunau, na Nona masu, na Nona veisorovaki, na Nona Tucaketale, na Nona kosipeli.

Dau vakilai vakawasoma na “ituvaki ni tamata lekaleka” i Sakaraia e na nona cici me laki kabata na vuni sikamoa e na gauna e taubaletaki Jeriko kina ko Jisu baleta, me vaka e vakamacalataka o Luke, ni “a sa vakatovolea me raici Jisu se sa vakaevei ko koya.”⁵ E sega ni o Jisu e namaka se dau tatadrataki Koya kina, ia na Jisu e na kena ituvaki dina.⁶ Me vaka e a yalataka o Elder Wirthlin, e da vulica e na kena ivakarau dina ni “na kosipeli i Jisu Karisito e kosipeli ni veisau. E tauri keda na tagane kei na yalewa ni vuravura ka veisautaki keda me da tagane kei na yalewa ni bula tawamudu.”⁷

E dua dina na gauna talei oya. Keimami mai vakabauta ni “na sega ni dredre vua na Kalou e dua na ka.”⁸ Na ivakananumi ni so na yakavi tabu e Prague, Bratislava, se Brno, na vakilai ni kaukauwa kei na ituvaki dina kei Jisu, e tomani tikoga e na neimami bula taucoko.

Keimami wilika vakawasoma na Marika 2:1–12. E titobu na italanoa oya. Au via wilika e dua na iwase mai vei Marika, ka wasea yani na veika au mai kila e na noqu vulica ka wasea vata kei ira na daukaulotu kei na so tale.⁹

“Sa qai curu tale ki Kapenaumi ko koya; a sa qai rogovaki ni sa tiko e vale.

“A sa lewevuqa na soqoni vata sara mai, a sa sega kina na tikina me rauti ira, e segai ena mata ni katuba; a sa vunautaka na vosa vei ira ko koya.

“A sa lako mai vei koya e so, e ratou kauta mai e dua sa tauvi paralasi, sa colati koya e lewe va.

“Ia ni ratou sa sega ni torovi koya rawa e na vukudra na lewe vuqa, e ratou sa basuka na dela ni vale sa tiko kina ko koya: ia ni ratou sa basuka rawa, e ratou sa tukuca sobu nai mocemoce sa davo kina ko koya sa tauvi paralasi.

“Ia ni sa raica ko Jisu na nodratou vakabauta, sa kaya vua sa tauvi paralasi, Na luvequ, sa bokoci na nomu ivalavala ca.”

Ni oti e so na veivosaki kei ira na tu wavolita,¹⁰ raici koya na tagane e tauvi paralasi ko Jisu ka vakabulai koya vakayago, ka kaya:

“A kaya vua na tamata o Koya, Tucake, ka kauta na nomu imocemoce, ka lako ki na nomu vale.

A sa tucake sara ko koya, ka kauta na imocemoce, ka lako yani e na matadra kecega; a ra sa kurabui kecega kina, ka vakarokorokotaka na Kalou ka kaya, E da sa sega ni raica e liu na ka e vakaoqo na kenai valavala.”¹¹

Na italanoa koya au sa mai kila: E na itekivu ni Nona veiqaravi, a lesu ki Kapenaumi ko Jisu, e dua na koro nodra na dau siwa ka toka e na baravi vualiku e na Wasawasa o Kaleli.¹² A se qai vakayacora oti ga e vica na cakamana me vaka na vakabulai ni tauvimate kei na nodra vakayasavi o ira na yalo velavela.¹³ E na nodra maqusa me ra rogoca ka raica na turaga o Jisu, e ra a soqoni vata mai na lewe ni koro e na vale e rogovaki ni tiko kina o Koya.¹⁴ Ni ra yaco yani, sa tekivu me veivakavulici o Jisu.¹⁵

O ira na veivale e Kapanaumi e na gauna oya e ra dela ni vale raraba, taba dua, ka cokoti vata.¹⁶ Na dela ni vale kei na lalaga e tara mai na dua na iwaki ni qereqere, kau, qele, kei na drau ni kau, ka rawa ni kabati yani mai na dua na ikabakaba e yasani vale.¹⁷ E sa tubucake na iwiliwili ni tamata e na loma ni vale e veivakavulici tiko kina o Jisu, ka tete yani ki gaunisala.¹⁸

Na italanoa oqo e vakatabakidua vua na tagane e “tauvi paralasi” kei na lewe va na nona itokani.¹⁹ Na mate na palsy e dua na mataqali paralasi, e dau muria na malumalumu kei na sautaninini.²⁰ Au raitayaloyalotaka ni dua vei iratou na lewe va e a tukuna vei iratou na kena vo, “O Jisu e sa tiko oqo e na nodatou loma ni koro. E datou sa kila taucoko na cakamana e sa vakayacora oti o Koya kei o ira era vakabulai. Kevaka ga me rawa ni tou kauta na nodatou itokani vei Jisu, e na rawa ni vakabulai.”

Sa ratou yadua sara na tutuni ibe se loga koya e davo toka kina na nodratou itokani ka ratou tekivu me kau ki na gaunisala veigoleyaki, qiqo e na so na vanua, e na gaunisala sukusukura e na vanua o Kapanaumi²¹ Momosi tu na masela, e ratou yaco ki na iotioti ni kona ka ratou raica na oso ni tamata, se me vaka e tukuni e na ivolanikalou na “lewevuqa” e ra soqoni mai me ra vakarorogo e sa bau via dredre saraga na raici Jisu,²² Ni tiko na loloma kei na vakabauta, eratou sega ni guce na lewe va. Ia, e ratou sasaga cake ga e na ikabakaba ki na dela ni vale, laveta cake vakamaqosa na nodratou itokani kei na nona imocemoce, basuka na dela ni vale e veivakavulici tiko kina o Jisu, ka tukuca sobu na nodratou itokani.²³

Vakasamataka e na lomadonu ni dua na gauna ni veiwasei titobu, rogoca o Jisu e dua na tavasa, rai cake, ka raica ni sa kalevu tikoga mai na qara e na dela ni vale ka lulutu mai na tikitikina e na loma ni rumu. E dua na tagane paralasi ka davo koto e na imocemoce e sa tukuci sobu ki na fuloa. Ia, o Jisu e kila ni oya e sega ni dua na ka ni vakalatilati ia e dua dina na ka bibi. E raica o Koya e dua na tagane e na imocemoce, vosoti koya e matadra na tamata, ka vakabulai koya vakayago.²⁴

Na vakasama ni veika e tukuni tiko e na Marika 2, e vica na dina bibi e matata sara mai me baleti Jisu ni Karisito. iMatai, ni da saga me da vukea e dua e da lomana me lako mai vei Karisito, e rawa ni da cakava e na nuidei ni tiko Vua na kaukauwa me kauta tani na icolacola ni valavalaca ka veivosoti. iKarua, ni da kauta mai na mate vakayago,vakayalo, se e so tale na mate vei Karisito, e rawa ni da cakava oqori ni da kila ni tiko Vua na kaukauwa me vakabulai keda ka solia na vakacegu. iKatolu, ni da sasaga me vakataki iratou na lewe va me da kauti ira mai e so vei Karisito, e da rawa ni kitaka ni da nuidei ni raica o Koya na yaloda ka na doka e na sala talei.

Nanuma tiko, ni vakavuvuli nei Jisu e a tu vakawawa e na vuku ni qara e na dela ni vale. E a sega ni cudru se vakayasavi iratou na lewe va ni ratou va qara na dela ni vale, e tukuna na ivolanikalou ni Raica o Jisu na nodratou vakabauta.”²⁵ Na kaukauwa ni cakamana oya vei ira era a tiko rawa e vakavuna me “era kurabui, ka vakalagilagia na Kalou, ni solia e dua na kaukauwa levu vei ira na tamata.”²⁶

Taciqu kei na ganequ, me‘u tinia e na rua na ikuri ni noqu vakadidike. Kevaka e da daukaulotu, dauveiqaravi, peresitedi ni Soqosoqo ni Veivukei, bisopi, qasenivuli, itubutubu, veitacini, se itokani, e da vakaitavi taucoko vaka tisaipeli ni Yalododonu Edaidai e na cakacaka ni nodra kau mai na tamata ki vei Karisito. Na ivakarau e ratou vakaraitaka na lewe va e dodonu me da vakasamataka ka matanataka.²⁷ E ratou doudou, vakayaco-ka me rawa na inaki, kaukauwa, maqosa, vaka taledi e so, nuidei, vakabauta, yalomarau, yalomalumalumu, ka dau vosota.

Kena ikuri, e ratou vakaraitaka na lewe va na bibi vakayalo ni soqoni vata kei na sokalou.²⁸ Me rawa ni ratou kauti nodratou itokani ki vei Karisito, e ratou a yadua na tutu ni loga. Kevaka me a vakalaiva, e na dredre vakalevu na itavi. Kevaka me rua e sega ni vakayacora na nodrau itavi, e na sega ni rawa na itavi. Sa tu na noda dui itavi yadua me da qarava ena matanitu ni Kalou.²⁹ Ni da vakayacora na noda itavi, e da na na laveta tiko na noda tikina. Ke mani o Argentina se o Vietnam, Accra se o Brisbane, e dua na tabana se tabanalevu, na vuvale se daukaulotu, e tiko e dua na tikina me da laveta. Ni da vakayacora, ka kevaka e da na cakava vakakina, ena vakalougatataki keda kece vakataucoko na Turaga. Ni raica o Koya na nodratou vakabauta, e na raica talega o Koya na noda ka vakalougatataki keda.

E na so na gauna e na noqu bula, au sa colata na noqu tikina, eso tale na gauna o au saraga au tuberi. Na tiki bibi ni italanoa vakasakiti nei Jisu oya sa ikoya ni vakananuma vei keda na levu ni noda veigadrevi vakai keda, vaka veitacini, me da lako vei Karisito ka me veisautaki keda.

Oqo e vica na ka au sa vulica mai na noqu gauna kei Jisu e na Marika 2.

“Me vakalougatataki keda na Kalou me da [colata na noda tikina] ka me da kakua ni guce, ka me da kua ni rere, ia me da qaqa e na noda vakabauta, kei na noda sasaga e na noda cakacaka, me da vakacavara na inakinaki ni Turaga.”³⁰

Au vakadinadinataka ni bula tiko o Jisu, e kilai keda o Koya, ka tiko Vua na kaukauwa me vakabulai keda, veisautaki keda ka vosoti keda. Ena yacai Jisu Karisito, emeni.