“Meram in Mour,” Liaona, Jān. 2023.
Meram in Mour
Rilo̧mo̧o̧r Jisōs Kraist ej ad meram, ad mour, im ad iaļ—inne, rainin, im indeeo.
Meļeļe eo jān Focus on Joy, jān Michael T. Malm
Ilo an aļ tak ilo bar juon Jabōt ilo 1948 eo, ikar lo aō make etetal laļļo̧k itōrerein Reba Trent ilo Nottingham, England Āinwōt juon mijinede 20 iiō drettan, ej kab kar m̧ōj kūr eō āinwōt juon district būreejtōn. Ekar juon raan aitok, ekam̧ōkm̧ōk im obrak kōn kweilo̧k ko im jerbal in karejar, ak ikar em̧ōņōņō im m̧ōņōņō ilo jerbal in.
Ilo aō kar etetal itūrin reba eo, ikar jar ilo buruo. Kōjatdikdik ke inaaj en̄jake tōl jān Irooj, ikar kajjitōk, “Ij ke kōm̧m̧ane ta eo Kwoj kōņaan?”
Juon en̄jake eļap in aeņōm̧m̧an im meļeļe ekar jiktok ippa. Ilo iien eo ekadu, ikar jeļā bwe Jisōs Kraist ejeļā wōn n̄a im E ekar iakwe eō. Ikar jab loe juon visiōn ak ron̄ juon ainikien, ak iban kar jeļā kōn m̧ool im ekwojarjar in Kraist ekajoor eļapļo̧k n̄e E enkar jutak im̧aaō im kūr eō kōn eta.
En̄jake in em̧man im einem̧m̧an ekar ļōme mour eo aō. Jān raan eo n̄an rainin, aolep kālet ko aō reļļap ikar kōm̧m̧ane rekar bōk jikier kōn jeļā eo aō kōn Rilo̧mo̧o̧r. Ilōn̄in iiō ko im ilo eiten aolepān laļ in, em̧ōj aō kam̧oole bwe Jisōs Kraist ej Nejin Anij, Meram eo an Laļ in. Ej juon menin jeram̧m̧ān n̄an kōj n̄an itok n̄an E, n̄an ļoor E, im n̄an en̄jake meram eo An ilo mour ko ad.
Meram in Laļ
Juon bon̄ ilo elōn̄ iiō ko remootlo̧k ālkin en̄jake in aō iban melo̧kļo̧k ke ikar mijinede, kōrā eo pāleeō, Barbara, im n̄a kom̧ro ekar kalimjōkļo̧k lan̄. Ilo am̧ro kar kōm̧m̧ane wāween eo, ikar reilōn̄ļo̧k kōn bwilōn̄ kōn milien iju ko, ko rekar meram im aiboojoj bon̄in eo. Ļōmņak ko aō rekar oktakļo̧k kōn bwilōn̄ kōn naan ko an Irooj n̄an Moses: “Im laļ ko ejjeļo̧k oraer em̧ōj Aō kōm̧anm̧ani; im Iaar barāinwōt kōm̧anm̧ani n̄an kōttōpar eo Aō make; im jān Nejin Iaar kōm̧anm̧ani, eo ej Nejū Iaar Make.” (Moses 1:33).
Jān Rilo̧mo̧o̧r ekar itok kajoor eo me ekar ejaak im ekar kōmeram aļ, allōn̄ iju ko, im laļ in (lale Katak im Bujen Ko 88:7–10). E emaron̄ ba, “N̄a, meram in laļ; eo ej ļoor Eō e jāmin etal ilo marok, a enaaj an meram in mour” (Jon 8:12; bar lale Jon 9:5).
Ilo naan ko an Būreejtōn Dallin H. Oaks, Rikakpilōklōk eo Kein Kajuon ilo Būreejtōnji eo Eutiejtata, “Jisōs Kraist ej meram eo an laļ in kōnke e ej unin meram eo ej ‘erromaakļo̧k jān im̧aan mejān Anij n̄an kobrak ļap in lan̄’ [Katak im Bujen Ko 88:12].” Meram eo an Rilo̧mo̧o̧r ej “meram eo em̧ool eo ej kōmeram aolep armej ro rej itok ilo laļ in” (Katak im Bujen Ko 93:2; bar lale 84:46). Kōn meram in, jemaron̄ jeļā wāween ekajet “em̧m̧an jān nana” (Moronai 7:16). Meram in an aolepān laļ in, aolep im jeļā kake āinwōt “meram in m̧ool,” “Meram an Kraist,” im “Jetōb in Kraist.” (Katak im Bujen Ko 88:6; 88:7; Moroni 7:16).1
Rijilōk Paul ekar ba, “Meram ej romaak ilo marok, im marok ear jab bōk e” (Jon 1:5). Ilo raan kein ad, Setan ej jerbal eļap iien n̄an tōl ajri ro nejin Anij n̄an marok, pinejļo̧k “meram eo, im mour eo, im m̧ool eo an laļ” (Ether 4:12).
Jejjab maron̄ lukkuun meļeļe—ak kam̧oolol— Rilo̧mo̧o̧r im gospel eo An n̄e ej jako meram im m̧ool eo An ippād. To̧o̧n wōt ad ukweļo̧k im pokake, jerbal, im kabun̄jar n̄an E, jenaaj anjo̧ jān marok. Meram eo an ej kōjepļaaktok im joļo̧k ellōr ko an laļ in jān ioļapān mour ko ad im kōļmenļo̧kjeņ ko ad.
Kōjeram̧m̧an jān Meram eo
Ilo an laļin marokļok im ļapļo̧k tarpok, en̄jake meram eo an Irooj ilo mour ko ad maron̄ kalimjōke āinwōt juon apan̄. Ak Būreejtōn Russell M. Nelson ekar kakeememej kōj, “Marok in me ej ļapļo̧k ippān tok melijjon̄ ko rej kōm̧m̧an bwe meram eo an Jisōs Kraist en ļapļo̧k wōt an romaak.”2
Ikar lo bwe meram eo An ej romaakļo̧k ilo jetōb e aō n̄e ij kōm̧m̧an iien n̄an men ko an Jetōb ilo iien ko relūr, im ejjeļo̧k kawaron̄ron̄ āinwōt bon̄ eo ippān Barbara. Iien eo in n̄e im̧we ko an jetōb, tōl im meram ej itok n̄an kōj. Iien eo in n̄e jej meļeļe ad lukkuun jeram̧m̧an bwe ewōr ad Rilo̧mo̧o̧r.
Āinwōt Meram eo an Laļ in, Rilo̧mo̧o̧r ej kōmeram iaļ in jibadōk in ad ilo mour kōn waanjon̄o̧k im katak ko An (lale Jon 8:12). Ej kōmeraik eddo ko ad kōn iakwe im jouj eo An (lale Matu 11:28–30). Ej kōmeraik buruwōd kōn kōjatdikdik im kōmour kōn Pinmuur eo An (lale Moronai 7:41). Im ej letok jeļā eļapļok n̄an kōļmenļo̧kjeņ ko ad kōn “Jetōb in m̧ool” (Katak im Bujen Ko 6:15; bar lale 11:13).
Elder David A. Bednar jān Doulul eo an Jon̄oulruo Rijilōk ro ekar ba, “IIo aolep tōre ko ilo mour ko ad, ilo aolep jekjek ko jemaron̄ iooni, im ilo kajjojo idajon̄jon̄ jemaron̄ jelm̧ae, Jisōs Kraist ej meram eo me ej joļo̧k mijak, letok kallim̧ur im tōl, im ej kwaļo̧k aenōm̧m̧an im lan̄lōn̄ eo ej wōnm̧aanļo̧k wōt.”3
Elder Ballard ekar mijen ilo England jān 1948 n̄an 1950.
Kotak Ami Meram
Jeram̧m̧an in kajeeded meram eo an Rilo̧mo̧o̧r ippān ro jet im karuwaineneik er n̄an itok n̄an E im en̄jake iakwe eo An n̄an er ekar aorōk aolep iien ippa. Ikar m̧ōņōņō ke ikar juon mijinede ilo England. Ikar m̧ōņōņō ke ikar juon mijen president ilo Canada. Im ij m̧ōņōņō kōn kūr in aō kiiō āinwōt juon membōr in Doulul eo an Jon̄oulruo Rijilōk ro. Kūr in aō ej letok n̄an eō iien ko rem̧m̧an n̄an kam̧ool kōn Jisōs Kraist im kwaļo̧k enaan eo an kōn Jepļaaktok eo n̄an aolepān laļ in.
Etto, Rilo̧mo̧o̧r ekar ba n̄an rijilōk ro An:
“Kom̧ meram eo an Laļ. Jikin kweilo̧k eo ej pād ioon toļ, re ban ņooje. …
“Āindein en romak ami meram im̧aan mejān armej, bwe ren lo jerbal ko ami rem̧m̧an im nōbar Jememi i lan̄” (Matu 5:14, 16).
N̄an armej in Nipai ro, E ekar ba, “Lo N̄aij meram eo kom̧ naaj kotak lōn̄ļo̧k—men eo kom̧ ar lo Aō kōm̧m̧ane.” Ekar bar ba, “Kom̧ jeļā men ko kom̧ij aikuj kōm̧m̧an ilo kabun̄ eo Aō; bwe jerbal ko kom̧ ar lo Aō kōm̧m̧ani kom̧ naaj barāinwōt kōm̧m̧ani” (3 Nipai 18:24; 27:21).
Ilo raan kein ad, Rilo̧mo̧or ej bar kōtmene rijilōk ro An n̄an kōjerbale meram eo An n̄an “kokaklok marok jān ilubwilijin [kōj]” (Katak im Bujen Ko 50:25). Meram eo ad ej romaak ilo ad iakwe āinwōt an kar Jisōs iakwe. Meram eo ad ej romaak ilo ad kwaļok naan in kam̧ool eo ad kōn Jepļaaktok eo im ad kōjatdikdik ilo Kraist. Meram eo ad ej romaak ilo ad ļōn̄aj ainikied ilo dāpij m̧ool eo. Im ilo an meram eo ad romaak, jej kairuj ro jet n̄an ijo meram eo ej itok jene.
Leļo̧k jerbal in jipan̄, im konaaj en̄jake meram eo An ilo būruom̧. Jar ilo ettā n̄an iien ko rem̧m̧an n̄an kwaļo̧k kōn gospel eo, im naaj tōl eok n̄an ro rej pojak in bōke meram eo An. Iakwe ro jet ilo wāween ko reddik im reļļap, im komaron̄ kōm̧m̧an bwe laļ in en em̧m̧anļo̧k im meramļo̧k.
Kōmeļeļe jān Jesus Christ, jān Harry Anderson
Juon Meram eo Ejjeļo̧k Jem̧ļo̧kin
Eban jem̧ļo̧k aō kam̧m̧oolol kōn en̄jake eo ikar bōke ke ikar juon mijinede edik ilo England ke ikar jino jeļā ippa make ke Jisōs ej Kraist eo. Eļap aō jeļā menin rainin ilo an m̧ōj aō ioon im en̄jake māllijon̄ ko im m̧ōņōņō ko ilo mour in.
Aō jerbal ilo Kabun̄ in eaar kōjeraam̧m̧an n̄a kōn kabwilōn̄lōn̄ kōn jetōbin en̄jake ko rejenoļo̧k ko rellōn̄ im jet rekwojarjar n̄an ekōnono kaki. Ejjeļo̧k juon menin letok eļapļo̧k an aorōk me imaron̄ leļo̧k n̄an ajri ro nejū, jibū, jibū-jibū, im kwe, ro m̧ōtta ipeļaakin laļ in, jān kam̧ool eo aō em̧ool bwe Jisōs ej Kraist eo, eo Nejin Jemed Indeeo, Rilo̧mo̧o̧r im Ripinmuur eo an armej otemjelo̧k.
Kōrā eo pāleeō eaorōk, Barbara, ekar mej ilo 2018. Eļap aō kam̧m̧oolol kōn aō jeļā bwe kōn liāp eo am ilo tampeļ im kōn Jisōs Kraist, jenaaj bar mour ippān doon juon alen, ippān baam̧le eo am, n̄an indeeo.
Elōn̄ iien, ij m̧ōk. Ilo iien rōt in, ij bōjrak im lale pijaan Rilo̧mo̧o̧r eo. Ij ļōmņak kōn E ilo Gethsemene, innem, em̧ōkaj, aō jab bar m̧ōk. Ijeļā ilo buruō bwe kōnke E ekar anjo̧ ioon laļ, “bwe marok e jakoḷọk im meram e ṃool ej romaak kiiō.” (1 Jon 2:8).
Ijeļā bwe Jisōs Kraist ej mour. E ej …meram eo ejjeļo̧k jem̧ļo̧kin, eo emaron̄ jab tinaad” (Mosaia 16:9). E ej ad meram, ad mour, im ad iaļ—inne, rainin, im indeeo. Jen dim ilo ļoor E im romaak An meram imejān laļ in.