“N̄e E Emaron̄ Ukot Dren N̄an Wain … ,” Liaona, Jān. 2023.
Kabwilōn̄lōn̄ ko an Jisōs
N̄e E Emaron̄ Ukot Dren N̄an Wain …
Jilu men ko ikar ekkatak jān kabwilōn̄lōn̄ in ekkā kejool e.
Jon ej e wōt rijeje in Gospel ekar jeje kōn an Rilo̧mo̧o̧r eo ukōt dren n̄an wain (lale Jon 2:1–11). Em̧ool ekar kajoor an en̄jake kōn wāween eo n̄an an ba n̄an kōj ke ekar “jinoin kakōḷḷe ko An” an Rilo̧mo̧o̧r eo (Jon 2:11).
Ilo m̧anit, kaje ko rej itok jān an maat wain emaron̄ kar ko̧kkure etan ro rej eddoik iien eo. 1 Im ilo aō jab tōmak juon kabwilōn̄lōn̄ eļap āinwōt in n̄an ukot mour, ikar ļōmņak etke Jon ekar en̄jake ke kabwilōn̄lōn̄ in ekar ļap an aorōk iaan elōn̄ kabwilōn̄lōn̄ ko reļļap.
Etke Kabwilōn̄lōn̄ ko?
Etke kabwilōn̄lōn̄ ko rekar ļap aer aorōk ilo aolepān jerbal in karejar eo an Rilo̧mo̧o̧r ilo mour in? Ejjeļo̧k bere ke kōnke ekar m̧ōttan jouj eo an n̄an ro rej aikuj (lale Mark 1:41). N̄an kōmeļeļeik ļo̧k, kabwilōn̄lōn̄ ko rekar kam̧ool ko reaorōk kōn kajoor im maron̄ eo An ekwojarjar (lale Mark 2:5, 10–11). Iien ko reļļap im kabwilōn̄lōn̄ remaron̄ kōkajoorļo̧k tōmak im boktok ļōmņak n̄an ennaan eo An (lale Jon 2:11; 6:2).
Inne juon armej ekar kalikkar tok n̄an eō bwe kabwilōn̄lōn̄ ko an Rilo̧mo̧o̧r rekar jab wōt boktok armej n̄an eo̧ron̄ ennaan eo an; rekar barāinwōt jipan̄ katakin ennaan eo an.2 Ke ikar kajjitōk ippa make ta eo imaron̄ ekkatak kōn Jisōs Kraist im mijen eo An ekwojarjar ilo an kar ukot dren n̄an wain, ikar jino lo men ko rekāāl.
Erkein jet katak ko ikar ekkatak jān kabwilōn̄lōn̄ eo ilo Kana kōn Rilo̧mo̧o̧r im kajoor eo An n̄an kōjparok.
1. “Awa eo Aō e jan̄in itok”
Ke Meri ekar kajjitōk ippān Jisōs n̄an jipan̄, E ekar uwaak, “Awa eo Aō e jan̄in itok” (Jon 2:4). Ejjelo̧k kōmeļeļe eļapļo̧k, ejjab alikkar jān bok in Jon kōn lukkuun ta eo Mary ekar kōtmene ak meļeļein an Jisōs uwaak im ba bwe awa eo An ejjan̄in itok.
Wāween kōnono in ekar alikkar n̄an eō ke ekar aorōk. Bōlen Jisōs ekar kōnaan kōn jet iien ko rej itok wōt, ko āinwōt jinoun jerbal in karejar eo An ilo public. Ak ilo ejja iien eo wōt, wāween kōnono eo ekar kōban̄ijn̄ij ainikien ko ilo aolepān bok in Jon, ekkā an jitōnļo̧k kabwilōn̄lōn̄ eo āliktata in en̄taan in pinmuur eo An (lale Jon 4:21–23; 5:25–29; 7:30; 8:20). Āliktata, jentōj eo ekar bar āliji bar juon alen ilo jem̧ļo̧kin jerbal in karejar eo An ilo mour in, ke “Kōn an Jisōs jeḷā bwe awa eo An e moottok bwe En ilo̧k jān laļ in n̄an Jemān” (Jon 13:1, kar kobaiktok eoon eo aorōk; bar lale Jon 12:23, 27; 16:32). Im m̧okta jān An kar em̧m̧akūt jān Gethsemane, E ekar jar, “Jema, emoottok awa eo; Kwōn kaiboojoj Nejiṃ, bwe Nejiṃ en kaiboojoj Kwe” (Jon 17:1, kar kobaiktok eoon eo aorōk).
Loe an Jon bar āliji naan kein ilo aolepān bok eo an ekar jipan̄ eō loe jem̧ļo̧k eo jān jinoun. M̧okta, Jisōs ekar ukot dren n̄an wain n̄an joļo̧k maro ilo ānbwin. Innem, ilo āliktata, E ekar kōjerbal wain eo ilo kwojkwoj eo n̄an ņa jikin bōtōktōk In ear toorļo̧k, eo ekar kōm̧m̧an bwe mour indeeo en tōprak im kar kōm̧m̧an bwe ro rej tōmak ilo E rejjāmin bar maro (lale Jon 4:13–16; 6:35–58; 3 Nipaii 20:8).
“Men eo jabdewōt Ej ba n̄an kom̧, kom̧win kōm̧m̧ane”
Ālkin an kajjitōk ippān Jisōs n̄an jipan̄, “Men eo jabdewōt Ej ba n̄an kom̧, kom̧win kōm̧m̧ane.” (Jon 2:5). Ewōr juon katak ilo ennaan in im ilo kabwilōn̄lōn̄ in an āinļo̧k wōt ko ikōtaan bwebwenato in im bwebwenato in Josep in Egypt.
“Im ke e mat ekkan ilo aolepen āneen Ijipt, armej raṇ raar uññare Pero kōn ṃōñā; im Pero ear ba ñan ri Ijipt otemjej, “Koṃwin ilọk ñan ippān Josep; men eo ej ba ñan koṃ, koṃwin kōṃṃane” (Jenesis 41:55, kar kobaiktok eoon eo eaorōk).
Meri emaron̄ kar jab wōr an ļōmņak in kōm̧m̧ane ekkeid kein, ak bōlen Jon ekar jab bar. Ak ilo aō kile aer epaake doon, ruo ļōmņak ekar itok n̄an kōļmenļo̧kjeņ eo aō.
M̧okta, ikar loe bar juon wāween Josep im ro jet ilo Kallim̧ur M̧okta rekar kakkōl kōn Jisōs Kraist im mijen eo An. Ak, men eo eļap an aorōk, bwebwenato ko in Egypt im Kana rekar kōkeememej eō ke ejjab wōt ke Jisōs Kraist emaron̄ kōjparok kōj jān jerawiwi im mej kōn Pinmuur eo An—eo E ekar tokālik bōk jikin kōn pilawe im wain—ak E emaron̄ bar kōjparok kōj jān apan̄ ko ilo ānbwin im ļōmņak im ko jet. Ke ekar maat kijen armej ro pilawe, Pero ekar jiron̄ er n̄an kōm̧m̧ane jabdewōt men ko Josep ej ba. Rekar kōm̧m̧ane āindein im kar lelo̧k kijeer pilawe im kar kōjparok er jān en̄taan ilo ānbwin. Ke rijerbal ro an rekar maat ippāer wain, Meri ekar jiron̄ er bwe ren kōm̧m̧ane jabdewōt men Jisōs ej ba. Rekar kōm̧m̧ane āindein im kar leļo̧k wain, im ro rekar pād kar bar kōjparok er jān aer likjab ilo men ko kar kappeik er kaki.
Eļan̄n̄e jej m̧ōņōņō in kōm̧m̧ane jabdewōt men Jisōs ej ba, E emaron̄ kōm̧m̧ane kabwilōn̄lōn̄ ko ilo mour ko ad.
Balm of Gilead, jān Annie Henrie Nader, ejjab mālim kapeik
Eļan̄n̄e jej m̧ōnōņō in kōm̧m̧ane jabdewōt ko Jisōs ej ba, E emaron̄ bar kōm̧m̧ane n̄an kōj im kōm̧m̧an kabwilōn̄lōn̄ ilo mour ko ad (lale Hibru 10:35–36). N̄an bōk kōjparok ej kabwilōn̄lōn̄ eo eļaptata iaan aolep kabwilōn̄lōn̄ ko An, im ej aikuj pokake ilo ijo koņaad (lale Katak im Bujen Ko 14:7; Laajrak in Tōmak ko 1:3).
3. “Innām rekar tein̄i im lōn̄.”
Rilo̧mo̧o̧r ekar ba rijerbal ro an ren tein̄i nien dren ko kōm̧m̧an jān drekā kōn dren. “Innām rekar tein̄i im lōn̄.” (Jon 2:6–7).
Ilo an rimāletlet ro elmakot kōn jon̄an ko roktak, em̧m̧anļo̧k n̄e jej ba kajjojo iaan nien dren kein rej dāpij elōn̄ kōļan ko. Eļan̄n̄e epenļo̧k n̄an ukot juon kōļan n̄an 100 kōļan in dren n̄an wain, ijjab jeļā. Ta eo ekar ukot mour eo aō ej ļōmņak eo bwe Jisōs ewōr Ippān kajoor eo n̄an ukot juon men n̄an bar juon men eļap an oktak. Ekar jab wōt kōm̧m̧an lemen dren eo en oktak n̄an wain, Ekar bōk dren, kōn tu jejjōt in, im ukot e n̄an wain, juon iiōk eo eļap checmial eo rej likūt ippān doon n̄an kwaļo̧k.
N̄e emaron̄ kōm̧m̧ane men eo, innem E emaron̄ ukot māllijon̄ ko aō n̄an kōjeram̧m̧an—ejjab wōt kobaik tok juon kōjatdikdik n̄an juon lan̄ enana ak ilo m̧ool ukot māļijjon̄ eo n̄an bar juon men ne ej kōjeram̧m̧an eō (lale Rom 8:28; 2 Nipai 2:2).
Im eļan̄n̄e E emaron̄ kōm̧m̧ane n̄an juon apan̄, E emaron̄ kōm̧m̧ane n̄an aolepeer. Kōn menin n̄e mour obrak im lutōkļo̧k kōn māllijon̄, keememej bwe E emaron̄ ukōt dren n̄an wain. Emaron̄ ukōt bwidej in upaaj, (lale Aiseia 61:3). E emaron̄ bōk men eo e nana im ukōte n̄an em̧m̧an (lale Jenesis 50:20). E emaron̄ ukōt bōd ko aō n̄an eddōkļo̧k im bōk jerawiwi ko aō im ukoti jān kaje n̄an eddōkļo̧k.3
Im, n̄an eō, bwe kile im jeļā ej men eo eļap im aorōktata iaan aolep. Kabwilōn̄lōn̄ in bwe ikar kejool e ekar katakin eō bwe kōn kajoor eo An, n̄e ewōr ad tōmak n̄an kōm̧m̧ane ta eo Ej kajjitōk ippād, E emaron̄ ukōt kōj jān ta eo jekar m̧okta n̄an ta eo jemaron̄ erom̧—āinwōt E.