“Pād n̄an Ļaddik eo Nejūm̧” Liaona, Jān. 2023.
Ainikien Armej ro Rekwojarjar ilo Raan Ko Āliktata
Pād n̄an Ļaddik eo Nejūm̧
Ālkin an Jetōb ekōnono n̄an jema ilo iien priesthood ekkapit eo aō, ekar ukōt mour eo an.
Four Generations, jān Kwani Povi Winder
Ikar jino niknik ilo Kabun̄ in ke Uncle Bill ekar bōke sister ro ruo aō im n̄a n̄an Būraimere. Rikaki in Būraimere eo aō, Jean Richardson, ekar āinwōt juon jinō ejouj. Ekar lukkuun em̧m̧an ippa im ro m̧ōtta rōkāāl ilo mōn jar eo, ro rekar ļapļo̧k aer jouj n̄an eō jān ajri ro ilo jukjuk in ped eo aō. Kōn menin, ikar kālet n̄an pād wōt.
Ke ikar tōpar raan eo ikar ļōtak ie bwe en 12 aō iiō, Bisop Dal Guymon ekar kūr eō n̄an bōk Priesthood eo an Aron im ekkapit n̄an juon deacon. Ikar jab lukkuun jeļā ta meļeļein, ak ikar ba aaet. Innem ekar ba, “Etke kojjab kajjitōk ippān jem̧ōm̧ bwe en boktok eok Jabōt in laļ, im jenaaj kapit eok.”
Jema im baam̧le eo an rekar bōjrak aer jar ke ekar 13 an iiō. Āinwōt juon rūtto, ekar joļo̧k iien ko an ilo eiten aolep raan ko ilo jem̧ļo̧kin juon week ilo m̧ōn kadōk ko ak kōbwābwe ek. Ekar jerbal ilo US Navy ilo Pata eo Kein Karuo an Laļ in im ilo Pata ko an Rikorea. Ekar kōbaatat tabak, draak drenin kadōk, im kanijnij, bōtaab ekar em̧m̧an etan ilo jukjuk in ped eo am edik kōn an m̧ool im jim̧we.
Ke Jema ekar bōk eō n̄an jar Jabōt eo tok juon, ekar juon men eo eļap. Ke iien eo ekar itok, Bisop Guymon ekar kūrļo̧k eō im kajjitōk ippa n̄an jijōt ilo juon jeia. Jet em̧m̧aan—ak ejjab jema—rekar likūt peier ioon bōra im kōm̧m̧ane kain̄i eo.
Ikar en̄jake eddoin jet pā ko reļļap ioō. Jema, ekar jijōt ilo jeia eo jejjo ne ettoļo̧k, kar en̄jake juon kain en̄jake—ilo buruōn. Juon ainikien ekar ekōnono n̄an itulowa, ba “Kwoj aikuj pād n̄an ļaddik eo nejūm̧ ilo iien eo tok juon menin enaaj bar waļo̧k.”
Ilo wiik ko tokāļik, Jema ekar ukot mour eo an im jino etal im jar aolep Jabōt. Ejjab to, Kabun̄ in ekar oktak im erom̧ pedped eo ioļaptata in baam̧le eo am.
Jema ekar jino erom̧ rikapilōk eo aō ke pād ilo doulul eo an tikōn, rūkaki, im pris; aō rūkaki ilo kūlaaj in Jabōt Jikuuļ, im aō coach in basketball, softball, im volleyball. Ke kom̧ro ekar home teaching kam̧pānien, Jema ekar jipan̄ em̧m̧aan ro jet im baam̧le ko jepļaaktok n̄an m̧akūtkūt ko an Kabun̄ in.
Bōk tōl jān jema, ikar en̄jake aō make oktak. Jān iien eo, ikar kajjeon̄ mije em̧m̧aan ro rej, āinwōt jema, remaron̄ uwaake kūr eo n̄an erom̧ baba eo em̧m̧antata me remaron̄ erom̧.
Eban jem̧ļo̧k aō kam̧oolol kōn ta eo Uncle Bill, juon rūkaki in Būraimere, juon bisop ekapeel, im jema rekar kōm̧m̧ane n̄an eō 60 iiō ko remootļo̧k.