“N̄e Nan̄inmej in Chronic Ej Iooktok Eok,” Liaona, Jān. 2023.
Rūttoļo̧k ilo Tiljek
N̄e Nan̄inmej in Chronic Ej Iooktok Eok
Mour ippān māllijon̄ ko raan im raan emaron̄ jipan̄ kōj eddōkļo̧k ilo tūriam̧o, jouj, im peran.
M̧okta jān an kar mej jān juon nan̄inmej ekam̧ōjņo̧ņo̧, jinō ekkut an kijon̄ ettōn̄ dikdik im ba “Ejjeļo̧k iaad enaaj diwojļo̧k jān ijin ak emour, kōn menin jej aikuj kawōr tokjen jabdewōt men ewōr ipped.”
Kar ilo raan ko an rem̧m̧an. Im ilo mour eo an, ekar kanoojin lōn̄ raan ko rem̧m̧an.
Ak ekar bar wōr raan ko rekar jab lukkuun em̧m̧an. Ilo raan rōt in ekōn ba, “Bōk ta eo ej itok n̄an eok im lale n̄e komaron̄ wōt kōm̧m̧an jet em̧m̧an ilo laļ in.”
Ipeļaakin laļ in, armej aitokļo̧k aer mour jān kar jem̧aan.1 Ak men̄e aitok ad mour, epidodo n̄an ad bōk nan̄inmej in chronic, tōn̄al, wūdiddid, kāānjōr, inepata, eppaļ, im laajrak eo ej etal wōt. Kōn menin, n̄e nan̄inmej in chronic ej iooktok eok, ekōjkan am̧ naaj jelm̧aeiki?
Wōnm̧aanļo̧k kōn Tōmak
“Jelm̧aik al eo, men̄e kojjab jeļā etan tune eo,” juon bratōr kar akweļape bwe en bōk raan in kakkije kōn wōtamwe ilo ānbwin ilo an kōrā eo pāleen jepļaak im jerbal n̄an kakke aikuj ko an baam̧le eo aer. Ej tōmak bwe ekkā ad likūt mejen m̧ōņōņō ipped me ej bōbraeik kōj jān ad lukkuun jerbale en̄jake ko ad im kōkm̧anm̧anļo̧k ļōmņak ko ad. “Ijello̧kin ad wōnm̧aanļo̧k kōn tōmak, jej bōjrak im jab kōm̧m̧an jabdewōt ilo ad kōttar juon kabwilōn̄lōn̄ ak ellewetak n̄e ejab tok juon,” ej ba. Ej bōk an kajoor ilo an ron̄jake jeje ko rekwojarjar im katak ko ilo kweilo̧k eo eļap im ilo an loļo̧k ro m̧ōttan im kenono ippen baam̧le eo an ilo taļeboon.
“Ej menin kam̧ōjņo̧ņo̧ ko rej waļok kajjojo raan me remaron̄ kōm̧m̧an menin aō m̧ōjņo̧,” juon sister ekar ba eo me ļāeo pāleen enan̄inmej in chronic. “Ājmour eo an eo pāleeō ejjamin naaj em̧m̧anļo̧k. Ij tōmak men eo. Ak jerbal eo ekain̄taanan iaan aolep men, jerbal ko ilowaan em̧ relukkuun kam̧ōkm̧ōk ilo ļōmņak, ānbwin, im jetōb. Ej kam̧m̧oolol kōn lotok ko jān sister in jerbal in karejar ro an. “N̄e rej itok ej lukkuun ilo m̧ool kōmeram raan eo aō.”
“Jet iien, kom̧ro kōrā eo pāleeo̧ ej meļo̧kļo̧k men ko im matōrtōr e doon,” juon brother eļōļlap ej ba. “Jej matōrtōr e ad emālele, im eļaptata ajeļok ālkin ad ba naan ko reddo n̄an doon.” Rekar ekkatak n̄an kōm̧mani noot ko n̄an jipan̄ doon keememej. Rej kōtļo̧k an doon bōk iien n̄an kamed būruer m̧okta jān aer ekkōnono. “Im,” ej ba, “jekar ekkatak eļapļo̧k kōn aorōk in ba, ‘Kom̧m̧ool,’ im ‘Ij iakwe eok.’”
Bar jet ripālele rerūtto rekar mour kōn jāān ko em̧ōj kōjenolo̧ki m̧ae iien eo wōņeen uno ko nimeer rekar ruo alen ļapļok. Kam̧oolol n̄an ro uwaan baam̧le ko aer im ward eo aer, kar maron̄ kakke aikuj ko aer. “Kar m̧okta kom̧ro ekar jook n̄an kajjitōk jipan̄, eļaptata jān ajri ro nejūm̧ro” brother eo ekar ba. “Ak aolep rekar kijooror n̄an jipan̄.”
Kōmeļeļe jān He Healed Many of Diverse Diseases, jān J. Kirk Richards, emaron̄ jab aikuj kapeiki
Elmakot ko im Ekkatak ko
Erkein rej jet elmakot ko im ekkatak ko jān ro rekar ioon nan̄inmej in chronic:
-
Ro rej oktakļok n̄an Rilo̧mo̧o̧r renaaj lo kōjatdikdik. “Ikar ļōmņak ejjelo̧k enaaj kar meļeļe ta eo ij ioone,” juon bratōr ewōr ippān chronic fatigue syndrome (CFS). “Innem juon Jabōt ilo aō kar bōke kwojkwoj eo, ikar kile bwe Rilo̧mo̧o̧r ekar meļeļe bwe ikar en̄taan. Ikar jeļā bwe ikar maron̄ wōnm̧aanļo̧k wōt jān aō kepaakļo̧k E.” (Lale Alma 7:11–12; Katak im Bujen Ko 121:8; 122:8.)
-
Tūriam̧o̧ ej ļapļo̧k ilo ro rej “kijejeto em̧m̧an” (Katak im Bujen Ko 121:8). “Wōn eo jej kappukot, ilo raan in būrom̧ōj im jorāān, n̄an jipan̄ im kaeņōm̧m̧an? … Rej em̧m̧aan im kōrā ro rekar en̄taan, im jān en̄jake eo ekar ilo aer kar en̄taan rej boktok naan in būrom̧ōj āinwōt kōjeram̧m̧an ko n̄an ro rej kiiō aikuji. Remaron̄ kar ke kōm̧m̧ane menin n̄e rekar en̄taan ippāer make?”2
-
Juon raan ilo̧k juon ilo juon iien. “Jet iiō ko remootļo̧k, metak eo ekar ļap im ikar jab loe aō maron̄ kar wōnm̧aanļo̧k kake. Ikar jino aō en̄jake kōņaan bōke mour eo aō make” juon sister ej en̄taan jān multiple sclerosis (MS) ej ba. Ej make kadeļo̧n̄ e make ilo hospital eo an ro rej nan̄inmej ilo kōļmenļo̧kjeņ. Ilo iien counseling eo, m̧atto eo an ekar jab wōt “niknik n̄an jem̧ļo̧kin” (1 Nipai 22:31) ak ijello̧kin “niknik n̄an jem̧ļo̧kin raan eo.”
-
Ejaaki kōņaan ko rekāāl im kappukot wāween ko rekāāl n̄an jerbal in jipan̄. Ijjelo̧kin būrom̧ōj kōn ta eo kojjab maron̄ kōm̧m̧ane, kappukot men ko rem̧m̧an rekāāl. Juon sister ewōr ippān MS ekar lo bwe ekar jab maron̄ kōm̧mani men ko ekar iakwi m̧okta, āinwōt iuwe ilo kidia ak ikkure ākiu. Ijjeļo̧kin, ekar ekkatak calligraphy. Kiiō ej kōjerbal tōļōņ eo an ekāāl n̄an kōm̧m̧āni illuminated manuscript in Bok in Mormon n̄an baam̧le eo an.
N̄E nan̄inmej in chronic ekar oktak im jelōt mour, em̧ool ej juon men eo epen. Ak kōn tōmak, kōjatdikdik ilo Kraist, im juon ikdeelel n̄an wōnm̧aanļo̧k n̄an jerbal in jipan̄, mour ippān māllijon̄ ko raan im raan emaron̄ jipan̄ kōj eddōkļo̧k ilo tūriam̧o, jouj, im peran.
Rijeje eo ej jokwe ilo Utah, USA.