“Kappukot Karōk eo Ekwojarjar ilo Baam̧le eo Am “Ejjab Boļōmen,” Liaona, Jān. 2023.
Rūm̧m̧an Ded ro
Kappukot Karōk eo Ekwojarjar ilo Baam̧le eo Am “Ejjab Boļōmen
Jab pād ilo juon baam̧le eo “eboļōmen” ilo mour in emaron̄ juon men ekōmetak, ak jemaron̄ kōjerbal jekjek ko jej iooni n̄an epaakeļo̧k Rilo̧mo̧o̧r eo.
Kōmeļeļe ko jān David Green
Ejjeļo̧k juon men ej boktok en̄jaake em̧wilal in, lan̄lōn̄, akweļap, im metak jān jemjerā ko me rej pād ioļapļap in mour ko ad ilo mour in—jemjerā ko an baam̧le ko ad. Im kōnke jemjerā kein relukkuun aurōk ippād, ritōl ro ad ilo Kabun̄ in rekar bōk im̧we n̄an ejaake “Baam̧le Eo: Juon Naan in Kean̄ N̄an Laļ in.”1 M̧ool ko an rej kam̧ool kōn juon Jemā eo ej akweļap n̄an kōj n̄an jeļā karōk eo ekwojarjar me ej tōl n̄an m̧ōņōņō indeeo ilo mour an baam̧le.
Būreejtōn Henry B. Eyring, Rikakkpilōklōk eo Kein Karuo ilo Būreejtōnji eo Kein Kajuon, ekar katakin: “Kōnke Jemed ej iakwe arji ro nejin, ejjāmin kōtļo̧k kōj make n̄an kajidede kōn ta ko reaurōktata ilo mour n̄an jeļā ia eo ļōmņak ko ad remaron̄ boktok m̧ōņōņō ak oktak ko ad emaron̄ boktok būrom̧ōj.”2 Menin ekūtbuuj eddo ko rekwojarjar im rellōn̄ an baam̧le me jemaron̄ bōk ilo mour in: leddik ak ļaddik eo nejin, sister ak brother, m̧am̧a ak baba, aunt ak uncle, būbū ak jim̧m̧a.
M̧ool ko ilo naan in kean̄ an baam̧le eo ej kōmeram ial eo n̄an “boļōmen eo an indeeo” me elōn̄ iaad jej lukkuun kōņaan—jemjerā ko rekajoor, rekam̧ōņōņō ilo baam̧le indeeo. Jorāān eo in ej bwe jej mour ilo “mour in em̧ool.” Im kōta eo ikōtaan “m̧ool” im “jejjōt” emaron̄ kōmetak. Jet iien, ijjello̧kin ad loe āinwōt juon meram n̄an tōl kōj, jemaron̄ en̄jake an naan in kean̄ eo an baam̧le āinwōt juon kein kakemeemej ekabūrom̧ōjm̧ōj kōn ia eo jekar “likjab” ie n̄an kōtoprak men eo “jejjōt.”
-
Emaron̄ wōr ad ikdeel n̄an m̧are ak jejjab loe an maron̄ tōprak.
-
Emaron̄ m̧ōj ad m̧are ak jej ioon jepel eo ekabūrom̧ōjm̧ōj.
-
Emararon̄ wōr ad ikdeelel n̄an nejnej ajri ro jejjab maron̄ neje.
-
Emaron̄ m̧ōj ad kar ioon ko̧kkure ilo jemjerā ko an baam̧le ko jekar lōke.
-
Emaron̄ m̧ōj ad ioon metak eo eļap kōn kālet ko an ro uwaan baam̧le jej iakwe.
-
Jemaron̄ en̄jaake ad jenolo̧k men̄e eo jon̄an kijejeto ko ad jej kōm̧m̧ani n̄an boktok ippen doon ilubwilijin ro jej iakwe er.
-
Jemaron̄ jako ad tōmak jān an jab kūrm̧ool akweļap ko im kallim̧ūr ko.
Ilo m̧ool, aoleped jenij jeļā mālijjon̄ ko, metak, im kabūrom̧ōjm̧ōj ko ilo mour in baam̧le—jet eļapļo̧k jān jet. N̄an jet jon̄an, aoleped ban tōpar jon̄o̧k ko rejjejōt em̧ōj kalikkari ilo naan in kean̄ eo an baam̧le.
Men eo jemaron̄ jab kile ej karōk eo ekwojarjar ilo men eo ej waļo̧k.
Kappukot im Ajeļo̧k n̄an Rilo̧mo̧o̧r
Āinwōt juon kōrā eo ejjeļo̧k pāleen eo eto an kōņaan m̧are im kōņaan nejin, ij ikdeelel im tōmak bwe juon iaan un ko reaurōk ilo mour e aō ej n̄an tōprak ilo wāween mour in baam̧le eo kar kwaļo̧k ilo naan in kean̄ eo an baam̧le. Ak jekdoon kijejeto ko aō rekar m̧ool, ikar jab loe aō maron̄ kōtōpraki ilo wāween eo ikar tōmak ke renkar. Apan̄ in ekar kōmmetak.
Jet iien, ijjab maron̄ loe jerbal in kabwilōn̄lōn̄ eo Irooj ej boktok ilo buruo ilo apan̄ in.
Erreilikļo̧k, akweļap ko aō rekar jab kūrm̧ool rekar jerbale juon eddo ekwojarjar ilo aer dāpij buruō n̄an Ripinmuur eo n̄an kappukot aeņōm̧m̧an im tōl jān E eo me e wōt emaron̄ kar letok im kam̧wilaļļok lōke eo aō ilo iakwe im kajoor in kōmaron̄ eo An. Jar im ekkatak jān jeje ko rekwojarjar aolep raan, im eļaptata naan ko jān kweilo̧k eo eļap, rekar erom̧ jikin bōk kōjatdikdik im tōl. Ikar en̄jake an menin aikuj n̄an aō oktakļo̧k n̄an nan ko ilo kōjeram̧m̧an eo an petriak eo aō—im kōjeram̧m̧an ko jet an priesthood—n̄an kappukot iakwe im tōl me rekar n̄an eō make jān Jemed Indeeo.
Ilo aō lutōkleplep buruō n̄an Irooj, men̄e kar kapoik eō n̄an eļļo̧k ilo illu, im̧we ko rekwojarjar rekar itok n̄an kōļmenļo̧kijeņ eo aō im buruō me rekar kalikkar n̄an eō bwe E ejeļā ia eo ij pād ie, bwe mour ewōr juon karōk aiboojoj mour e aō, im bwe imaron̄ kar lōke E. Bujen ko3 an Rilo̧mo̧o̧r eo aō rekar oktak im men ko rej kwaļo̧k aeņōm̧m̧an eļap im lan̄lōn̄ eo reļā ilōn̄in̄ļo̧k jabdewōt jikin ko rej kwaļo̧k tōprak im m̧ōņōņō.
Ikar loe bwe men̄e ikar tōmak ke un eo unin mour eo aō ej n̄an katōprak ettōņak ko aō kōn juon baam̧le eo ebooļmen, ak Irooj ekar kōm̧m̧an bwe en tōprak ta eo Elder Jeffery R. Holland jān Doulul eo an Jon̄oulruo Rijilōk ro ņae etan un eo aurōktata ilo mour in. Kakkobaba tok jān Kiin̄ Benjamin, ekar ba, “Bōlen un eo aurōktata … ej n̄an erom rikwojarjar kōn pinmuur eo an Kraist Irooj, im erom āinwōt juon ajri, ettā, ineem̧m̧an, obrak kōn iakwe, m̧ōņōņō in ajeļo̧k e n̄an aolep men ko Irooj ej lo ekkar n̄an kaddoik ņa ioon, em̧ool āinwōt juon ajri ej ajeļo̧k e n̄an jemān’”4
Aikuj eo aō kōn jipan̄ im kōkajoor an Rilo̧mo̧o̧r ekar tōl eō n̄an kappukot im en̄jake bōro in ajeļo̧k, ineem̧m̧an, ettā, kijenmej, im iakwe eo An. Ilo jerbale eo ikar oktak jān kajoor in kōmaron̄ eo An. Im ilo m̧ool, men eo ej ta eo ikar lukkuun kōņaan ilo tum̧wilal in buruō. Men eo kar loe aaet “ejjab jejjōt” ekar kōmetal iaļ eo n̄an men eo eļap an “ejjejōt” im aiboojoj.
Eo m̧ōtta rijerbal Ty Mansfield ekar kōmeļeļeik ejja āinļo̧k wōt m̧ool in. Āinwōt juon em̧m̧aan eo ewōr an kōņaan ippen bar em̧m̧aan, Ty ekar kam̧ool eddōkļo̧k ilo jetōb eo me jemaron̄ bōke ilo ad an̄kōeik mour ko ad ilo Jisōs Kraist im kōņaan leļo̧k aolepen buruōd n̄an E, kōtļo̧k An kakwojarjar aolep men ko reppen jej iooni n̄an em̧m̧anļo̧k eo ad. N̄an Ty, menin ekar ijjinoe ke Jetōb ekar katakin e bwe “jekdoon em̧are ak jaab, Anij ej iakwe eō im bōk eō. Eddo eo aō ekar n̄an wōnm̧aanļo̧k im mour juon raan illo̧k juon ilo aō kappukot tōl eo an Jetōb.”5 Im āliktata, lōke Anij ekar tōl Ty n̄an deļo̧n̄e juon m̧are eo elan̄lōn̄, aiboojoj, indeeo n̄an kōrā eo pāleen.
Ejaake juon Jemjerā Em̧wilaļ ippān Rilo̧mo̧o̧r eo
Āliktata bar n̄a ikar m̧are ālikin aō kar ļōmņak eļan̄n̄e in kar ke maron̄. Ak aikuj eo n̄an lukkuun an̄kōik eō ilo m̧wilaļ ilo Jisōs Kraist ej wōnm̧aanļo̧k wōt, ak eļan̄n̄e ejjab ekar kajoorļo̧k, jān ke ikar liāp n̄an ļāeo pāleeō. Ikar bar jinoe kappukot E n̄an aeņo̧m̧m̧an ilo aō kar en̄taan kōn aō jab maron̄ neje. Ikar jab jeļā wāween aō naaj kar maron̄ bōk lan̄lōn̄ eo ikar kōjatdikdik kake n̄an baam̧le eo aō ilo an ejjeļo̧k ajri. Ak jekdoon ālkin kar ļāeo ippa im n̄a kar jeram̧m̧an kom̧ro kōn ruo ajri, emakijkij aō ļōmņāk wōt kōn m̧ōjņo̧ ko aō āinwōt juon m̧am̧a. Men̄e ikar āliktata bōk ta eo eto wōt aō kar baj kōņaan, ilo jet wāween ko, kōta eo ejjeļo̧k kobban ikōtaan “jejjōt” im “m̧ool” e rekar ilo lale eddōkļo̧k.
Jekjek kein rekar karuwaineneik eō n̄an bar ļōmņak kōn un ko unin mour in im jekjek eo ekwojarjar im em̧ōj kajenolo̧k e eo jej eddōkļo̧k ie. Bōlen unin mour in ejjab n̄an bōk juon baam̧le eo ebooļmen. Ak eo eboļōn ejjab likun wōr ilo mour in. Bōlen baam̧le ej, ijjeļo̧kin, juon iien em̧m̧an n̄an eddōkļo̧k
Ilo m̧ool, bōlen men eo me jej ioone me eļap an kōmmetak “ped ium̧win boļōmen” ej ilo m̧ool kakūrm̧ool un eo ekwojarjar in karuwaineneik eddōkļo̧k eo jej aikuji n̄an jemjerā ko “rejejjōt”. Bōlen kajoor eo ej pād ilo m̧ool eo bwe kōta eo eļap ikōtaan m̧ool eo im jemjerā em̧ool im jejjōt ej karuwaineneik kōj n̄an juon jemjera em̧wilaļļo̧k ippān Jisōs Kraist ijo E ej kōmour im kakwojarjar ta eo erūb, kalōk māletlet, kajoor, im iakwe ilo wāween eo. Kabwilōn̄lōn̄, ej ilo jouj im pinmuur eo An, im E wōt, me emaron̄ jipan̄ kain armej rōt in ilo kain jemjerā ko me jej kappukot n̄an bōk ilo aelōn̄ in lan̄.
Em̧ōj aō kiiō tōmak bwe “wānōk” ejjab maron̄ tōpark ilo jemjerā ko an baam̧le, n̄an jabdewōt—ilo mour in. Ak m̧ool, erreo, im lukkuun epaake doon rej. Ilo m̧ool, riab in ak kōtmene ke kowānōk enaaj bōbrae jān lukkuun epaake Anij, baam̧le ko ad, im ro jet. Ijjelo̧kin, ilo ad kōtļo̧k an Kraist loe kōj make n̄an loe ilo lukkuun m̧ool eo, baam̧le ko ad, im ro jet, ekoba aolepen men ko me reped “ium̧win boļōmen,” jemaron̄ karuwaieneneik kajoor in kakwojarjar eo An n̄an mour eo ad. Jemaron̄ en̄jake kajoor eo ekwabwilōn̄lōn̄ An n̄an kajim̧we men ko maron̄ kar jab kajim̧we, koorak kōj kōn iakwe eo An, im ukōt kōj n̄an jet armej ro me ewōr ippāer jemjerā eo em̧wilaļo̧k Ippān im ro jej iakwe er.
Bōlen un eo ekwojarjartata an naan in kean̄ eo an baam̧le ej n̄an lukkuun kalikkar n̄an kōj bwe kōn Jisōs Kraist, baam̧le eo “boļōmen” emaron̄ juon kōttōpar eo indeeo jan kajjojo iaad.
Āinwōt ļaddik ro im leddik ro nejin Jined im Jemed Ilan̄, jej pād ilo juon baam̧le eo n̄an indeeo. Men eo ejenolo̧k jej ioone ilo mour in ej juon iaan m̧ōttan ko reaurōktata ilo karōk eo an Jemed n̄an jipan̄ kōj eddōkļo̧k im “āliktata kile kōttōpar eo [ad] kwojarjar āinwōt ro rej m̧ōttan mour indeeo”6—ejja en̄jake ko wōt an baam̧le E ekar iooni, ijoke oktak jān jejjōt eo an baam̧le eo am kiiō. Āinwōt an Elder D. Todd Christofferson jān Doulul eo an Jon̄oulruo Rijilōk ro kwaļo̧k: “Pinmuur eo an Jisōs Kraist ej kōtmene im, ilo jem̧ļo̧k in, jenaaj ņa wōņāān aolep karmejete im jerwaan n̄an ro me rej oktakļo̧k n̄an E. Ejjeļo̧k juon ej jitōn̄e n̄an bōk edikļo̧k jān aolep men Jemen ewōr ippān n̄an ro Nejin.”7
Ejjeļo̧k oktak āinwōt an kar Irooj kallim̧ūri Jekab ilo ibwiļōn apan̄ ko an ilo baam̧le eo an “ejjab boļōmen”, “Ij pād ippaṃ, im Inaaj oņaake eok ijo ko otemjej kwōj ilọk ieḷọk, im Inaaj bar ān̄intok eok ñan [m̧weo]; bwe I jāmin ilo̧k jān eok, n̄an iien em̧ōj Aō kōṃṃan men otemjej Iar ōnono n̄an eok kake” (Jenesis 28:15). Ilo ad ļoor E, jekdoon ta ko rejjab jejjōt jej iooni ilo mour in, E eban “kōtļo̧k kōj,” m̧ae jenaaj erom̧ aolepen ta eo jekar ikdeelel n̄an erom, koņ ippān jemjerā ko ad relan̄lōn̄ indeeo ilo baam̧le.