“Ko̧kkure, Kōkaajriri— im Kōmour,” Liaona, Jān. 2023.
Rūm̧m̧an Ded ro
Ko̧kkure, Kōkaajriri— im Kōmour
Baam̧le eo aō ekar ļap ko̧kkure ie im kar jab koņ, ak kōn Kraist, ijeļā bwe kiiō ewōr aō kōjatdikdik n̄an baam̧le eo aō ilju im jakļaj.
Pija ko likūti jān m̧atōļ
Ikar ruttoļo̧k ilo juon mejatoto eo ejjab koņ. Ro lukkuun jinō im jema rekar ko̧kkure im jab em̧m̧an aer lale n̄a, im ikar ioon elōn̄ apan̄ ko reppen. Ikar ire ippān en̄jake in imijakjak im ikūm̧kūm̧ eo aō, ļōmņak ko rekam̧ōjņo̧ņo̧ kōn wāween lale ānbwinū, dik aō m̧ōn̄ā, im inepatata wōt me rekar likwoj eō āinwōt juon rikalbuuj ium̧in iiō.
Ro lukkuun jinō im jema rekar liāp ilo tampeļ, ak ejjab to tokālik in aō kar peptaij ke ikar ruwalitōk aō iiō, rekar jino ettoļo̧k jān Kabun̄ in. Im ilo aer ettoļo̧k ļo̧k wōt jān bujen ko aer, wāween am mour ekar nanaļo̧k wōt.
Ilo 14 iiō, ikar eo ej bōk eddoin im lale ļaddik eo jatū me ewōtam̧we im jinō. Ikar jābwābwe im jaje in ta. Ikar drike n̄a make im jekjek eo ij pād ie im tōmak bwe mour eo aō ejjāmin naaj oktak.
Bōtaab juon kabwilōn̄lōn̄ ekar waļok. Eo lukkuun jinō ekar kile bwe ekar jab maron̄ lale eō im kūrļo̧k brother eo an ilo Singapore im kajjitōk ippān eļan̄n̄e emaron̄ kōkaajriri eō. Ippān bāāk ko em̧ōj kanni im mej ko robrak kōn drenin kemjaaļaļ, ikar iuwe ilo baļuun eo n̄an ijjino juon mour ekāāl—juon eo enaaj ejjeļo̧k ko̧kkure ie. Kajjeon imminene n̄an baam̧le eo aō rekar kōkaajririki eō ekar juon men eo epen, im ekar apan̄ aō wōnm̧aanļo̧k.
Ro jinō im jema rekar kōkaajririki eō rekar kōm̧m̧ane aolep men remaron̄ n̄an jipan̄ eō. Ikar loļo̧k therapist ro im taktō ro. Ikar barāinwōt bar jinoe etal im jar, ak ekkatak kōn Jemedwōj Ilan̄ eo ej iakwe eō im ewōr juon An un n̄an eō ekar pen, kōnke ikar jab tōmak ālkin aō kar en̄taan.
Ikar jab m̧ōņōņō. Iaar jab jeļā wāween n̄an aō mour jān mour eo m̧okta im ikar en̄jake wōt an ejjeļo̧k kōjatdikdik kōn ilju im jakļaj.
Ikdeelel n̄an Bōk Kōmour
Juon raan, ikar kejokļo̧kjeņ kōn wāween an kadu mour in. Ikar jab kōņaan joļo̧k aolepān mour eo aō ilo jab m̧ōņōņō. Ikar aikuj ekkatak jān māllijon̄ ko aō, mour kōn pedped in katak ko an gospel em̧ōj katakin eō, im karuwaineneik Kraist n̄an mour eo aō.
Ikar bōk tōmak im jinoe bukwelōlō im kajjitōk ippān Jemedwōj Ilan̄ kajjojo raan kōn kajoor eo n̄an jeorļo̧k an lukkuun ro jinō im jema bōd, n̄an ukot mijak eo aō n̄an tōmak, n̄an kappukot kōmour im m̧ōņōņō, im n̄an kile iakwe ilo mour eo aō. Ikar etal n̄an institute im jinoe ekkatak jeje ko rekwojarjar im mour kōn m̧ool ko an gospel ilo mour eo aō.
Ikar lukkuun kappukot ilo m̧ool kajoor in kōmour eo an Jisōs Kraist im Pinmuur eo An. Im ilo ium̧win iien aitok, mour eo aō ekar jinoe an oktak. Ilo aō kar kijenmej, bōk uno in kainem̧m̧an im ājmour, im kobrak mour eo aō kōn Jetōb kajjojo raan, ikar jinoe mour: ikar en̄jake an dikļo̧k aō makeļo̧k im ļapļo̧k aō āinwōt eō make. Ikar en̄jake kōjparok. Ikar jerbal n̄an ro jet. Ikar iakwe, jeorļo̧k bōd, im m̧ōņōņō ippa make. Ikar kalōk jemjerā ko rājimourur im wōr iakwe ie. Ikar jinoe en̄jake iakwe eo an Jemedwōj Ilan̄ n̄an eō. Im ilo jinointata ilo mour e aō, ikar en̄jake lan̄lōn̄.
Kraist Ej Letok Kōjatdikdik n̄an Ilju eo Ad
Ijjab maron̄ ukōt mour eo aō m̧okta, bōtaab āinwōt an Katak im Bujen Ko 122:7 ba, “Aolep men kein otemjeļo̧k renaaj lewōj n̄an [n̄a] imminene, im naaj n̄an em̧m̧anļo̧k eo [aō].” Ijeļā kiiō bwe Rilo̧mo̧o̧r ekar kōkajoor eō ilo apan̄ ko aō. Men̄e kōn er, ikar eddōkļok kōn ikdeelel eo aō n̄an oktak im kōnke ikar wōnm̧aanļo̧k wōt im oktakļo̧k n̄an E.
Eļan̄n̄e kwoj pād ilo juon jekjek epen an baam̧le, jeļā bwe ewōr juon Jem̧am̧ Ilan̄ eo ejeļā wōn kwe im ej iakwe eo im enaaj kōpeļļo̧k kōjem ko n̄an juon ilju eo emeram. M̧okta jān aer kar kōkaajririki eō, ikar ba n̄an eō make bwe jekjek ko ilo mour eo aō rejjāmin naaj kar oktak, im bwe ijjāmin naaj m̧are ak wōr nejū ajri kōnke ikar mijak bwe renaaj kar en̄taan āinwōt n̄a. Ak em̧ōj aō ekkatak bwe jekdoon ta apan̄ ko jej iooni ilo baam̧le ko ad, jemaron̄ kappukot Kraist, jemaron̄ kalōk m̧oko imōd ilju im jakļaj im baam̧le ko ad indeeo kōn kōjatdikdik, m̧ool ko an gospel, im iakwe.
Āinwōt an Elder Clark G. Gilbert jān Jiljilimjuonn̄oul kar katakin: “Kōj aolep … jej ijjinoe ilo jikin ko roktak kōn jon̄ak ko an mour in roktak. Jet rej ļotak tok kōn kapojrak ak intercept ko reutiej, obrak kōn iien ko rem̧m̧an. Ro jet rej jelm̧ae … jekjek ko me reppen. … Innem jej wōnm̧aanļo̧k ilo eddōk ilo juon slope in eddōkļo̧k an juon armej make. Ilju im jakļaj eo ad enaaj alikkar ejjab eļap jān ia eo jekar ijjinoe ie ak eļapļo̧k jān slope eo ad. Jisōs Kraist ej loe jon̄ak eo ad ekwojarjar jekdoon ia eo jej ijjinoe ie. … Enaaj kōm̧m̧ane aolep men E emaron̄ e n̄an jipan̄ kōj ukōt slope ko ad n̄an aelōn̄ in lan̄.”1
Jekdoon ta jekjek ko am̧, ewōr kōjatdikdik im kōmour loe ilo Jisōs Kraist. E ej pād ippam̧, im E enaaj tōl eok n̄an aeņōm̧m̧an im lan̄lōn̄ ilo am̧ kappukot E—aolep iien.