Katak ko Reļam Waan an Gospel eo

Baam̧le Ko Rej N̄an Indeeo

Baam̧le eo ej juon iunit eo edik an jukjuk in pād im Kabun̄ in. Ro uwaan Kabun̄ eo an Jisōs Kraist im Armej ro Rekwojarjar ilo Raan Ko Āliktata im rej tōmak bwe baam̧le ko remaron̄ pād ippān doon n̄an indeeo. Jej jerbal n̄an kōkajoorļo̧k baam̧le ko ad ioon laļ in. Ebar wōr ad tōmak bwe jemaron̄ bōk kōjeram̧m̧an in juon baam̧le indeeo.

Baam̧le eo an Anij

Aolep armej rej jetōb ro rejitenbōro Nejin Jemed im Jined Ilan̄. Kōj jej aolep m̧ōttan baam̧le eo an Anij. Kōj aolep ewōr ippād juon un ekwojarjar im kōttōpar. Eļan̄n̄e jej mour jim̧we, jemaron̄ jepļaak im mour ippān Jemedwōj Ilan̄ āinwōt m̧ōttan baam̧le eo an indeeo.

M̧are eo kar pijaiki jān Joseph Kaluba

Baam̧le ko Indeeo

N̄e juon em̧m̧aan im juon kōrā rej m̧are ilo tampeļ im kōjparok būjen ko aer, m̧are eo aer enaaj n̄an indeeo. Kain̄i in an tampeļ ej ņae etan liāp. Ajri ro rej ļotak ālkin an jineer im jemeer kar liāp rej ļotak ilowaan bujen eo. Ajri ro rekar ļotak m̧okta jān an jineer im jemeer liāp remaron̄ liāp ippāer ilo tampeļ bwe ren maron̄ erom̧ juon baam̧le indeeo. Ro uwaan Kabun̄ in remaron̄ kōm̧m̧an menmenbwij an baam̧le im jerbal ko an tampeļ bwe ren maron̄ liāp ippān baam̧le ko aer ilo aolepān epepen ko. Kōjeram̧m̧an eo an baam̧le indeeo ej maron̄ tōprak kōn Jisōs Kraist im Pinmuur eo An.

M̧are

M̧are ikōtaan juon em̧m̧aan im juon kōrā ej ekkapit jān Anij. Gospel eo an Jisōs Kraist ej katakin ļāeo pālele im lieo pālele n̄an m̧ool n̄an doon im tiljek ilo bujen m̧are ko aer. Rej aikuj m̧ool ilo ļōmņak, naan, im kōm̧m̧an. M̧are ej juon jemjerā in ippān doon, im ripālele ro rej aikuj rōjan̄, kainem̧m̧an, im jipan̄ doon.

Ro Jinen im Jemān im Ajri ro

Anij ekar kakien Adam im Iv bwe erro en neji. Ritōl ro an Kabun̄ in rej katakin bwe kien in ej wōnm̧aanļo̧k wōt. M̧am̧a im baba ro rej jerbal ippān doon n̄an karrūttoikļo̧k ajri ro nejier ilo iakwe im jim̧we (lale Katak im Bujen Ko 68:25–28). Ajri ro rej ekaktak n̄an kautiej jineer im jemeer (lale Exodus 20:12).

Katakin im Ekkatak

Pāāren ro rej katakin ajri ro nejier n̄an iakwe Anij im pokake kien ko An. Baam̧le eo ej letok juon iien em̧m̧an n̄an en̄jake lan̄lōn̄ im ekkatak kijenmej im kea kōn aikuj ko an ro jet. M̧wil kein remaron̄ jipan̄ kōj erom̧ eļapļo̧k āinwōt Anij im kōpooj kōj n̄an mour m̧ōņōņō āinwōt baam̧le ko indeeo.

Kōkajoorļo̧k Baam̧le ko

Ebōk jerbal, kijejeto, im kijenmej n̄an kalōk juon baam̧le eo eļap tōprak ie. Pedped in katak ko an gospel ko āinwōt tōmak, jar, jeorļo̧k bōd, iakwe, jerbal im kalimomo ko remaron̄ jipan̄ kōj loe lan̄lōn̄ ilo mour in baam̧le. Jemaron̄ barāinwōt bōk an juon make revelesōn n̄an jeļā wāween eo n̄an kōkajoorļo̧k baam̧le ko ad.

Christ’s Image, jān Heinrich Hofmann

Kōjeram̧m̧an ko Rej Peļļo̧k n̄an Aolep

Ejjab aolep ewōr aer iien em̧m̧an n̄an erom̧ m̧ōttan juon baam̧le eo epoļōmen ilo laļ in. Ak Anij em̧ōj an kallim̧ūr bwe aolep ro renaaj kejparok kien ko An renaaj bōk aolep kōjeram̧m̧an ko an juon baam̧le indeeo. Jemaron̄ lōke E im tōmak ilo iien eo An.

Jān Jeje ko Rekwojarjar

Pāāren ro rej katakin ajri ro nejier n̄an iakwe im jerbal n̄an doon (lale Mosaia 4:14–15).

Jar enaaj kōkajoorļok baam̧le ko (lale 3 Nipai 18:21).

Ro em̧ōj aer liāp ilo tampeļ renaaj bōk kōjeram̧m̧an ko indeeo (lale Katak im Bujen Ko 132:19).

Naan ko n̄an Kakeememeji

Paaktokin ekwojarjar: Bōnja ak tokjen ko kar jolete kōj kaki jān Anij āinwōt ajri in jetōb ro Nejin.

Bujen ko: Kallim̧ūr ko jej kōm̧m̧ani ippān Anij. E ej kallim̧uri kōj kōn kōjeram̧m̧an ko.

Ekkapit: Kōjenolo̧k, ekkal, ak kappeik. “Ekkapit” emaron̄ bar meļeļein leļo̧k juon maron̄ in kabwijer priesthood ilo juon opij an priesthood, āinwōt tikōn ak elder.

Revelesōn: Im̧we jān Anij n̄an ajri ro Nejin ioon laļ in.

Kappukot Eļapļo̧k

N̄an ekkatak ta eo rikanaan ro an raan kein rekar katakin kōn baam̧le, komaron̄ riiti “Baam̧le eo: Juon Naan in Kean̄ n̄an Laļ in” ilo ChurchofJesusChrist.org ak ilo Gospel Library app eo. Ward ko im branch ko ewōr doulul ko an Būraimere, Likao ro, im Jiron̄ ro ie n̄an ajri ro im rum̧m̧an ded ro. Komaron̄ barāinwōt ekōnono n̄an ritōl ro im n̄an ro rej jerbal in karejar n̄an ekōnono kōn wāween aer maron̄ jipān ajri ro nejūm̧.