“Etke Ijjab Maron̄ Jeorļo̧k Bōd?,” Liaona, Jān. 2023.
Ainikien Armej ro Rekwojarjar ilo Raan Ko Āliktata
Etke Ijjab Maron̄ Jeorļo̧k Bōd?
Ikar jar bwe Jemedwōj Ilan̄ en maron̄ jipan̄ eō anjo̧ jān en̄jake ko aō renana im jeorļo̧k bōd.
Kōmeļeļe jān Allen Garns
Ikar kobaļo̧k ippān bar jejjo likao ro jeiū im jatū ilo ward eo n̄an jipan̄ juon sister em̧m̧akūt. Ak ke kōm ekar tōparļo̧k jikin jokwe eo an, juon van me ekar jab jim̧we an paak ekar kapan̄ am dreļo̧n̄eļo̧k ijo jikin kōrā eo kōn van eo waamim.
Ikar ko̧o̧ļe nōmba eo ilo kiin van eo n̄an kajjitōk bwe juon armej en itok im kōm̧akūt van eo. Juon em̧m̧aan ekar uwaak im kallim̧ur bwe enaaj itok ejjab to jān kiiō.
Ālkin 15 minit ko, ikar bar ko̧o̧l, ak ekar jab uwaak. Āliktata, ālkin bar juon ko̧o̧l, ekar jede ippān ruo nejin ajri. Ekar lukkuun illu im ba juon men ekar kalluiki eō. Ikar kajjeon̄ meļo̧kļo̧k e ilo am kar wōnm̧aanļo̧k ilo em̧m̧akūt eo.
Joteen eo ikar ļōmņak kōn en̄jake eo. Ikar jar bwe Jemedwōj Ilan̄ en maron̄ jipan̄ eō anjo̧ jān en̄jake ko aō renana im jeorļo̧k bōd. E ekar uwaake jar eo aō.
Ālkin jidik iien tokālik, ijoke, ikar riiti juon nuujpepa in jikin eo im kar kileļo̧k nuuj eo kōn em̧m̧aan in. Ekoba pija eo an. En̄jake ko aō rejjab em̧m̧an n̄an e rekar bar jepļaaktok. Kiiō, ikar bar ro̧o̧lļo̧k n̄an ejja jekjek eo wōt m̧oktaļo̧k. Ikar kajjitōk ippān Anij bwe men in eļap en bōjrak an kabōņōņōiki eō im bwe E en jipan̄ eō jeorļo̧k an em̧m̧aan in bōd. Juon en̄jake em̧m̧an ekar itok.
Ekar jab to ikar ioon ejja em̧m̧aan in wōt ilo juon m̧ōn wia. En̄jake ko ao renana rekar bar jepļaaktok. Ikar bwilōn̄. Ikar kajjitōk ippān Irooj etke ikar jab maron̄ meļo̧kļo̧k im wōnm̧aanļo̧k jān en̄jake in. Jejjo tok raan tokālik, E ekar katakin n̄a juon katak.
Ikar diwōjļo̧k jān meļan Helsinki Finland Tampeļ ke ikar loe ejja em̧m̧aan in wōt ej jerbal ilo jikin kallūb wūt ko ilo tampeļ eo. Ikar jab tōmak ta eo ij loe. Meja ekar peļļo̧k im ikar meļeļe bwe e, āinwōt n̄a, kar jerbal n̄an Irooj im bwe e, āinwōt n̄a, ewōr raan ko rekalulu n̄e men ko rejjab tōprak. Innem ikar maron̄ loe em̧m̧aan in āinwōt juon aō būratōr. Kōn mej ko rekāāl, ikar en̄jake kautiej im iakwe n̄an e. Ālkin men eo, aolepān en̄jake ko m̧okta rekar jako, im jab bar jepļaaktok.
N̄e jej loe ro jet āinwōt an Irooj loe kōj, jemaron̄ ļoor kien eo An n̄an lukkuun jeorļo̧k bōd (lale Matu 6:14–15; Katak im Bujen Ko 64:9–10). En̄jake in ekar juon menin kōkeememej, tūriam̧o̧ an Irooj, eo im n̄an kejokļo̧kjeņ wōt ijen kake ilo buruō.