“Kwar Pād Ia?,” Liaona, Jān. 2023.
Ainikien Armej ro Rekwojarjar ilo Raan Ko Āliktata
Kwar Pād Ia?
Ikar aikuj erre ilo iien im un ko an Anij ilo aō ekkatak n̄an iakwe jibū āinwōt an Jemedwōj Ilan̄ im Jisōs Kraist iakwe e.
Jekdoon nan̄inmej eo an Būbū, aolep men ekar kōm̧m̧ane n̄an eō ej kōnke ej iakwe n̄a.
Pija en rijeje eo
“Kwar pād ia, nejū?” būbū ekar kajjitōk ilo an uwaake aō kōļaļļaļ ilo kōjem eo an. Ij kab kar ro̧o̧ltok jān mijen ilo El Salvadro. Mej ko mejen būbū rekar obrak kōn lan̄lōn̄ ilo an bar loe n̄a. Pā ko pein rekar meoeo im okmāānān ilo an jepooļ kenwaaō kaki.
Ekar juon iien kōm̧m̧ao ekalimomo ippemim ilo aō uwaake kajjitōk ko kōn mijen eo aō. Ikar jino drenin kemjaaļaļ ilo aō kar ba n̄ane kōn armej ro, m̧ōn̄ā ko, jerbal ko reļļap, im kabwilōn̄lōn̄ ko ilo mijen eo aō. Ālkin an m̧ōj aō ba, ekar m̧ōkaj an ikōn̄. Innem ekar kajjitōk, “Kwar pād ia, nejū?”
Āinwōt ad jeļā, ekar jab ron̄jake. Kōn menin, kom̧ro ekar bar jinoe kōm̧m̧ao. Enan̄in 20 minit tokālik, ekar kajjitōk kein kajilu, “Kwar pād ia, nejū?”
Juon men ekar jab jim̧we. Ikar tokālik jeļā bwe juon iiō ālkin aō em̧m̧akūt kar n̄an mijen eo aō, jibū ekar bōk nan̄inmej in eppaļ.
Iaar en̄jake juon ikdeelel eļap n̄an jipan̄ būbū. Ium̧win ruo iiō ko, ikar katakin kōn iakwe eo an Anij n̄an ajri ro Nejin. Kiiō ewōr juon iien em̧m̧an n̄an eō n̄an mour kōn katak ko. Men̄e ijeļā ke enaaj ben, ikar kālet n̄an jokwe ippān bwe in maron̄ jipan̄ e.
Allōn̄ ko jejjo m̧oktata rekar kanooj in ben. Āinwōt ilo ijo ikar mijen ie, wōr kijenmej im kōmmaanwa ekar juon jerbal jej kōm̧m̧ane aolep raan. Im ilo kar mijen eo aō, ikar aikuj erre ilo iien im un ko an Anij ilo aō ekkatak n̄an iakwe jibū āinwōt an Jemedwōj Ilan̄ im Jisōs Kraist iakwe e.
Jokwe ippān Būbū ekar jet iien āinwōt jokwe ippān jilu armej ro roktak jān doon. Jet iien ejjab kōņaan bwe en lōn̄ armej ilo m̧weo ippān. Jet iien ekōņaan jipan̄ eo aō im aō pād, im ej m̧ōņōņō bwe ejjab make iaan. Jet iien men eo de eo ej ļōmņak kake ej kōn ta eo ej naajdik ļaddik eo jibūn eo ej kab ro̧o̧ltok jān mijen eo an. “Jab kōm̧m̧ane men eo!” emaron̄ m̧ōkaj an oktak n̄an “Etke kojjab kōm̧m̧ane men eo?”
Jibū, mekarta, ekar juon kōjeram̧m̧an eo eļap n̄an eō. Ijeļā bwe men̄e nan̄inmej eo an, aolep men ej kōm̧m̧ane n̄an eō ej kōnke ej iakwe eō.
Naan ko rejouj im m̧ool an būbū rej itok aolep iien aō ro̧o̧lļo̧k jān jikin jikuuļ ak jerbal. Kōn juon erreitok ejouj, ej atabo̧kwij eō, mejān m̧aik eō, im kajjitōk ilo iakwe, “Kwar pād ia, nejū?”