Tā’u patu ’oe fa’aha’amana’o

Nā David Payne, Maryland, Fenua Marite

’Āhiri au i pāhono i te muhumuhura’a, e taime rahi a’e ïa tō mātou nō te ha’api’i ia Giuseppe i te ’evanelia.

I te hō’ē mahana fa’aineinera’a, ’ua haere māua tō’u hoa misiōnare e māta’ita’i i te hō’ē fare purera’a katetara i Parma, Italia. ’A maere ai au i te mau hōho’a peni nehenehe i reira, ’ua ’ite atu vau i te hō’ē monahi e tai’o noa ra i pīha’i atu. ’Ua fāri’i au i te hō’ē fa’aurura’a e paraparau iāna nō ni’a i te Buka a Moromona, ’ua mata’u rā vau.

E aha te mana’o o te hō’ē monahi katorika nō ni’a i te hō’ē misiōnare e poro ra i te ’evanelia i roto i te hō’ē katetara ? ’Ua tae fa’ahou mai te fa’aurura’a, ’ua pāto’i fa’ahou rā vau.

Tau hepetoma i muri mai, ’ua parau mai te tahi atu nā misiōnare e piti hō’ē ā tō mātou fa’aeara’a ē, ’ua fārerei rāua i te hō’ē monahi ’o Giuseppe te i’oa i ni’a i te purūmu. I muri a’e i tō rāua ha’api’ira’a iāna i te hō’ē ha’api’ira’a, ’ua fāri’i ’oia i te hō’ē Buka a Moromona.

I te fārereira’a te mau misiōnare ia Giuseppe hō’ē hepetoma i muri iho, ’ua tai’o a’ena ’oia i te hō’ē tuha’a rahi o te buka. E ’oa’oa rahi tōna nō ni’a i te reira.

Hou ’a fārerei fa’ahou ai te mau misiōnare ia Giuseppe, ’ua tauihia tō’u hoa, nō reira ’ua ’āmui atu vau ia rāua. I tō mātou haerera’a e ha’api’i ia Giuseppe i roto i te fare purera’a katetara, ’aita vau i maere i te ’itera’a ē, ’o ’ona iho ā terā monahi tei fa’auruhia iā’u ’ia paraparau nā mua atu.

’Ua parau mai Giuseppe ia mātou, tē tai’o ra ’oia i te buka a Alama, tāna i fa’aau i te ’āpōsetolo Paulo. ’Ua fa’aoti mātou e ha’api’i iāna i te piti o te ha’api’ira’a, ’o tē fa’ahope nā roto i te anira’a ’ia bāpetizohia. I te hope’a o tā mātou ha’api’ira’a, nā mua noa a’e ’a ani ai mātou ia Giuseppe ’ia pe’e i te hi’ora’a o Iesu Mesia ’ia bāpetizohia, ’ua ha’amata te mau oe o te katekara i te patē, tei fa’ahitimahuta ia mātou.

’Ua mo’ehia ia Giuseppe te parau o te taime, ’e ’ua parau mai ’oia e tītauhia iāna ’ia ’āmui atu i te tahi atu mau monahi, nō te mau pure o te ’āfa mahana. I muri iho, ’ua tātarahapa mai ’oia ma te parau ē, e’ita ’oia e vata i te taime i muri nei, nō te mea e haere atu ’oia i te hō’ē putuputura’a nā te mau monahi. I muri iho e fa’atōro’ahia ’oia ’ei tahu’a.

’Ua māere mātou i te ’itera’a e nāhea teie taime faufa’a roa i te ’orera’a. ’Āhani au i pāhono i tā’u fa’aurura’a nā mua atu, e taime rāhi ïa tō mātou nō te ha’api’i ia Giuseppe, ’e e taime ïa tōna nō te fa’aoti i te tai’o i te Buka a Moromona. Tā’u i ’ite, ’aita roa atu te mau misiōnare i ha’api’i fa’ahou iāna.

I muri a’e i teie ’ohipa i tupu, ’ua fa’aha’amana’o mai te ta’i o te mau oe o te hora iā’u, i te faufa’a rahi ’e te poto o tō tātou taime. I te toe’a o tā’u misiōni, i te mau taime ato’a e fa’aro’o vau i te hō’ē oe ’ia ta’i, e fa’aitoitohia vau ’ia paraparau i te ’evanelia i te hō’ē ta’ata e nehenehe tā’u e paraparau. I teie mahana, e tūtava vau i te mau taime ato’a ’ia pe’e i te mau fa’aurura’a a te Vārua.