2023
Ti’aturi i te mana ’e te mau peropheta o te Fatu
Māti 2023

« Ti’aturi i te mana ’e te mau peropheta o te Fatu », Liahona, Māti 2023.

Nā te mau metua

Ti’aturi i te mana ’e te mau peropheta o te Fatu

Te peresideni Nelson ’e te tuahine Nelson e fāri’i ra e piti tamāroa

Hōho’a nā Ravell Call, Deseret News

E te mau metua here ē,

I roto i tō tātou ao e rahi noa atu ra te ’ārepurepura’a, e mea ’ōhie paha ’ia mata’u ’e ’ia pāpū ’ore. Mai te mea rā e fāriu atu tātou i ni’a ia Iesu Mesia nō te tāmāhanahanara’a, e hōpoi mai ’oia ia tātou te hau i roto i te mau vero o te orara’a. ’A tai’o i te mau parau pāpa’i i roto i teie ve’a nō te ’ite, e nāhea e nehenehe ai i te Fa’aora e tauturu ia ’outou ’ia fa’aruru i tō ’outou mau tāmatara’a.

Te mau ’āparaura’a ’evanelia

E hōro’a pāpū te Fa’aora i te hau i roto i te mau tau fifi

’A tai’o ’e tō ’outou ’utuāfare i te parau pāpa’i a Elder Uchtdorf i te ’api 4, e nāhea te ti’aturira’a i te mana fa’ati’a o te Mesia i te hōro’a mai i te hau i roto i te mau huru tupura’a fifi. E ’āparau ’āmui i te tahi mau rāve’a tā Iesu e hōro’a nei te tāmarūra’a. E aha tā ’outou e nehenehe e rave nō te tītau manihini i tōna mana i roto i tō ’outou orara’a ?

E mea nāhea te autahu’ara’a i te ha’amaita’i i tō tātou ’utuāfare ?

Tai’o i te parau pāpa’i i te ’api 22 nō ni’a i te mau ha’amaita’ira’a o te autahu’ara’a. E ani i te mau melo o te ’utuāfare ’ia fa’a’ite mai i te mau taime ’a fāri’i ai rātou i te hō’ē ha’amaita’ira’a o te autahu’ara’a. E aha tā rātou i fāri’i ? Nāhea te ha’amaita’ira’a i te tauturu ia rātou ? Tē vai ra ānei te hō’ē ha’amaita’ira’a ’o tē nehenehe e tauturu i te hō’ē melo o te ’utuāfare i teienei ?

Tē fa’a’ohipa nei te Fatu i tōna peropheta nō te tauturu ia tātou nō te fa’atupu i te itoito

I roto i te parau pāpa’i i te ’api 30, tē parau nei Elder Sikahema e nāhea te pe’era’a i te mau ha’api’ira’a a te peropheta i te tauturura’a iāna, ’ia ti’a pāpū i roto i tōna mau ti’aturira’a ’e te mau ture i roto i tōna tōro’a ’ei ta’ata ’aravihi nō te tu’aro marite fa’ahoro pōpō ’e tōna orara’a tā’āto’a. I muri a’e i te tai’ora’a i teie parau pāpa’i, e ani atu i te melo tāta’itahi o tō ’outou ’utuāfare ’ia fa’a’ite mai i te hō’ē taime, ’a pe’e ai rātou i te peropheta ’ua tauturuhia rātou ’ia roa’a te itoito.

Mai, pe’e mai te ’oa’oara’a ’utuāfare

Tupura’a, tupura’a rahi, i te mau mahana ato’a

’Ei melo nō te ’Ēkālesia a Iesu Mesia i fa’aho’i-fa’ahou-hia mai, e hōpoi’a nā tātou i te tauturura’a ’ia tupu rahi atu ā te bāsileia o te Atua i te fenua nei. Tē parau ra te Mataio 13:31–32 :

« E au te bāsileia o te ao i te hō’ē huero sinapi nā te hō’ē ta’ata i tanu i roto i tāna ra ’āua :

« E huero iti ha’iha’i ïa i te mau huero ato’a nei, ’ia tupu rā e rahi ïa i te mau rā’au ri’i ato’a, ’e e riro ’ei rā’au rahi ».

  1. ’A pārahi ha’amenemene ’e ’a fa’ahu’a ia ’outou mai te hō’ē huero sinapi te huru.

  2. ’A ani i te mau ta’ata tāta’itahi, te tahi i muri i te tahi, ’ia fa’a’ite mai i te hō’ē ’ātivite tā rātou e nehenehe e rave i te mau mahana ato’a nō te tauturu i te ’Ēkālesia ’ia tupu i te rahi (fa’a’ite i tō rātou ’itera’a pāpū, fa’a’ite i te hō’ē pāpa’ira’a mo’a i ni’a i te mau rāve’a tūreiara’a tōtiare, fa’a’ite i te hō’ē parau mau o te ’evanelia i te hō’ē hoa, ’e tē vai atu ra).

  3. I te mau taime ato’a e fa’ahiti te hō’ē ta’ata i te hō’ē ’ātivite ’o tē tauturu i te ’Ēkālesia ’ia tupu i te rahi, e pārahi ’āfaro ri’i mai te mau ta’ata ’e e ha’amata i te ti’a marū noa, ē tae roa atu e ti’a ’āfaro roa rātou.

  4. ’A ’āparau ’e tō ’outou ’utuāfare, nō te aha e mea faufa’a nō te ta’ata tāta’itahi ’ia rave i tāna tuha’a nō te tauturu i te ’Ēkālesia ’ia tupu i te rahi.