« Pe’era’a i te hi’ora’a o te Mesia : Ha’apa’ora’a i te feiā nava’i ore », Liahona, Māti 2023.
Pe’era’a i te hi’ora’a o te Mesia : Ha’apa’ora’a i te feiā nava’i ore
Mai te hāmanira’a mā’a e tae noa atu i te pāhonora’a rū nā roto i te aupurura’a, tē vai nei e rave rahi rāve’a nō te fa’a’ite i te here i tō tātou ta’ata tupu.
I Will Believe (E ti’aturi au), nā Liz Lemon Swindle, ’eiaha e hāmani i te hōho’a
’Ei feiā pe’e nō Iesu Mesia, tē tītau nei te mau melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei ’ia ora i nā fa’auera’a rahi e piti : ’Ia here i te Atua ’e ’ia here i tō tātou ta’ata tupu (hi’o Mataio 22:37–39). Te pe’era’a i teie nā fa’auera’a rahi e piti ’e te hi’ora’a o Iesu Mesia, ’o te mea ïa e arata’i nei i te ’Ēkālesia ’e i tōna mau melo ’ia ha’apa’o i te feiā i roto i te fifi.
Nō reira, e nāhea te ’Ēkālesia i te tauturu i te ha’apa’ora’a i te feiā i roto i te fifi ? ’E e nāhea te mau melo e nehenehe ai e ’āmui mai i roto i teie ’ohipa rahi ?
Mau rāve’a nō te tauturu
’Ei melo nō te ’Ēkālesia, tē tāmata nei tātou i te ’imi i te feiā i roto i te fifi ’e ’ia tauturu i te mau tamari’i ato’a a te Atua, noa atu tō rātou nūna’a ta’ata, tō rātou ti’ara’a ta’ata, ’aore rā te ha’apa’ora’a fa’aro’o.
Tē ha’apa’o nei tātou i te feiā i roto i te fifi nā roto i te mau rāve’a rau, ’oia ho’i :
-
Te ha’apaera’a mā’a ’e te fa’a’ohipara’a i te mau ō ha’apaera’a mā’a.
-
Te aupurura’a i te tahi ’e te tahi.
-
Te mau fa’anahora’a nō te fa’arava’ira’a iāna iho.
-
Te mau fa’anahora’a nā te ao nei nō te pae o te mā’a, te ha’api’ira’a, te pape mā ’e te ’atu’atura’a ea.
-
Pāhonora’a rū.
-
Te mau ’ōpuara’a ’ohipa tāmoni ’ore i roto i te ’oire.
Noa atu te rahi o te tahi mau tauturura’a a te ’Ēkālesia i tō te ao nei, ’oia ato’a te mau tauturu na’ina’i e fa’atupu te reira i te hō’ē ’ohipa rahi. Teie te tahi mau hi’ora’a e mea nāhea te mau melo o te ’Ēkālesia i te tauturu i te feiā i roto i te fifi.
Ha’amata i te ’āva’e Fēpuare 2022, ’ua tauturu te feiā mo’a i te mau mahana hope’a nei nō Poronia i te mau tītīhoria i te pae nō te utara’a, te mā’a ’e te fa’aeara’a.
Aupurura’a i rotopū i te pe’ape’a
RaeAnn ’e Sterling Jarvis—melo nō te ’Ēkālesia i Warsaw, Polonia—’aita rāua i ’ite e aha te ’ohipa e tupu mai, ’a mā’iti ai rāua e fāri’i i te mau tītīhoria i tō rāua fare. ’Ua ineine rā rāua nō te tauturu atu nā roto i te mau rāve’a ato’a e nehenehe ia rāua.
Tau taime ri’i i muri mai i te ha’amatara’a te pe’ape’a i Europa, ’ua tae mai te hō’ē ’utuāfare e pae ta’ata nō ’Ūkerenia mai, i tō rāua ’ūputa i te hora hō’ē i te ’ā’ahiata. ’Ua rātere ātea mai rātou fātata e 500 maile (800 kilomētera) nō te ’imi i te pārurura’a. ’Ua fa’ari’i te ’utuāfare Jarvises ia Maryna ’e ia Serhii Bovt ’e tā rāua nā tamari’i e toru i i tō rāua fare. I te roara’a o te taime, ’ua tupu tō rāua here mau ’e te māna’ona’o rahi nō te ’utuāfare Bovt. « ’Ia fa’a’ite ana’e ’outou i te here, e tupu te reira i te rahi », ’ua parau Myrna nō ni’a i te hi’ora’a o te tāvinira’a a te ’utuāfare Jarvises. « E ha’afātata te reira ia mātou te tahi ’e te tahi ’e i te Fatu ».
’Ei melo nō te ’Ēkālesia, tē tītau nei tātou ’ia pe’e i te hi’ora’a o te Fa’aora nā roto i te aupurura’a i te mau ta’ata ’ati a’e ia tātou. ’Aita e tītauhia ’ia horo ’ē te ta’ata i te tama’i ’aore rā i te hāmani-’ino-ra’a nō te hina’aro i te tauturu. E nehenehe tā tātou mau ’ohipa maita’i ato’a—noa atu te na’ina’i—e ha’amaita’i i te orara’a o te hō’ē ta’ata.
E huira’atira nō te ’ōpere
I te fare fa’a’apu nō Laie Hawaii Crops, fatuhia e te ’Ēkālesia, hau atu i te 310 ’utuāfare tei tanu i te mau mā’a nō te pāhono i te mau hina’aro o tō rātou ’utuāfare. I ni’a i tō rātou tāpū fenua 5058 571 metera tuea, tē tanu nei teie mau ’utuāfare i te taro, te māniota, te ’ūmara, te ’uru, te tuvava ’e te tahi atu mau mā’a.
Nā te hō’ē nā ta’ata fa’aipoipo misiōnare e fa’atere nei i te fare fa’a’apu ’e tē fāri’i nei rāua i te turura’a a te tahi atu mau misiōnare ’e te mau melo. Tē tauturu nei teie mau ta’ata tāmoni ’ore i te tāmāra’a i te fenua, te fa’aineinera’a i te repo nō te tanu, ’e i te ha’api’ira’a i te mau rāve’a tumu nō te ’ohipa fa’a’apu.
Maoti teie mau misiōnare, teie mau melo ’e te mau ta’ata tāmoni ’ore, e rave rahi ta’ata e hina’aro nei i te mā’a i Hawaii, ’ua nehenehe ia rātou i te tauturu ia rātou iho, ’ia varavara ana’e te ’ohipa. E pūai a’e te ’oire ’ia ’ohipa ’āmui ana’e te ta’ata nō te ’atu’atu i te fare fa’a’apu ’e ’ia ’ōpere i te mea tā rātou i tanu.
Tē hōro’a nei te mau ’ōpuara’a tauturu i te ao nei a te ’Ēkālesia i te ha’apāpūra’a i te pae nō te mā’a, te ha’api’ira’a, te pape mā ’e te mau ’ohipa nō te ea i te mau mirioni ta’ata ’ati a’e te ao nei. Tē hōro’a ato’a nei te ’Ēkālesia i te mau rāve’a e rave rahi nō te ha’amaita’i i te fa’arava’ira’a iāna iho, tae noa atu i te fare ha’aputura’a a te ’episekōpo, te pū ’imira’a ’ohipa, te mau fare toa tapiha’a a Deseret, te mau ’āpo’ora’a nō te mau ’ohipa ’utuāfare, te mau ha’api’ira’a nō ni’a i te fa’arava’ira’a iāna iho ’e te mau fare fa’a’apu ’e te mau ’āua mā’a hotu e fatuhia e te ’Ēkālesia mai tā Laie Hawaii Crops. Pinepine teie mau ’ōpuara’a ’ohipa i te tauturuhia e te mau melo ’e te mau misiōnare, maoti tō rātou taime hōro’a noa, tō rātou mau tāleni ’e te tahi atu mau rāve’a tauturu, e fa’atupu te reira i te hō’ē ta’a-’ē-ra’a rahi i ni’a i te feiā i roto i te fifi.
Hō’ē ’ohipa auhoara’a
I te matahiti 2021, fātata e 200 melo o te ’Ēkālesia tei pāhono i te hō’ē pi’ira’a nō te tauturu. ’Ua haere rātou i roto i te mau pū i Heremani, i te fenua Marite ’e i te tahi atu mau vāhi nō te tauturu i te fa’anahora’a fātata e 55 000 tītīhoria nō Afghanistan mai.
E rave rahi ta’ata tāmoni ’ore tei tāvini i roto i teie mau pū nō nā hepetoma e piti ’aore rā e toru, ’e tē vai ra tei fa’aea maoro atu. ’Ua pāhono te mau melo o te ’Ēkālesia i te mau hina’aro rū o te feiā e ’imi ra i te pārurura’a, nā roto i te hōro’ara’a i te mā’a, te ’ahu ’e te tahi atu mau tauiha’a.
’Ua ’ite te mau tuahine nō te Sōtaiete Tauturu nō Helemani ē, tē fa’a’ohipa nei te tahi mau vahine nō Afghan i te ’ahu tāne o tā rātou mau tāne nō te tāpo’i i tō rātou upo’o, ’eiaha rā i tō rātou tāpo’i upo’o mātarohia, tei mo’e ’aore rā tei ’ino i roto i te fa’ahuehuera’a i tupu i te taura’a manureva. ’Ua putuputu teie mau tuahine nō te Sōtaiete Tauturu nō te nira i te mau ’ahu Mahometa mātarohia nō teie mau vahine i roto i te fifi—ma te fa’a’ite i te maita’i ’e te fa’atura nō vetahi ’ē, ma te tu’u i te hiti i te ta’a-’ē-ra’a o tō rātou ti’aturira’a.
’Ua parau te tuahine Sharon Eubank, ti’a fa’atere nō te ’Ohipa aroha a te feiā mo’a i te mau mahana hope’a nei ē, « ’aita tā tātou mau tauto’ora’a tāta’itahi e tītau roa i te moni ’aore rā i te mau vāhi ātea ; e tītau rā te reira i te arata’ira’a a te Vārua Maita’i ’e te ’ā’au hina’aro mau ’ia parau i te Fatu, ’Teie au, ’o vau tā ’oe e tono’ [Isaia 6:8] ».1
Te hina’aro ’ia tāvini ’ia tae ana’e mai te ’ati ’o te tumu ïa te ’Ēkālesia e riro ai ’ei hō’ē o te mau pupu mātāmua e pāhono—ma te tāmarū nō te hō’ē tau poto ’e ma te tauturu nō te hō’ē tau roa. E tauturu te ’ohipa a te mau melo o te ’Ēkālesia ’e a te mau misiōnare i te feiā i roto i te fifi ’ia vai hau noa, ’ia fāri’i i te ’atu’atura’a i te pae tino ’e i te pae ferurira’a, ’e ’ia ’ite i te here o te Atua nā roto i te maita’i o vetahi ’ē.
Where Are the Nine? [Tei hea te iva ? nā Liz Lemon Swindle, ’eiaha e hāmani i te hōho’a
Mā’itihia nō te ’ohipa
Tē nā ’ō ra Te Ha’api’ira’a Tumu ’e te mau Fafaura’a 4:3 ē, « mai te mea e hina’aro tō ’outou ’ia tāvini i te Atua ’ua mā’itihia ïa ’outou nō te ’ohipa ». Ma te mau mea ato’a tā te ’Ēkālesia e rave nei, e rave rahi rāve’a nō te tāvini.
E rave rahi tauto’ora’a i fa’anahohia a te ’Ēkālesia nō te tauturu i te feiā i roto i te fifi, e tupu noa te reira nā roto i te ’ohipa tāvinira’a a te mau misiōnare ’e a te mau melo. E’ita e ti’a i te mau ta’ata ato’a ’ia fāri’i i te hō’ē ’utuāfare tītīhoria, ’ia aupuru i te mau hina’aro i te pae tino o vetahi ’ē, ’aore rā ’ia vaiiho i te mau mea ato’a nō te tauturu i roto i te hō’ē ’ati rahi. Terā rā, e tuha’a tā te mau ta’ata ato’a ’e e ’itehia ’e e ha’afaufa’ahia te tauturura’a a te ta’ata tāta’itahi.
Hō’ē o te mau rāve’a faufa’a roa a’e tā te mau melo e hōro’a nō teie ’ohipa, ’oia ho’i te hōro’ara’a i te mau ō ha’apaera’a mā’a ’e te mau ō tauturu i te ao ato’a nei. E fa’a’ohipahia teie mau ō mo’a nō te tauturu i te feiā i roto i te fifi rahi ’e ’o tē fa’atupu i te hō’ē ’ohipa rahi i roto i te orara’a o te feiā e tauturuhia. E nehenehe te mau melo o te ’Ēkālesia e tāvini i te hō’ē misiōni tōtauturu, e hōro’a i te mau ha’api’ira’a nō te fa’arava’ira’a iāna iho, ’e ’ia hōro’a i tō rātou taime i roto i te mau fare ha’aputura’a a te ’episekōpo ’e i roto i te mau fare toa tapiha’a a Deseret. E nehenehe ato’a ’outou e ’atu’atu i te feiā i roto i te fifi nā roto i te hō’ē pū tāvinira’a nō te fenua iho, te hōro’ara’a i te toto, te mau ’ohipa aupurura’a, te pure ’e tē vai atu ra.
’Ua mā’itihia tātou pā’āto’a nō te ’ohipa. ’Ua pi’ihia tātou ’ia pe’e i te hi’ora’a o Iesu Mesia ’e ’ia here i te Atua ’e ’ia here i tō tātou ta’ata tupu. Te mea noa e tītauhia ia tātou ’o te ’ā’au hina’aro mau ïa.