« ចូរយើងកុំខ្លាចឡើយ » លីអាហូណា ខែ កក្កដា ឆ្នាំ ២០២៣ ។
សំឡេងពួកបរិសុទ្ធថ្ងៃចុងក្រោយ
ចូរយើងកុំខ្លាចឡើយ
ខ្ញុំដឹងថាយើងនឹងរីករាយ នៅពេលយើងចែកចាយដំណឹងល្អជាមួយមនុស្សជាច្រើនឲ្យអស់ពីលទ្ធភាពរបស់យើង ។
ទទួលសិទ្ធិអនុញ្ញាតប្រើប្រាស់រូបថតនេះពីអ្នកនិពន្ធ
មិត្តភក្តិ និងមិត្តរួមថ្នាក់របស់ខ្ញុំជាច្រើននាក់ដែលមិនមែនជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ តែងតែសួរខ្ញុំអំពីសាសនាចក្រ ។ មួយរយៈក្រោយមកខ្ញុំបានធុញទ្រាន់ក្នុងការឆ្លើយសំណួរដដែលៗម្ដងហើយម្ដងទៀត ដូច្នេះខ្ញុំបាននឹកឃើញដំណោះស្រាយមួយ ។
ខ្ញុំចូលចិត្តថតវីដេអូដាក់លើបណ្តាញអ៊ីនធឺណិត ដើម្បីឲ្យមនុស្សមើលកម្សាន្ត ។ ខ្ញុំថតវីដេអូជាចម្រៀង ជាព័ត៌មាន និងរឿងកំប្លែង ។ នៅថ្ងៃមួយពេលខ្ញុំកំពុងគិតអំពីអ្វីដែលខ្ញុំនឹងថតវីដេអូបន្ទាប់របស់ខ្ញុំ ខ្ញុំបានសម្រេចចិត្តថតវីដេអូមួយ ដែលបានឆ្លើយសំណួរអំពីសាសនាចក្រ ។
ខ្ញុំបានចាប់កាន់ម៉ាស៊ីនថតរបស់ខ្ញុំ ។ បន្ទាប់មកដោយមិនបានសរសេរអ្វីដែលខ្ញុំនឹងនិយាយ ប៉ុន្តែចងចាំបទគម្ពីរសំខាន់ៗ ដែលខ្ញុំចង់និយាយ នោះខ្ញុំបានធ្វើវីដេអូនោះ ។ ខ្ញុំមិនដឹងថានឹងមានអ្វីកើតឡើងទេ ។ ខ្ញុំគ្រាន់តែមានអារម្មណ៍បំផុសគំនិតដើម្បីធ្វើវីដេអូនេះប៉ុណ្ណោះ ។ « ហើយខ្ញុំត្រូវបាននាំទៅដោយព្រះវិញ្ញាណ ដោយមិនដឹងជាមុនសោះឡើយថា តើខ្ញុំនឹងត្រូវធ្វើអ្វីខ្លះ » ( នីហ្វៃទី១ ៤:៦ ) ។
ដោយមិនខ្វល់ពីអ្វីដែលមិត្ដភក្ដិរបស់ខ្ញុំ មិត្តរួមថ្នាក់ និងសាច់ញាតិ—ឬមិនថាសមាជិកនៃសាសនាចក្រ—អាចនឹងឆ្លើយតបនូវអ្វីដែលខ្ញុំចុះផ្សាយនោះទេ ។
ពីរបីសប្តាហ៍ក្រោយពីផ្ទុកឡើងវីដេអូនោះ ខ្ញុំបានចាប់ផ្ដើមទទួលមតិកែលម្អ នៅលើគណនីប្រព័ន្ធផ្សព្វផ្សាយសង្គមរបស់ខ្ញុំ ។ សូម្បីតែមនុស្សដែលខ្ញុំមិនស្គាល់ ក៏បានចាប់ផ្តើមផ្តល់យោបល់ និងថ្លែងអំណរគុណដល់ខ្ញុំចំពោះវីដេអូរបស់ខ្ញុំដែរ ។ ដោយសារវីដេអូរបស់ខ្ញុំ មានមនុស្សម្នាក់បានចាប់ផ្ដើមទទួលការពិភាក្សាជាមួយអ្នកផ្សាយសាសនា ។ ក្រោយមកបុគ្គលនោះបានសម្រេចចិត្តទទួលបុណ្យជ្រមុជទឹក ។
ចាប់តាំងពីខ្ញុំបានថតវីដេអូនោះ មនុស្សខ្ញុំស្គាល់ដែលមិនមែនជាសមាជិកនៃសាសនាចក្រក៏ហាក់ដូចជាចូលចិត្តខ្ញុំដែល—ហើយប្រហែលជាកាន់តែចូលចិត្តខ្ញុំថែមទៀតផង ។ ពួកគេមួយចំនួនថែមទាំងបានឈប់រិះគន់សាសនាចក្រទៀត ។ អ្នកផ្សេងទៀតបានឈប់សួរសំណួរដដែលៗអំពីសាសនាចក្រពីព្រោះឥឡូវនេះពួកគេបានទទួលចម្លើយហើយ ។
ចូរយើងកុំខ្លាចធ្វើនូវអ្វីដែលព្រះអម្ចាស់បានបញ្ជាដល់យើងឡើយ ។ ទ្រង់បានមានបន្ទូលថា « ចូរអ្នករាល់គ្នាទៅពេញសព្វក្នុងលោកីយ៍ទាំងមូល ហើយផ្សាយដំណឹងល្អទូទៅដល់គ្រប់មនុស្សទាំងអស់ចុះ » ( ម៉ាកុស ១៦:១៥ ) ។
ខ្ញុំសន្យាថាយើងនឹងមិនសោកស្តាយ ដែលយើងបានគោរពតាមទ្រង់ឡើយ ។