“Ko hai ʻa e ʻAposetolo ko Paulá?,” Liahona, ʻAokosi 2023.
Haʻu, ʻo Muimui ʻIate Au
Ko hai ʻa e ʻAposetolo ko Paulá?
Ko e Malangaʻi ʻe Paula ʻa e Ongoongoleleí ʻi he Ngaahi Fonua Kehé, tā fakatātā ʻa Paul Mann
Puipuituʻá
-
Hingoa faka-Siú: Saula
-
Fāʻeleʻi ʻi Tāsisi, ko ha kolo ʻi Toake ʻi he ʻaho ní
-
Maʻu e tangataʻi fonua Loma ʻi hono fāʻeleʻí
-
Tupu hake ʻi ha ʻapi naʻe fakaʻapaʻapaʻi mo lotu
-
Naʻe fekauʻi ke ako ʻi Selusalema pea hoko ko ha Fālesi
-
Naʻe lau ʻe he kau Fālesí ko e tui faka-Kalisitiané ko ha takihala ia mei he tui faka-Siú, ko ia naʻe hanga ai ʻe Saula ʻo “maumauʻi ʻa e siasí” (Ngāue 8:3) ʻi heʻene feinga ke taukaveʻi ʻene tui fakalotú
Fakaului
Lolotonga e fononga ʻa Saula ki Tāmasikusi ke puke pōpula e kau muimui kumi hūfanga ʻo Kalaisí, “naʻe malama takatakai ʻiate ia ʻa e maama mei he langí” (Ngāue 9:3). Hili ʻene tō ki he kelekelé, naʻá ne “fanongo ki he leʻo naʻe pehē mai kiate ia, ʻE Saula, ʻe Saula, ko e hā ʻokú ke fakatangaʻi ai aú?” (Ngāue 9:4). Naʻe fekauʻi ʻe Kalaisi ʻa Saula, ʻa ia ʻoku kui he taimí ni mei he meʻa-hā-maí, ke ʻalu ki Tāmasikusi ʻo tatali ki ha fakahinohino lahi ange.
Hili ha ʻaho ʻe tolu ʻo e kui ʻa Saulá, naʻe ʻaʻahi kiate ia ʻa e ākonga ko ʻAnanaiá, ʻa ia naʻá ne fakaʻā hono matá (vakai, Ngāue 9:17–18). Naʻe papitaiso leva ʻa Saula pea ʻalu ki Selusalema, ka “naʻe manavahē kotoa pē [ʻa e kau ākongá] kiate ia, he naʻe ʻikai te nau tui ko ha ākonga ia” (Ngāue 9:26).
Naʻe ui ʻa Saula ke ngāue ki he kau Senitailé, pea talu mei ai mo e ui ia ʻe he Tohi Tapú ko Paula, ko hono hingoa faka-Latiná. Ko e ului ʻa Paulá ko ha fakamoʻoni ia ʻoku ʻatā ʻa e ongoongolelei ʻo Sīsū Kalaisí kiate kinautolu kotoa pē ʻoku fakatomalá pea “tatau ai pē pe ʻoku tau ʻifē pe ko e hā kuo tau faí, ʻoku ʻikai teitei ʻi ai ha feituʻu te ke taʻe-lava ʻo foki mei ai.”1
Ko e hā naʻe fili ai ʻa Paulá?
Ko Paula ko ha ʻAposetolo te ne lava ʻo akoʻi “ʻa e kau senitaile ʻi he ngaahi fonua ʻikai faka-Siú, ʻa ia te ne lava ʻo matatali e fakaanga ʻa hono kakaí (ʻo aʻu pē ki he Siasí), peá ne maʻu ʻa e ʻilo mo e taukei ke akoʻi fakatouʻosi e kau Siu mo e kau senitaile ʻi he ngaahi tuʻunga fakasōsiale kotoa pē ʻi he puleʻanga Lomá.”2
Naʻe makehe ʻa e feʻunga ʻa Paula ko ha tangataʻi fonua Loma mo ha Fālesi kimuʻa naʻe lea faka-Hepelū, faka-Kalisi, mo e faka-Latiná, ke fakahoko ʻa e fekau ko ʻení (vakai, Ngāue 9:15).
Tefitoʻi Pōpoakí
ʻI he hoko ʻa Paula ko ha ʻAposetoló, naʻá ne tuʻu ko ha fakamoʻoni ʻo Sīsū Kalaisi mo Hono mālohi huhuʻí. “Ko e tefitoʻi kaveinga ʻo ʻene ngaahi tohí ʻa e founga naʻe huhuʻi ai ʻe Sīsū Kalaisi ʻa e māmaní mo e founga ʻe lava ke fiefia ai ʻa e Kāingalotú ʻi he ngaahi tāpuaki ʻo [ʻEne] Fakaleleí.”3