“Ko ʻEtau Fononga Fakataautaha ki he ʻOtuá,” Liahona, ʻAokosi 2023.
Maʻá e Ngaahi Mātuʻá
Ko ʻEtau Fononga Fakataautaha ki he ʻOtuá
Siʻi Ngaahi Mātuʻa,
Ko ʻetau fononga ki he haohaoá, ʻo hangē ko ia ʻoku hā ʻi he makasini ʻo e māhina ní, ʻoku fakahoko ia ʻaki ʻetau tui ki he Tamai Hēvaní mo Sīsū Kalaisi, fakatomala, fakahoko mo tauhi ʻa e ngaahi fuakava toputapú, mo fekumi ki he fakahinohino ʻa e ʻOtuá ʻi heʻetau moʻuí.
Ngaahi Fealēleaʻaki ʻi he Ongoongoleleí
Ko ʻEtau Tulifua ke Haʻu kia Kalaisí
Fehuʻi ki hoʻo fānaú pe ʻoku ʻuhinga ki he hā ʻa e tulifuá. Vahevahe ha ngaahi akonaki mei he fakamatala ʻa ʻEletā Niila L. ʻEnitaseni ʻi he peesi 4 fekauʻaki mo ʻetau tulifua ke haʻu kia Kalaisí. Ko e hā ha ngaahi meʻangāue ʻoku nau fakamālohia kitautolu ʻi he fononga ko ʻení?
Poupouʻi ʻa e Fakalakalaka Faka-Kalaisí
Aleaʻi mo hoʻo fānaú ʻenau ngaahi taumuʻa taimi lōloá, hangē ko ha ngāue maʻuʻanga moʻui, ngāue fakafaifekau, pe mali temipale. Lau ʻa e ngaahi fakakaukau ʻi he peesi 14–17. Te mo lava ʻo palani fakataha ha ngaahi ʻekitivitī ʻe lava ʻo tokoni ki hoʻomo fānaú ke nau aʻusia ʻenau ngaahi taumuʻá.
Fakasiʻisiʻi ʻa e Mamata ʻi he Ngaahi Meʻa ʻoku Taʻefeʻungá
Fakaʻaongaʻi ʻa e fakamatala ʻi he peesi 8, ʻo talanoa fekauʻaki mo e ʻamanaki lelei ʻe lava ke fakatomala ha taha kapau ʻoku fefaʻuhi ha taha mo hono fakaʻaongaʻi ʻo e ponokalafí. Faʻu ha palani fakafāmili ke fakasiʻisiʻi ai ʻa e malava ke mamata ʻi he ngaahi meʻa taʻefeʻunga ʻi he mītiá hangē ko e televīsoné mo e ʻinitanetí.