“ʻE ʻAonga Nai ʻa e Totongí?,” Liahona, ʻAokosi 2023.
Leʻo ʻo e Kau Māʻoniʻoni ʻi he Ngaahi ʻAho Kimui Ní
ʻE ʻAonga Nai ʻa e Totongí?
Naʻá ku fakatokangaʻi e leʻo ʻo e Laumālie Māʻoniʻoní peá u tali e totongi ʻa e fakaʻuli tekisī ke ʻave kimautolu ki he lotú.
Tā fakafāmilí ko e angalelei ia ʻa e tokotaha ʻoku ʻaʻana e fakamatalá
Koeʻuhí ko ha ngaahi ʻuhinga felāveʻi mo e ngāué, naʻá ku ʻave ai hoku ngaahi ʻofefine ʻe toko tolú ke nofo mo ʻeku faʻeé ʻi he kiʻi kolo ko ʻĪtalima, ʻi he siteiti Palāsila ko Sialá. Ko e ʻiuniti ofi taha ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻoku meimei maile ʻe 55 (km ʻe 60) hono mamaʻó—ko ha kolo ʻi ʻĪtapipoka
Naʻá ku hohaʻa he ʻikai maʻu ʻe hoku ngaahi ʻofefiné ʻa e sākalamēnití ʻi ha Sāpate ʻe ua. Ko ha mēmipa faivelenga ʻeku faʻeé, ka he ʻikai ke ne lava ʻo fononga ki he lotú mo hoku ngaahi ʻofefine ʻe toko tolú mo e ngaahi ʻofefine ʻe toko tolu hoku tokouá, ʻa ia ne nau ʻaʻahi mai foki ki ai.
Hili ha uike ʻe ua, naʻá ku fononga ʻi ha ʻaho Tokonaki ki ʻĪtalima ke fakafoki mai hoku ngaahi ʻofefiné. Hili ʻeku aʻu atú, ne u fehuʻi ange ki ha fakaʻuli tekisií, “ʻE fiha hoʻo totongi ke ʻave mo fakafoki au mo ʻeku faʻeé mo e fānau ʻe toko ono ki ʻĪtapipoka ʻapongipongi?”
Naʻá ku loto mamahi ʻi heʻene talí. ʻE meimei feʻunga kotoa ia mo e paʻanga ne u haʻu mo iá. ʻI heʻeku fakalaulauloto ki he totongí, naʻe haʻu ha fehuʻi ki hoku ʻatamaí: “Ko e hā hono mahuʻinga kiate koe ʻa hono maʻu ʻo e sākalamēnití?” Naʻá ku fakatokangaʻi e leʻo ʻo e Laumālié peá u tali ʻa e totongi ʻa e fakaʻuli tekisií.
Kuó u akoʻi ki hoku ngaahi ʻofefiné ʻoku hanga ʻe he mā mo e vai sākalamēniti ʻoku ʻufiʻufi ʻaki e tupenu hinehiná ʻo tokoniʻi kitautolu ke tau fakakaukau ki he sino mo e taʻataʻa ʻo e Fakamoʻuí, ko e meʻa kuó Ne fakahoko maʻatautolú, pea mo e mahuʻinga ʻo hono manatuʻi Iá. ʻOku fakamanatu mai ʻe he sākalamēnití ʻokú Ne ʻi ai maʻaku pea ʻoku ou fie ʻi ai mo Ia.
ʻI he ʻaho hono hokó ʻi heʻemau hū atu ki he loki Palaimeli ʻo e Kolo ʻĪtapipoká mo ha fānau ʻe toko onó, naʻe hangē ne houngaʻia moʻoni e palesiteni Palaimelí. Hili ha ngaahi miniti siʻi mei ai, ne aʻu mai hoku ngaahi kaungāmeʻa mei hoku uooti totonu ʻi Fotalesá mo ʻena fānau ʻe toko faá.
Hili ʻa e Palaimelí, naʻa mau fiefia ʻi he ngaahi tāpuaki ʻo hono maʻu ʻo e sākalamēnití mo fakafoʻou ʻemau ngaahi fuakava mo e ʻEikí. Hili e sākalamēnití, ne mau ʻilo e ʻuhinga naʻe fiefia lahi ai e palesiteni Palaimelí ke sio mai kiate kimautolú. Naʻe fakahoko ʻi he Sāpate ko iá ʻa e polokalama sākalamēniti ʻa e Palaimelí, ka naʻe tokosiʻi pē ʻa e fānau ʻi he Palaimelí.
Naʻe pehē ʻe he palesiteni Palaimelí ʻi heʻene fakafeʻiloaki ʻa e polokalamá, “Naʻe tali ʻe he ʻOtuá ʻeku ngaahi lotú. Naʻá Ne fekauʻi mai mo ha toe fānau ʻe toko 10 kehe kuo nau mateuteu ke hiva mo kau ʻi he polokalamá.”
Naʻá ku fiefia ʻi heʻeku tokanga ki he fanafana ʻa e Laumālié ʻi he pō kimuʻá. Naʻe feʻunga pē ʻa hono maʻu ʻo e sākalamēnití mo hono maʻu ʻo e aʻusia fakalaumālie mahuʻinga ko iá pea mo e feilaulau fakapaʻangá.