“ʻE Founga Fēfē Nai Haʻaku Ului Lahi Ange ki he Ongoongoleleí?” Liahona, ʻAokosi 2023.
Haʻu, ʻo Muimui ʻIate Au
ʻE Founga Fēfē Nai Haʻaku Ului Lahi Ange ki he Ongoongoleleí?
ʻI he tohi ʻa Lomá, ʻoku akoʻi ʻe he ʻAposetolo ko Paulá ʻoku fiemaʻu ki he uluí ha meʻa lahi ange ʻi he tuí ʻataʻatā peé. Kuo pau ke tau ngāue ʻi he tui mo fakatomala mei heʻetau ngaahi angahalá ke liliu hotau natulá pea ului ki he ongoongolelei ʻo Sīsū Kalaisí.
Founga ʻe Tolu ke Fakamālohia Ai Hoʻo Uluí
Vahevahe hoʻo tuí mo e niʻihi kehé. Hangē pē ko e lava ke tokoni hono akoʻi ha foʻi fakakaukau ke mahino lelei ange ia kiate koé, ʻe lava ke tokoni hono vahevahe hoʻo fakamoʻoni ki he ongoongoleleí mo e niʻihi kehé ke langaki ai hoʻo tuí. Ko e hā ha founga ʻe taha te ke lava ʻo fakahaaʻi ai ʻoku “ʻikai te [ke] mā ʻi he ongoongolelei ʻo Kalaisí” (Loma1:16)?
Tā ʻo e ongo meʻa mali ʻi muʻa ʻi he temipale Laʻie Hauaiʻí
Fakalaulauloto ki he ʻuhinga hoʻo ngaahi ngāué. ʻOku akoʻi ʻe Paula ʻoku totonu ke fakahaaʻi ʻe heʻetau ngaahi ngāué ʻa e tuʻunga ʻo ʻetau ului ʻi lotó (vakai, Loma 2:21–23, 28–29). Te ke lava fēfē nai ʻo fakahaaʻi ki tuʻa ʻa e tui —hangē ko hono maʻu ʻo e sākalamēnití, tokoni ki he niʻihi kehé, pe ʻalu ki he temipalé—ʻoku mahuʻingamālie angé?
Manatuʻi hoʻo fuakava ʻi he papitaisó. ʻI he taimi naʻá ke papitaiso aí, naʻá ke fuakava ke fakatomala mei hoʻo ngaahi angahalá ʻo fakafou ʻi he Fakalelei ʻa Kalaisí (vakai, Loma 6:4–6). Mahalo he ʻikai te ke ongoʻi ha ului mālohi ki he ongoongoleleí he taimí ni, ka ko e ʻaho kotoa pē ko ha faingamālie ia ke fakafoʻou ai hoʻo fuakava mo e ʻOtuá pea hoko ʻo tatau ange mo Iá. Te ke fakahaaʻi fēfē nai ki he ʻEikí ʻokú ke fie ului ki Heʻene ongoongoleleí?