“Feituʻu Naʻe Fiemaʻu Ke Ma ʻi Aí,” Liahona, ʻAokosi 2023.
Leʻo ʻo e Kau Māʻoniʻoni ʻi he Ngaahi ʻAho Kimui Ní
Feituʻu Naʻe Fiemaʻu Ke Ma ʻi Aí
ʻOku ou houngaʻia naʻe tuku ʻe he ʻOtuá ke ma hē ka ma lava ʻo maʻu ʻa e tokotaha naʻe fiemaʻu fakahinohinó.
Tā fakatātā ʻa Brian Call
Naʻe hangē naʻe fiemaʻu ʻe he taha kotoa ha ʻapi ʻi he faʻahitaʻu māfaná ʻi he feituʻu matāfanga vela ʻo Ilo, Peluú, ko ia naʻe lahi maʻu pē ʻa e ngaahi matapā ke ma tukituki ai mo hoku hoa faifekaú. Ko e konga lahi ʻo ʻema tukitukí naʻe fakahoko ia ʻi he ngaahi ʻotu fungavaka tolu, fale nofo totongi ʻe 12 ne faitatau. Naʻe faingofua ʻa e hē aí.
Naʻá ma palani ʻi ha pō ʻe taha ke ma ʻaʻahi ki ha fefine ne mau fetaulaki. Naʻe tonu e fungavaka mo e fika ʻo e fale nofo totongi naʻá ma maʻú, ka naʻá ma ʻalu ki he fale nofoʻanga naʻe hanga mai ki aí. Naʻá ma tukituki, pea ʻi he fakaava mai ʻe ha talavou e matapaá, ne ma fakatokangaʻi kuó ma ʻalu ki he fale nofo totongi hala.
Ka kimuʻa peá ma fakamatala ki heʻema fehalaākí, naʻe pehē mai ʻe he talavoú, “Ongo ʻeletā, fiefia ke sio atu kiate kimoua. Naʻe ʻalu ʻeku kui fefiné ki falekoloa, ka ʻoku mei aʻu mai. Mo hū mai.”
Naʻá ma hū atu ki loto mo ʻema puputuʻú, ʻo tangutu ʻi he seá. ʻI he aʻu mai ʻa e kui fefiné hili ha ngaahi miniti siʻi mei ai, naʻá ne fiefia ke sio mai kiate kimaua.
Naʻá ma kei puputuʻu pē ʻi heʻema fehuʻi ange pe naʻá ne ʻiloʻi fēfē ʻa e ongo faifekaú. Naʻá ne talamai naʻá na akoʻi ia ʻi he taʻu ʻe ua kimuʻá, ka naʻe fakaʻau ke ne fuʻu femoʻuekina, pea ʻikai ai ke na toe ʻaʻahi ange.
Ko e pō ko ia ne ma ʻaʻahi ange aí, naʻá ne ongoʻi ʻoku ʻikai hano mahuʻinga. Naʻá ne faingataʻaʻia ʻi he uiké kakato. Naʻe fuʻu lahi ʻene ngāué mo ongosia pea naʻá ne ongoʻi naʻe ʻikai fuʻu mahuʻinga ha meʻa naʻá ne fakahoko. Pea mo ʻema ʻasi atu ʻo fakafiefiaʻi hono ʻahó, mo ʻoange kiate ia ha faingamālie hono ua ʻi he ongoongolelei ʻo Sīsū Kalaisi ʻoku ʻomi ai ha taumuʻa ki he kakaí. Naʻe hoko ʻema ʻaʻahi taʻeʻamanekiná ko e fakaʻilonga ia mei he ʻOtuá naʻá ne mahuʻinga kiate Ia.
Naʻá ma ʻalu ki he fale nofo totongi hala, ka naʻá ma ʻi he feituʻu tonu pē naʻe fiemaʻu ke ma ʻi aí. Naʻe ʻomi kimaua ʻi heʻema heé ke ma toe ʻiloʻi ʻa e ʻofefine ko ʻeni ʻo e ʻOtuá. Naʻe tataki kimaua ʻe he ʻOtuá ki ai ʻo fakafou ʻi he ʻikai lelei ʻema kumi ʻa e halá.
Hili ʻema mavahé, ne ma maʻu ʻa e fefine naʻá ma palani ke ʻaʻahi ki aí. Naʻe ʻikai ke ne fakatokangaʻi naʻá ma tōmui. ʻOku ou fakakaukau ki he meʻa naʻe mei hokó kapau naʻá ma maʻu ʻa e fale nofo totongi totonú ʻi he kamataʻangá.
Kapau naʻá ma ʻalu ki he feituʻu ne ma palani ki aí, ne mei mole ha faingamālie ne fuʻu fiemaʻu ke vahevahe ai e ʻofa ʻa e Fakamoʻuí. Ka naʻe ngāue ʻa e ʻOtuá ʻi heʻema ngaahi tōnounoú ke fakahinohino mai ʻa e feituʻu naʻá Ne finangalo ke ma fononga aí. ʻOku ou houngaʻia naʻá Ne tuku ke ma hē ka ma lava ʻo maʻu ʻa e tokotaha naʻe fiemaʻu fakahinohinó.