“Ko e Hā ʻa e ʻUhinga ʻa Paula ki he ʻLaumālie ʻo e Ohí’?,” Liahona, ʻAokosi 2023.
Haʻu, ʻo Muimui ʻIate Au
Ko e Hā ʻa e ʻUhinga ʻa Paula ki he “Laumālie ʻo e Ohí”?
Vahevahe ʻa ha Fāmili, tā fakatātaaʻi ʻe Dick Wahl, © Lifeway Collection / laiseni mei he GoodSalt.com
ʻI heʻetau hoko ko e fānau ʻa e ʻOtuá, ʻoku ʻi ai hotau natula fakalangi, ka kuo fanauʻi kitautolu ki ha māmani hinga. ‘Oku tau pōpula ki he angahalá. ʻOku ui ʻeni ʻe he ʻAposetolo ko Paulá “ko e laumālie ʻo e pōpula” (Loma 8:15). ʻOku tofa ʻe he ʻOtuá ʻi he ʻaloʻofa ha hala ke tau hao ai. ʻI heʻetau fakahoko ha ngaahi fuakava mo Iá, ʻoku tau tauʻatāina ai mei he laumālie ʻo e pōpulá pea maʻu ʻa e “Laumālie ʻo e ohí” (Loma 8:15).
Ko e Laumālie ʻo e Ohí
ʻI he kuonga ʻo Paulá, naʻe ʻuhinga ʻa e ohí ki hono fakahingoa ha taha ʻi tuʻa ʻi he fāmilí ke hoko ko ha ʻea-hoko. ʻE kau leva ʻa e tokotaha ohí ki he fāmili foʻoú, maʻu ha hingoa foʻou, pea maʻu ha tofiʻa.
ʻOku fakaʻaongaʻi ʻe Paula ʻa e kupuʻi lea ko e “Laumālie ʻo e ohí” ko ha talanoa fakatātā ki he kakai fuakava ʻa e ʻOtuá. ʻI he taimi ʻoku tau fai ai ha ngaahi fuakava mo e ʻOtuá, ʻoku tau toʻo kiate kitautolu ʻa e huafa ʻo Kalaisí. ʻOku tau hoko ʻo fakafou ʻi heʻetau ngaahi fuakavá, ko ha meʻa ʻoku mahulu hake ʻi he hoko ko ʻEne fānaú. ʻOku tau maʻu ʻa e “Laumālie ʻo e ohí” pea tau hoko ko Hono kau ʻea-hoko. Kapau te tau moʻui taau, te tau maʻu ʻa e meʻa kotoa pē ʻoku maʻu ʻe he ʻOtuá (vakai, Tokāteline mo e Ngaahi Fuakava 84:38).