“ʻE Lava Nai Ke u Maʻu ʻa e Tohi Ko Iá?,” Liahona, ʻAokosi 2023.
Leʻo ʻo e Kau Māʻoniʻoni ʻi he Ngaahi ʻAho Kimui Ní
ʻE Lava Nai Ke u Maʻu ʻa e Tohi Ko Iá?
Naʻá ku veiveiua ʻi heʻeku ongo fakalaumālié kae toki fehuʻi mai ʻe ha fefine ʻi muʻa ʻiate au fekauʻaki mo e Tohi ʻa Molomoná.
Tā fakatātā ʻa Brian Call
ʻI heʻeku talangofua ki he ui ʻa e palōfitá ʻi hoku taʻu 19, naʻá ku teuteu ai ke u ngāue fakafaifekau taimi kakato. Ne ʻikai fuoloa mei ai, kuó u maʻu ha uiuiʻi ki he Misiona Mexico Hermosillo.
Lolotonga ʻeku tatali ke u hū ki he senitā akoʻanga fakafaifekau ʻi Mekisikou Sití, naʻá ku hohaʻa pe te u vahevahe fēfē nai ʻa e ongoongoleleí. Naʻá ku fifili, “Ko e hā e meʻa ʻoku totonu ke u fakahoko ke u teuteu aí?”
ʻI ha pongipongi ʻe taha kimuʻa peá u ʻalu ki he ngāué, naʻá ku faʻo ha tatau foʻou ʻo e Tohi ʻa Molomoná ʻi heʻeku kató. Naʻá ku lotu leva, “ʻE Tamai Hēvani, tokoni mai ke u ʻiloʻi ʻa e founga ke foaki ai ʻa e Tohi ʻa Molomona ko ʻení ki he tokotaha pē ʻokú Ke fekauʻi mai kiate aú.” Peá u ʻalu leva ki he ngāué.
Hili e ngāué, naʻá ku ʻalu ki he ʻinisititiuti fakalotú. ʻI he taimi ko iá, kuo ngalo ʻiate au fekauʻaki mo e tohí ʻi heʻeku kató. Ka ʻi heʻeku heka ʻi he pasí ke foki ki ʻapí, naʻá ku tangutu ʻi he tafaʻaki ʻo ha finemui naʻá ne lau ʻa e Tohi Tapú.
Naʻá ku maʻu ha ongo mālohi naʻe pehē mai, “Ko e tokotahá ʻeni.” Naʻe ʻikai ke u tui ki he ongo ko iá ʻi he kamatá, ka naʻá ku toe ongoʻi pē ia.
Naʻá ku talaange ʻi heʻeku toʻo hake ʻeku Tohi ʻa Molomoná, “Fakamolemole, ʻoku mahuʻinga ʻaupito ʻa e tohí ni kiate au, pea ʻoku ou fie foaki atu ia.”
Naʻá ne pehē mai mo e mataʻi manukí, “Sai pē mālō.” Naʻá ne tuhu ki heʻene Tohi Tapú mo pehē, “ʻOku feʻunga ʻa e tohí ni kiate au.” Naʻá ne tuʻu hake leva ʻo mavahe, pea tuku toko taha au ʻi hoku ʻotu seá.
ʻI heʻeku tangutu ai ʻi ha kiʻi taimi mo ongoʻi hono fakasītuʻaʻi mo fakangalivaleʻi aú, ʻi heʻeku fifili ki he ueʻi ne u maʻú, naʻe tafoki mai ʻa e fefine ʻi muʻa ʻiate aú ʻo pehē mai, “Kātaki, ʻokú ke kei fie foaki pē ʻa e tohi ko iá?”
Ko hono moʻoní, naʻá ne fanongo mai mo hono husepānití ki heʻeku talanoa mo e finemuí.
“ʻIo!” Ko au atu ia.
ʻI heʻemau talanoá, naʻá ku ʻilo ai naʻe loto ʻa e ongomeʻá ke na lau ʻa e Tohi ʻa Molomoná. Naʻá na fie ako foki fekauʻaki mo e Siasí. Naʻá ku fiefia ke tali ʻena ngaahi fehuʻí.
Naʻá ku ako ʻi he ʻaho ko iá “ʻoku hina ʻa e ngoué ki he utu-taʻú” pea “kapau ʻoku [tau] maʻu ʻa e ngaahi holi ke ngāue maʻá e ʻOtuá ʻoku ui ʻa [kitautolu] ki he ngāué” (Tokāteline mo e Ngaahi Fuakava 6:3; 4:3).
Ta kuo ngaohi au ʻe he ʻOtuá ko ha meʻangāue ʻi Hono toʻukupú. ʻI he ʻahó ni, ko e ngāue fakafaifekaú ʻa e meʻa mahuʻinga taha ʻi heʻeku moʻuí.