“Mateuteu ki Hoku Tāpuaki Fakapēteliaké,” Ki Hono Fakamālohia ʻo e Toʻu Tupú, ʻAokosi 2023.
Mateuteu ki Hoku Tāpuaki Fakapēteliaké
ʻOku vahevahe ʻe he toʻu tupú ʻa e founga ne nau ʻilo ai kuo taimí.
Tā fakatātā ʻa Valentina Sumano
“Naʻá ku fāinga ʻi ha ngaahi māhina lahi ke ʻiloʻi ʻa e taimi totonú. Naʻá ku fakalaulauloto mo lotu ʻi he pō kotoa pē. Hili ha ngaahi māhina siʻi mei ai, naʻe ʻeke mai ʻe heʻeku pīsopé pe ʻoku ʻi ai haʻaku tāpuaki fakapēteliake. Naʻá ku talaange ʻikai, peá ne pehē mai, ʻSai! Te ta ʻinitaviu ʻi he tuku ʻa e lotú he ʻaho ní!’ Hili ʻeku talanoa mo ʻeku pīsopé, ne u ongoʻi mateuteu ke maʻu hoku tāpuaki fakapēteliaké. ʻOku ou ʻiloʻi ʻi he taimí ni ko e fehuʻi ʻeku pīsopé ko ha tali ia ki he ngaahi lotu ne u ongoʻi naʻe ʻikai tali maí.”
Naʻe maʻu ʻe Makaia S., Tekisisi, USA, ʻa hono tāpuakí ʻi hono taʻu 15
“Naʻá ku hiki mei hoku kolo tupuʻangá pea naʻe ʻikai ke u ʻilo pe ko e hā ʻa e meʻa te u iku ki ai ʻi he kahaʻú. Naʻá ku fiemaʻu ʻa e tokoni ʻa e ʻOtuá!”
Naʻe maʻu ʻe Kalalisa B., Uāsingatoni, USA, hono tāpuakí ʻi hono taʻu 13
“Naʻá ku lotu kimuʻa ʻi he konifelenisi lahí ke u ʻiloʻi pe naʻá ku mateuteu, pea naʻe hangē naʻe poupouʻi mai ʻe he lea kotoa pē ke u maʻu iá.”
Naʻe maʻu ʻe Tangikeni J., ʻIutā, USA, hono tāpuakí ʻi hono taʻu 17
“Naʻe vahevahe ʻe ha kaungāmeʻa ʻi he houalotu sākalamēnití naʻá ne maʻu ha fakakaukau ke maʻu hono tāpuaki fakapēteliaké. ʻI he Sāpate hono hokó, naʻá ku maʻu ʻa e fakakaukau tatau, ka naʻe ʻikai ke u ongoʻi taau. Ko ia naʻá ku ngāue ke u moʻui taau ke u lava ʻo maʻu hoku tāpuakí. ʻI ha kemi ʻa e toʻu tupú, naʻá ku vahevahe ai ʻeku fakamoʻoni fekauʻaki mo e tāpuaki fakapēteliaké, ʻa ia naʻe fakalotoa ha kaungāmeʻa ke ne maʻu hono tāpuakí. Pea naʻe hoko ʻa e talanoa kotoa ko ʻení ke ueʻi ai hoku tokouá ke teuteu ke maʻu hono tāpuakí!”
Naʻe maʻu ʻe Fiotoa W., Suisalani, hono tāpuakí ʻi hono taʻu 17
“Naʻe kamata ke u fakakaukau lahi ki ai, peá u fakaʻaongaʻi leva ha taimi ke u lotu ai mo talanoa ki heʻeku ongomātuʻá.”
Naʻe maʻu ʻe ʻAlilia C., ʻAitahō, USA, hono tāpuakí ʻi hono taʻu 17
“Naʻá ku maʻu ha loto-holi ki ai! Naʻe ʻikai ke lahi ha taukei ne u maʻu. Naʻá ku fakakaukau pē ki ai, fakaʻamu ki ai, pea naʻe ongo tonu ia.”
Naʻe maʻu ʻe Sieli H., ʻIutā, USA, hono tāpuakí ʻi hono taʻu 16
“Naʻá ku kole ki he ʻOtuá ha fakahinohino, peá Ne tali mai ʻe tokoniʻi au ʻe ha tāpuaki fakapēteliake.”
Naʻe maʻu ʻe Māselo T., Filipaini, hono tāpuakí ʻi hono taʻu 18
“Naʻá ku fakakaukau maʻu pē ki ai! Pea naʻe ʻi ai ha lēsoni ʻi he seminelí naʻe pehē, ʻKapau ʻoku nofo ia ʻi hoʻo fakakaukaú, mahalo naʻa kuo taimi ia.’”
Naʻe maʻu ʻe Petanī C., ʻIutā, USA, hono tāpuakí ʻi hono taʻu 15
“Naʻá ku fili ke u toki maʻu hoku tāpuakí ʻi ha hili haʻaku lotu fakamātoato mo ha holi ke maʻu ha ʻilo mei he ʻOtuá.”
Naʻe maʻu ʻe Tasitini H., Melilani, USA, hono tāpuakí ʻi hono taʻu 17
“Naʻá ku lotua ha tokoni hili ha pō faingataʻa moʻoni. Hili e lotú, naʻe lōmekina au ʻe he ongo ʻoku pehē mai ʻʻOku fiemaʻu ke ke maʻu ho tāpuakí.’”
Naʻe maʻu ʻe Kimipeli D., ʻIutā, USA, hono tāpuakí ʻi hono taʻu 16
“Naʻe ʻikai ke u fakapapauʻi pe kuó u mateuteu ke maʻu hoku tāpuaki fakapēteliaké, ka naʻá ku tūʻulutui ʻi ha pō ʻe taha ʻo lotua ia. Naʻá ku ongoʻi ha fiefia mo ha nonga ʻi he taimi pē ko iá.”
Naʻe maʻu ʻe Sosilini R., ʻIutā, USA, hono tāpuakí ʻi hono taʻu 12
“ʻI he seminelí naʻe ʻeke ʻe he tamaikí ha ngaahi fehuʻi fekauʻaki mo e tāpuaki fakapēteliaké, pea naʻá ku ongoʻi ʻe lava ke hoko hono maʻu ha tāpuaki fakapēteliaké ke tokoniʻi au ʻi he ako māʻolungá.”
Naʻe maʻu ʻe Meisoni S., ʻAlesona, USA, hono tāpuakí ʻi hono taʻu 14