“Fekumi ki he Mahinó,” Ki Hono Fakamālohia ʻo e Toʻu Tupú, ʻAokosi 2023.
Lea Fakaʻosí
Fekumi ki he Mahinó
Tā fakatātaaʻi ʻe Emily Jones
Ko ʻetau taumuʻa ʻi heʻetau fekumi ke maʻu ha mahino ki he ongoongolelei ʻo Sīsū Kalaisí, kuo pau ke tau fakatupulaki ʻa e tui ki he ʻOtuá mo ʻEne palani fakalangi ʻo e fiefiá pea mo Sīsū Kalaisi mo ʻEne feilaulau fakaleleí pea aʻusia ʻa e ului ʻoku tuʻuloá. ʻE tokoniʻi kitautolu ʻe he faʻahinga tupulaki pehē ʻo e tuí mo e uluí ke tau fakahoko mo tauhi ʻetau ngaahi fuakava mo e ʻOtuá, ʻo fakamālohia ai ʻetau holi ke muimui ʻia Sīsuú mo fakatupu ha liliu fakalaumālie moʻoni ʻiate kitautolu. ʻOku ʻomai ʻe he liliu ko ʻení ha fiefia, lavameʻa lahi ange mo e moʻui lelei pea tokoniʻi kitautolu ke pukepuke ha taumuʻa ʻoku taʻengatá.
Ke aʻusia ʻení, ʻoku fiemaʻu ke tau nofo maʻu ʻia Sīsū Kalaisi ʻaki ʻetau fakaʻutumauku ʻi he folofolá, fiefia ʻi ai, ako ʻEne tokāteliné, pea feinga ke moʻui ʻaki ʻa e founga naʻá Ne moʻui ʻakí. Ko e toki taimi ia te tau ʻilo ai Ia, ko Sīsū Kalaisi, pea fakatokangaʻi Hono leʻó pea ʻilo ʻi heʻetau haʻu kiate Ia mo tui kiate Iá, he ʻikai ʻaupito te tau fiekaia pe fieinua (vakai, Sione 6:35).
ʻOku ʻikai hoko noa pē ia. ʻOku ʻikai ko ha meʻa faingofua ʻa hono fakafenāpasi kitautolu ki he ivi tākiekina faka-ʻOtua māʻolunga tahá; ʻoku fiemaʻu ki ai ʻa e lotu ki he ʻOtuá pea ako ki he founga ʻo hono fakatefito ʻetau moʻuí ʻi he ongoongolelei ʻo Sīsū Kalaisí.
ʻOku ou fakamoʻoni atu ʻi he taimi ‘oku tau akoʻi fakamātoato, lotoʻaki, fakamamafaʻi mo fekumi ʻosikiavelenga ke mahino ʻa e ongoongolelei ʻo Sīsū Kalaisí pea feakoʻiʻaki ia ʻaki ʻa e taumuʻa moʻoni pea ʻi he ivi tākiekina ʻo e Laumālié, ʻe malava ʻe he ngaahi akonaki ko ʻení ʻo liliu ʻa e ngaahi lotó pea ueʻi ha holi ke moʻui fakatatau ki he ngaahi moʻoni ʻa e ʻOtuá.