“Tuí, Ngāué, ʻAloʻofá … mo e ʻAka Pasikalá?!,” Ki Hono Fakamālohia ʻo e Toʻu Tupú, ʻAokosi 2023.
Haʻu, ʻo Muimui ʻIate Au
Ngāue
Tuí, Ngāué, ʻAloʻofá … mo e ʻAka Pasikalá?!
Ako fekauʻaki mo e meʻa ʻokú ne tokoniʻi koe ke ke kei laka atu ki muʻá.
Naʻá ku sio ʻi he sioʻatá ki he mamulumulu ʻi lalo ʻi hoku ihú pea mo hoku kumukumú. Naʻá ku fakaalaala ʻo holoholoʻi ha fanga kiʻi efuefuʻi maka. ʻIo, naʻe hangē mai pē ia ha kiʻi kavá. Ko ha kiʻi kava mamulumulu mei he tō he halá!
ʻI he ngaahi miniti siʻi kimuʻá, ne u ako ha lēsoni mahuʻinga ʻaupito fekauʻaki mo e heka pasikalá: ʻoku faingataʻa ʻaupito ke tangutu hangatonu kae ʻoua leva kuó ke ʻaka ʻo lele ki muʻa! Naʻe ʻikai ke u ʻaka, ka naʻe kiʻi fuoloa ʻeku momoú, peá u taʻofi kikī, ʻo punakaki ki muʻa.
Ko e hā hono kaunga ʻo e meʻá ni ki he ongoongoleleí? Ko ha fehokotaki ʻeni ʻe taha ke fakakaukau ki ai. ʻOku faitatau pē ʻa e founga ʻoku fiemaʻu ai ke tau fakapalanisi mo ngaungaue ke kei heka-maʻu ʻi he pasikalá mo e makatuʻunga ʻetau fakalakalaka taʻengatá ʻi he tui mo e ngāue leleí fakatouʻosi. Pea ʻoku malava ke fakahoko ʻa e ʻaka pasikalá ʻi he ʻaloʻofa ʻa Sīsū Kalaisí.
Fakakaukau ki ai ʻi he founga ko ʻení: Naʻe foaki atu ʻe Sīsū Kalaisi ʻa e pasikalá. Ko Ia ʻokú Ne tokoniʻi koe ke ke ako ʻa e founga heka pasikalá. Te Ne lava ʻo fakamatalaʻi atu ʻa e ngaahi fakahinohinó, ʻoatu ha fanga kiʻi tokoni, pea naʻa mo hono pukepuke ho nofoʻá ke tuʻumaʻu lolotonga hoʻo kaka ke heká. Ka ko koe ʻoku fiemaʻu ke ke fili ke laka ki muʻá.
Naʻe vahevahe ʻe ʻEletā Tieta F. ʻUkitofa kimuí ni mai ha ngaahi fakakaukau tatau fekauʻaki mo e pasikalá ke poupouʻi kitautolu ke tau laka atu ki muʻa ʻi he tuí.
Naʻá ne pehē, “Tokanga ki he hala ʻokú ke fononga aí. Tokanga taha ki he feituʻu ʻokú ke taumuʻa ki aí. Pea ʻaka leva. Ko e palanisí ʻoku fekauʻaki ia mo e ngaʻunu ki muʻá.”1
ʻI hoʻo lau ʻa e Fuakava Foʻoú ʻi he taimi ní, mahalo te ke fakatokangaʻi naʻe akoʻi ʻe he kau ʻAposetolo ʻi he kuonga muʻá ha meʻa lahi fekauʻaki mo e heka pasikalá. Ko e fakakata pē ia! Ka naʻe tā tuʻo lahi ʻenau akonaki fekauʻaki mo e tuí, ʻaloʻofá, mo e ngāué.
Hangē ko ʻení, naʻe akoʻi ʻe Pita “ko e meʻa ʻi he ʻaloʻofa pē ʻa e ʻEiki ko Sīsū Kalaisí ʻe moʻui ʻa kitautolu” (Ngāue 15:11).
Pea sio ki he feituʻu ʻoku hā ai ʻene akonaki fekauʻaki mo e ʻaloʻofá—ʻi he tohi ʻa Ngāué, ʻa ia naʻe lekooti ai e ngaahi ngāue ʻa e kau ākongá! ʻOku fakamatalaʻi ʻe he konga lahi ʻo e Fuakava Foʻoú ʻa e founga naʻe fononga mo akoʻi ai ʻe he kau tangata mo e kau fafine faivelengá fekauʻaki mo Sīsū Kalaisí. ʻOku hāsino heni ʻa hono fakatahaʻi ʻo e tuí, ngāue mālohí, mo hono tali e tokoni ʻa e Fakamoʻuí.
Ko e hā mo ha toe ngaahi potufolofola kehe te ke lava ʻo maʻu ai ha fakamatala fekauʻaki mo e tuí, ngāué, mo e ʻaloʻofá? ʻOkú ke fakatokangaʻi fēfē nai ʻa e fengāueʻaki fakataha ʻa e ngaahi meʻa ʻe tolu ko iá ʻi hoʻo moʻuí? Ko ha ngaahi veesi ʻeni ʻe niʻihi ke kamata ʻaki: Sēmisi 2:14–17; ʻEfesō 2:8–10; mo e Molonai 10:32–33.
Sai, ko e talanoa fakatātā ki he pasikalá ʻoku ʻikai ko e fakatātā lelei tahá ia, ko ia ai ʻoua te ke fuʻu hohaʻa ʻo kapau he ʻikai ke ke maʻu ha fakataipe ki he meʻa kotoa pē. Tau fakaʻaongaʻi pē ia ko ha meʻa ke tokoni ke tau manatuʻi he ʻikai ke tau lava ʻo fakahaofi pē kitautolu, pea he ʻikai fakamālohiʻi ʻe he Fakamoʻuí hotau fakahaofí. ʻOku toki hoko ʻa e maná ʻi he taimi ʻoku tau ngāue fakataha ai mo Iá, ʻo feinga ke muimui ki Heʻene ngaahi akonakí mo fakahaaʻi ʻetau ʻofa ki he niʻihi kehé. ʻOku fakaʻamu ʻa Sētane ke tau foʻi, ke tuku ʻetau feingá pea tau ngalo hifo ʻi he faiangahalá mo e siva e ʻamanakí. Ka ʻoku ʻofa ʻa e Tamai Hēvaní mo Sīsū Kalaisi ʻiate kitautolu pea ʻokú Na poupouʻi kitautolu ʻi he foʻi laka—pe foʻi ʻaka—kotoa pē ʻi he halá!
Ko ia ai, teuteu ki he fonongá, tuiaki atu ki muʻa, kamata hoʻo laká, pea fakatokangaʻi ʻa e tupulaki te ke aʻusiá. ʻOku ongo lelei moʻoni ʻa e laka ki muʻá, ʻikai ko ia?!
Beside Still Waters [ʻI he Veʻe Vaitafe Nongá], tā fakatātaaʻi ʻe Simon Dewey