“ʻOkú Ne Tokoniʻi Au Ke U Fai ʻa e Ngaahi Meʻa ʻOku Faingataʻá,” Ki Hono Fakamālohia ʻo e Toʻu Tupú, ʻAokosi 2023.
ʻOku ou Faʻa Fai ʻa e Ngaahi Meʻa Kotoa Pē ʻia Kalaisi
ʻOku vahevahe ʻe he toʻu tupú ʻa e founga kuo fakamālohia ai kinautolu ʻe Kalaisi ke nau fai ʻa e ngaahi meʻa ʻoku faingataʻá (vakai, Filipai 4:13).
ʻOkú Ne Tokoniʻi Au Ke U Fai ʻa e Ngaahi Meʻa ʻOku Faingataʻá
Naʻe fāʻeleʻi au mo e mahaki ko e engeengá. Naʻe hoko ha fehalaaki lolotonga hono faitoʻo ʻo e mahaki ko ʻení, ko ia ai naʻe mole ha konga ʻo ʻeku malava ke fanongó pea ne u maʻu ha faʻahinga ʻo e Mahaki ʻUtó ʻa ia ʻoku faingataʻa ai ke u fai ha ngaahi ngāue pau pea faingataʻa ke lava ʻo palanisi ʻa e sinó.
Naʻe faingataʻa ʻa e akó koeʻuhí ko e tamaiki kehé. Naʻa nau tekelele au, taaʻi, lea ʻaki ha ngaahi meʻa taʻeʻofa, lea loi, mo siosiofi au. Naʻe ʻikai ke u lava ʻo fakafepakiʻi, pea ko e meʻa pē naʻá ku faí ko e lotu. Ko e taimi ʻe niʻihi naʻe tali mai ʻeku lotú he taimi pē ko iá, pea ko e taimi ʻe niʻihi naʻe fuoloa pea toki maʻu ʻa e talí. Ka naʻá ku falala ki he Tamai Hēvaní, ko ia naʻe hokohoko atu pē ʻeku faʻa lotú.
ʻI hoku taʻu 15, naʻá ku fakatou hoko ai ko ha palesiteni fakakalasi ʻi he Kau Finemuí mo ha ʻetivaisa ʻa e uōtí ki he hisitōlia fakafāmili. Naʻá ku manavasiʻi naʻa ʻikai ke u lava ʻo fai e meʻa kotoa pē. Naʻe ʻikai lahi ʻeku ʻilo ki he hisitōlia fakafāmilí. Naʻá ku lotua ha tokoni, maʻu ha ngaahi fakahinohino mei he ʻEikí mo e kau taki ne ueʻi fakalaumālié, peá u ngāue leva. ʻOku ou houngaʻia ʻaupito ʻi he falala mai ʻa e Tamai Hēvaní kiate aú. ʻOku ou fiefia lahi ʻi he foʻi hingoa kotoa pē ʻoku ʻave ki he temipalé. Kuo tokoniʻi mo fakaivia au ʻe he Tamai Hēvaní mo Sīsū Kalaisi.
Kuó u ako ʻoku ʻikai hanga ʻe he Tamai Hēvaní mo e Fakamoʻuí ʻo fokotuʻu ha ngaahi fakangatangata kiate kitautolu koeʻuhí ko ha ngaahi tuʻunga fakatuʻasino. ʻOkú Na ʻofa mo faʻa kātaki, mateuteu mo e toʻukupu ʻoku mafao mai ke akoʻi, fakamālohia, mo tokoniʻi kitautolu.
ʻOku ʻikai fakangatangata au ʻe hoku ngaahi tūkunga fakatuʻasinó, he ko e taimi ʻoku hoko ai ha faingataʻá, ʻoku ʻi ai ʻa e ʻOtuá ʻo mafao mai Hono toʻukupú. Ko e meʻa pē ʻoku fiemaʻú ke u tafoki kiate Ia ʻo kole tokoni.
Soatana S., Koiasi, Palāsila