“ʻOkú ke aʻusia fakataautaha fēfē nai ʻa e Laumālié mo ʻEne ngaahi ueʻí?,” Ki Hono Fakamālohia ʻo e Toʻu Tupú, ʻAokosi 2023.
Ngaahi Fehuʻí mo e Talí
“ʻOkú ke aʻusia fakataautaha fēfē nai ʻa e Laumālié mo ʻEne ngaahi ueʻí?”
Ngaahi Fakakaukau Fakatuʻupakē
“ʻOku ou ongoʻi ʻa e Laumālié mo maʻu ha ngaahi ueʻi ʻo fakafou ʻi he ngaahi fakakaukau fakatuʻupakeé. ʻOku hoko ʻeni ʻi he taimi ʻoku vilitaki ai ʻeku fakakaukaú ke maʻu ha ngaahi ueʻi mei he ʻOtuá. Naʻá ku ongoʻi taʻelata ʻaupito ʻi he kemi ʻa e Kau Finemuí. Naʻá ku lue ki hoku falé ʻo lotu ai. Hili iá ne u maʻu ha ongo ke u tafoki ki mui. Naʻá ku fai ia pea naʻá ku fetaulaki mo ʻeku kau takí. Naʻa mau fiefia ʻaupito ʻi he suingi he maea lōloá mo kai ʻaisipoloká! Naʻe tokoni ʻa e aʻusia ko ʻení ke u ʻilo ʻa e founga te u lava ai ʻo ongoʻi ʻa e Laumālié.”
Hapa J., 14, ʻOlikoni, USA
Melino ʻi Natulá
“ʻOku tokoni e nonga ʻo natulá ke u ongoʻi ʻa e Laumālié. ʻOku tokoni ʻa natula ke u ongoʻi ha nonga ʻi he taimi ʻoku ou fefaʻuhi ai mo ha meʻá. ʻOku ou faʻa tangutu pe luelue ʻi tuʻa ʻo fakakaukauloto ki he founga te u lava ai ʻo ikunaʻi e ngaahi meʻa ʻoku ou fefaʻuhi mo iá. Kuo lahi ha ngaahi ueʻi kuó u maʻu lolotonga hono ʻātakaiʻi au ʻe natulá.”
ʻAtisoni P., 14, Kalolaina Tokelau, USA
Talangofua ki he Ngaahi Ueʻí
“ʻOua te ke tukunoaʻi e ngaahi ueʻi fakalaumālie ʻoku ngali siʻisiʻí. Naʻa mo ha foʻi fakakaukau pē ke lea ki ha taha fekauʻaki mo ha meʻa, ʻe lava ke hoko ia ko e founga ʻoku ueʻi ai koe ʻe he Laumālié. Neongo ʻe ngali siʻisiʻi ha ueʻi fakalaumālie, ngāueʻi ia. ʻI hoʻo fakahaaʻi ko ia ʻokú ke loto-fiemālie ke ngāue ʻi he tuí, te Ne ueʻi koe ke ke fai ha meʻa lahi ange.”
Lose W., 15, ʻIutā, USA
Moʻui Mateuteu
“ʻOku ou ongoʻi e ngaahi ueʻi ʻa e Laumālié ʻi he taimi ʻoku ou mateuteu lelei aí. ʻOku ou fai ʻeni ʻaki ʻeku lotu fakamātoato mo feinga mālohi ke fanongo kiate Ia. ʻI he taimi ʻoku ou ongoʻi mateuteu aí, ʻoku ou maʻu ha loto-falala mo ha loto-vilitaki lahi ange. ʻOku ou ʻiloʻi ko e taimi ʻoku tau mateuteu aí, te tau lava ʻo maʻu e ngaahi ueʻi ʻa e Laumālié.”
Pauline K., 17, Fisi
Ko e Fakafiemālié
“ʻOku fakafiemālieʻi au ʻe he Laumālié. Ne tuʻo taha haʻaku lotua ha tokoni fekauʻaki mo ha meʻa pau. Lolotonga ʻeku lotú, naʻá ku ongoʻi naʻe fakafiemālieʻi au. Naʻá ku ʻiloʻi ʻe tokoniʻi mo fakafiemālieʻi au ʻe he ʻOtuá ʻi heʻeku muimui maʻu pē ki Heʻene faleʻí. Naʻe hoko ʻeni ke u lau ai e folofolá mo fai e meʻa kotoa pē te u lavá ke ongoʻi maʻu pē ʻa e Laumālié.”
Sofi G., 15, Minesota, USA