“Ngaahi Founga ʻe 4 Te Ke Lava Ai ʻo Hoko ʻo Hangē Ange ko Sīsū Kalaisí,” Ki Hono Fakamālohia ʻo e Toʻu Tupú, ʻAokosi 2023.
Ngaahi Founga ʻe 4 Te Ke Lava Ai ʻo Hoko ʻo Hangē Ange ko Kalaisí
Fiemaʻu ha ngaahi fakakaukau ki he kau ko ia ʻi he polokalama Fānaú mo e Toʻu Tupú? Ko ha ngaahi meʻa ʻeni ʻe niʻihi ʻoku fai ʻe he toʻu tupu ʻo Filipainí!
1. Ngāue Tokoni hangē ko Iá (Ngāue Tokoní mo e Ngaahi ʻEkitivitií)
Te ke hoko ʻo hangē ange ko e Fakamoʻuí ʻaki hoʻo tokoni ki he niʻihi kehé ʻo hangē ko ia naʻá Ne mei fakahokó. Pea ʻoku ʻikai fiemaʻu ia ke faingataʻa. ʻE lava ke faingofua tatau pē ʻa e ngāue tokoní mo e kau ʻi he ngaahi ʻekitivitī ʻa e Kau Talavoú pe Kau Finemuí, fakahoko ʻo e papitaiso maʻá e pekiá, pe ʻoatu ha pōpoaki ʻofa ki ha kaungāmeʻa. Te ke tokoni fēfē nai ki he niʻihi kehé?
“ʻI heʻeku hoko ko ha finemuí, ʻoku ou saiʻia ke tokoni ki hoku kaungā finemuí mo ngāue fakaetauhi kiate kinautolu. ʻOku ou ʻiloʻi ʻoku ou tokoni ki hono tānaki fakataha ʻo ʻIsilelí, ʻo aʻu pē ki hoku uōtí.”
Sana, 17
“ʻI heʻeku fakakaukau ki he ngāue tokoní, ʻoku ou fakakaukau ki hoku tufakanga mo e fatongia ko e tīkoní ke tokoni ʻi hono tufa ʻo e mā mo e vai ʻo e sākalamēnití ʻi he Sāpate kotoa pē. ʻOku ou ʻiloʻi ko Sīsū Kalaisi ʻa e sīpinga haohaoa ʻo e ngāue tokoní.”
Sose, 13
2. Tupulaki ʻo hangē ko Iá (Fakalakalaka Fakatāutahá)
Te ke lava ʻo fokotuʻu ha ngaahi taumuʻa ke ke tupulaki fakalaumālie, fakatuʻasino, fakasōsiale, mo fakaʻatamai ʻo hangē ange ko e Fakamoʻuí (vakai, Luke 2:52). Fehuʻi ki he Tamai Hēvaní pe ko e hā e founga ʻokú Ne finangalo ai ke ke tupulakí, pea faʻu leva ha palani peá ke ngāueʻi! Ko e hā ha founga te ke lava ai ʻo tupulaki lahi ange ʻo hangē ko e Fakamoʻuí?
“Koeʻuhí ko e ʻofa ʻa e Tamai Hēvaní ʻiate kitautolú, ʻokú Ne tāpuekina kitautolu ʻaki ha ngaahi meʻafoaki mo ha ngaahi talēniti. Kiate au, ʻoku ou ongoʻi fiefia ʻi he taimi kotoa pē ʻoku ou tauʻolunga aí pea tautautefito ki he taimi ʻoku ou vahevahe ai ia ʻaki ʻeku akoʻi ʻa e niʻihi kehé. Ko ha founga lelei ia ke fakamālohia ai ʻeku tui ki hoku Fakamoʻuí, fakatupulaki ʻeku loto-falalá, pea aʻu ʻo fetaulaki mo ha ngaahi kaungāmeʻa foʻou. Ka ko e taha ʻo e ngaahi meʻa lelei taha fekauʻaki mo iá ko ʻeku fakafiefiaʻi ʻeku ongomātuʻá, ngaahi tokouá mo e tuofāfiné, mo e ngaahi kaungāmeʻá. ʻOku ou ʻilo ʻoku foaki mai ha ngaahi meʻafoaki mo ha ngaahi talēniti kiate kitautolu ke ʻaonga ki he niʻihi kehé, pea ko e meʻa ia ʻoku ou fiefia ai ʻi he taimi ʻoku ou tauʻolunga aí.”
Lei, 16
3. Ako ʻIate Ia (Ko Hono Ako ʻo e Ongoongoleleí)
Te ke hoko ʻo hangē ange ko e Fakamoʻuí ʻi hoʻo ako ʻa e ongoongoleleí pea ngāueʻi leva ʻa e ngaahi meʻa ʻokú ke akó. Hangē ko ʻení, ʻokú ke ako fekauʻaki mo Ia ʻi hoʻo ako fakatāutahá pea ʻi hoʻo ʻalu ki he lotú mo e seminelí. Ko e hā e founga te ke lava ai ʻo ako lahi ange fekauʻaki mo e Fakamoʻuí?
“ʻI heʻeku ʻalu ki he kalasi ʻa e Kau Finemuí mo fanongo ki he kau leá lolotonga e ngaahi houalotu ʻo e Sāpaté, ʻoku ou maʻu ai ha ʻilo. ʻOku hoko e ngaahi folofola ʻa e ʻOtuá, ʻi he taimi ʻoku fakaʻaongaʻi ai ki heʻetau moʻuí, ko e poto.”
Mia, 12
“Ko hono fakamuʻomuʻa ko ia ʻo e seminelí ʻoku faingofua ange hono lea ʻakí ʻi hono fakahokó. Ka ʻi hoʻo lotu mo fakakaukau ki he ʻuhinga ʻoku mahuʻinga ai ʻa e ako fakalaumālié, he ʻikai ke loko faingataʻa [hoʻo] filí. Naʻe tokoni ia ke u ʻiloʻi ai hoku Fakamoʻuí, ʻunu ke ofi ange kiate Ia, pea tupulaki mo Ia.”
Siulia, 19
4. Tafoki kiate Ia
ʻI hoʻo feinga ke hoko ʻo hangē ko Kalaisí, fakapapauʻi ʻokú ke tokanga taha kiate Ia! Ko Ia ʻa e “halá, mo e moʻoní, pea mo e moʻuí” (Sione 14:6). ʻE lava ke faingataʻa ʻi he taimi ʻe niʻihi ke fakahoko ʻa e meʻa kotoa pē ʻokú ke fiemaʻú, ka ʻi hoʻo tokanga taha ki he Fakamoʻuí mo e meʻa te Ne fakahokó, te ke lava ʻo ʻiloʻi ʻa e meʻa ʻoku mahuʻinga tahá.
“ʻOku tākiekina au ʻe heʻeku ʻofa kia Sīsū Kalaisí ke u fakahoko ha ngaahi fili mahuʻinga koeʻuhí he ʻoku ou feinga ke fakakaukauloto ki he meʻa te Ne fakahokó. Kuó u fakahoko ha ngaahi fili taʻefakapotopoto ʻi he kuohilí koeʻuhí ko e ʻikai ke u tokanga taha ki heʻeku ʻofa ki hoku Fakamoʻuí. ʻOku ou ʻiloʻi ʻoku ʻikai ke tau haohaoa, ka ʻi heʻetau muimui kia Sīsū Kalaisí mo tauhi ʻEne ngaahi fekaú, te tau lava ʻo fakahaaʻi ʻetau ʻofa kiate Iá pea hoko ʻo hangē ange ko Iá.”
Sasitini, 15