ʻAi Hangatonu

Ko e hā ʻa e fatongia ʻo e fakakaukau leleí mo e fakaʻuhingá ʻi he ongoongoleleí?

Hangē ko hono poupouʻi ʻe he ʻEikí ʻa e moʻui lelei fakatuʻasinó (vakai, Tokāteline mo e Ngaahi Fuakava 89), ʻokú Ne poupouʻi foki kitautolu ke tau fakaʻaongaʻi mo fakamālohia ʻa e fakakaukau mo e fakaʻuhinga ʻa hotau ʻatamaí (vakai, Tokāteline mo e Ngaahi Fuakava 130:18–19). ʻOku totonu ke tau fakaʻaongaʻi ʻa e fakakaukau leleí, konisēnisí, mo e fakaʻuhingá ke ako, fai ha ngaahi fili, pea fakaʻaongaʻi ʻa e moʻoní ʻi he ʻaho takitaha.

Kae hangē ko e lea ʻa Palesiteni Henelī B. ʻAealingi ʻo e Kau Palesitenisī ʻUluakí: “He ʻikai feʻunga ʻa e fakamaau mo e fakakaukau poto ʻa e tangatá ke maʻu ai ha tali ki he ngaahi fehuʻi mahuʻinga taha ʻo e moʻuí. ʻOku tau fiemaʻu ha fakahā mei he ʻOtuá” (“Ko e Hokohoko Atu ʻo e Fakahaá,” konifelenisi lahi ʻo ʻOkatopa 2014 [Ensign pe Liahona, Nōvema 2014, 70]).

ʻOku ʻikai feʻunga ʻetau ʻuhinga fakakakanó ke tau ʻiloʻi ai ʻa e ngaahi meʻa fakalaumālié. Kuo pau ke tau fakafalala ki he fakahā ʻoku fakafou ʻi he Laumālié ki he meʻa ko iá (vakai, 1 Kolinitō 2:14). “[Ko e] Laumālié … ʻokú ne folofola ki he ngaahi meʻa ʻo hangē ko honau anga moʻoní” (Sēkope 4:13; tānaki atu ʻa e fakamamafá). ʻOku folofola ʻa e Laumālié fekauʻaki mo ha moʻoni ʻoku māʻolunga mo kakato ange ʻi he moʻoni ʻoku tau ʻilo ki ai ʻaki hotau ngaahi ongó mo ʻetau fakaʻuhingá (vakai, ʻĪsaia 55:8–9). Pea kapau ʻe ueʻi koe ʻe he Laumālié ke ke fai ha meʻa ʻoku ʻikai ʻuhingamālie ʻi he kamataʻangá, faʻa lotu pea manatuʻi ʻe tāpuekina maʻu pē koe ʻi hoʻo feinga ke muimui ki he Laumālié.