ʻOku ou Faʻa Fai ʻa e Ngaahi Meʻa Kotoa Pē ʻia Kalaisi

ʻOku vahevahe ʻe he toʻu tupú ʻa e founga kuo fakamālohia ai kinautolu ʻe Kalaisi ke nau fai ʻa e ngaahi meʻa ʻoku faingataʻa (vakai, Filipai 4:13).

ʻOku Ou ʻIlo Te U Toe Sio ki Heʻeku Faʻeé

talavou

ʻOku ou saiʻia ʻi he ngaahi veesi ʻi he Tohi ʻa Molomoná ʻoku fakamatala ki he founga naʻe ohi hake ai ʻa e kau tau kei talavoú ʻe heʻenau ngaahi faʻeé ʻi he ʻEikí (vakai, ʻAlamā 56:47–48; 57:21). ʻOku ou fakafehokotaki e ngaahi veesi ko iá mo ʻeku faʻeé. ʻOku ou tui ko e tokotaha lelei tahá ia. ʻOku ou fie hoko ʻo hangē ko iá.

Naʻe fefaʻuhi ʻeku faʻeé mo e kanisaá ʻi he meimei taʻu ʻe tolu. Naʻá ku mei taʻu 12 ʻi he taimi naʻá ne mālōlō aí. Hili ʻene mālōloó, naʻá ku kiʻi ongoʻi hē. Ko e meʻa ʻoku ou ʻofa lahi taha ai kiate iá ko ʻene ʻi ai ke tokoniʻi kimautolú.

ʻI he ʻaho ne hoko ai hoku taʻu 12, ko e hili ia ha ʻaho ʻe 13 mei he mālōlō ʻeku faʻeé, naʻe haʻu hoku kaungāmeʻa ko Siosefá ki heʻeku paati faiʻahó. Naʻá ne mono mai ha meʻaʻofa, fāʻofua kiate au mo fanafana mai ki hoku telingá, “Fakamolemole ʻi he meʻa ne hoko ki hoʻo faʻeé.” Naʻe mahuʻinga ia kiate au. Naʻá ne fakahā mai naʻe ʻofaʻi au pea naʻe tokanga mai ʻa e kakaí kiate au.

ʻI he taimi ne mau fehangahangai ai mo e mole ʻemau faʻeé, naʻe fakafaingamālieʻi maʻu pē ʻe heʻeku tangataʻeikí ha taimi ke mau fakahoko fakataha ai ha ngaahi meʻa fakafāmili. Naʻe tokoni lahi foki kiate au ʻa e tokoni ki he niʻihi kehé. Neongo naʻá ku loto-mamahi, ka naʻe faingataʻaʻia foki mo e kakai kehé. Naʻá ku tokoniʻi kinautolu, pea naʻá ku ongoʻi fiemālie ange ai.

Naʻe ʻi ai ha ngaahi taimi naʻá ku tangi ai ʻi he poʻulí. ʻI he ngaahi taimi ko iá, naʻá ku ongoʻi fiemālie ʻi he taimi naʻá ku tafoki ai ki he ʻEikí mo lotu ke u toe fiefiá. ʻOku ou manatuʻi ʻeku fakakaukau naʻá ku ʻiloʻi te u toe sio pē ki heʻeku faʻeé.

ʻOku ou kei loto-mamahi pē ʻi he ʻikai ke ʻi heni ʻeku faʻeé. Ka ʻoku teʻeki ke u ongoʻi ko e māvae ʻosí ē ʻo hangē ko ia ne u fakakaukau ki aí, he ʻoku ou ʻilo te u toe sio pē kiate ia. ʻOku ou hanganaki fiefia atu ki ai. ʻIkai ngata aí, ka ʻoku angalelei ʻaupito ʻa e mali ua ʻeku tamaí, pea ʻokú ne fakahoko moʻoni ʻa e fatongia fakafaʻeé.

Naʻe pekia ʻa e Fakamoʻuí maʻatautolu peá Ne toʻo kiate Ia ʻetau ngaahi angahalá kotoa. ʻOku ou ʻiloʻi ʻokú Ne ʻafioʻi ʻetau ngaahi hohaʻa mo e ngaahi palopalema fakafoʻituituí. Koeʻuhí ko ʻEne feilaulaú, te tau lava ai ʻo toetuʻu pea maʻu ha ngaahi fāmili taʻengata. ʻOku tokoniʻi moʻoni au ʻe he ʻilo ko iá.

ʻĒtani J., Veisinia, USA