E Faafeiloai atu mai i Lenei Lomiga

Lotogatasi o ni Uso ma ni Tuagane ia Keriso

O leo o tamaitai ma alii uma e manaomia e faataunuu ai le galuega a le Alii. E ui ina tulaga ese, ae tatou te faaatoatoa e le tasi le isi, ma lotogatasi i lo tatou faamoemoega masani ia avea ma soo o Keriso.

O ō tatou eseesega e lē tau tataiesea ai mai lenei faamoemoega. Nai lo lena, o ō tatou eseesega e aofia ai a tatou taleni ma saofaga ia e faamalosia faatasi ai lo tatou aafiaga i le galuega o le faaolataga ma le faaeaga i le lalolagi atoa. Na tusia e Elder Gerrit W. Gong o le Korama a Aposetolo e Toasefululua i lenei lomiga, “Tatou te ausia ni faaiuga sili atu ma maua le manuia sili atu i le galuega a le Alii a o tatou faatauaina saofaga a le tasi ma le isi ma galulue faatasi, o uso ma tuafafine i Lana galuega” (itulau 4). E faapefea ona tatou ausia lena lotogatasi? E tatau ona tatou faatuatua e mafai ona galue le Alii ma o tatou eseesega mo le lelei i Lona malo.

I la’u tusiga i le itulau e 8, ou te faasoa atu ai mea sa ou aoaoina mai le tala o le Feagaiga Fou e uiga i le fafine o Kanana, o lē sa saili atu i le Faaola e faamalolo lana tama teine. O le fafine e lē o se tasi o le aiga o Isaraelu. Ae sa ia te ia le faatuatua o le mana o le Alii e mafai ona faamalolo ai lana tama, ma o lenei faatuatua ofoofogia na soofaatasi ai o ia ma tagata o le feagaiga ma aumaia ai le vavega.

Se’i o tatou vaavaai atu i le Faaola i mea uma tatou te faia, ma o tatou “loto e lalaga faatasi i le lotogatasi ma le alofa o le tasi i le isi” (Mosaea 18:21). Ua faamanuiaina i tatou e aoao mai eseesega mamana o le tasi ma le isi ma faatauaina i latou e pei ona faia e Keriso. E maeu lo’u faafetai i le i ai o se Leoleo Mamoe e faalogo i leo tulaga ese o Ana mamoe taitasi.

Ma le faamaoni lava,

Peresitene Camille N. Johnson

Peresitene Aoao o le Aualofa